各位好我係面團媽 
想分享我懷孕時經歷 
諗返真係有血有淚 
由於係第一胎，思前想後決定於公立生。夠週數就去度頸皮做OSCAR，度頸皮時睇到係正常的。同時我地決定去婦X做埋T21檢查就更安心啦！於是係15W6時做左T21基本版 ，驗幾大類染色體問題都好夠啦，諗住都係求個安心姐 無諗過後面會發展成咁。。。。
做完醫生話無野唔會收到電話，大約2星期覆診拎報告。做完5日後，就有電話叫我返去聽報告 
已經估到可能有事即刻BOOK第二日去聽報告
第二日(7/15)下午返去婦X聽報告，等既過程真係好煎熬。結果出黎係T13陽性，即係小面團(BB胎名)可能有巴陶氏症，係好嚴重既缺陷，係一定唔可以留低個種。我聽到即刻爆喊 
，醫生問我係咪人工受孕(自然的)、家族有無病史(無試過啦梗係)，又話一般去到咁既週數其實差唔多就會流產 (聽報告個日係16W5），無流產就應該唔係既不過都要去做抽羊水確定(呢D好似安慰緊我既廢話)。最後再照幾張超聲波，拎報告＋轉介信就仆返去PWH約期見醫生
當晚我同老公不斷去搵T13染色體資料，好多都係寫頭骨有機會生長唔到，最多只會有4～6個月胎齡就會拜拜，就算好彩出到世好多都活唔過一歲，而且伴隨住體重過輕、智力&身體發展缺陷。個陣又好死唔死小面團週數同SIZE差左週幾兩週、4D超聲波又好似見到後尾枕D骨無生咁，而且個TEST準確率非常高，假陽性機會只有0.0幾%。。。
個陣我同老公都好唔開心好失落，心諗六合彩又唔見我地中 個晚真係失眠，雖然呢胎係意外無PLANNING(一結婚就中獎，無諗住咁快)，但都係我地第一次做爸爸媽媽，所以我同小面團講唔好玩啦 雖然你係意外但爸爸媽媽都想你出世架
7/16 下午同老公一齊返PWH見醫生，PWH醫生就解釋得好細心啦(可能我一入去以為即刻要做抽羊水，已經喊定先 
)，佢話見我係公立CHECK既T13顯示無問題，而有T13既BB其實好多12W已經會無左，無16W咁長，而且小面團係胎心正常，胎動都開始有，好大機會假陽性，但都係一定要儘快抽羊水先知，萬一有咩問題，要係24W前做手術，約定第個星期二先抽羊水(原來唔係即日做@@)
7/20 一大早就去到PWH抽羊水，有一位負責講解既醫生、一位主任級醫生、幾位姑娘在場。醫生大約講左抽羊水有咩風險啦，報告結果分三個階段出：快速檢查結果大約2-3日就會出，有好嚴重缺陷一般快速檢查都CHECK到出黎，如果未收到即係可能冇問題，總之一有問題就會CALL我地返去，而完整報告大約要等三星期。同埋我老公都有抽血，萬一BB真係有問題，就會CHECK埋爸爸媽媽DNA係咪有咩問題 (但無事就唔會拎黎檢查 
)。
抽羊水前幫我照左好耐超聲波，兩個醫生又一齊睇，佢地每講一句野我都好驚 最後主任醫生話睇完唔覺得BB有問題，真係好大機會係假陽性，我地個心都定少少。到真係抽羊水喇 由姑娘落針，唔痛但好冤。 之後就係三個星期既等待
個段日子，我補充品照食、要介口既照介、出街照出。點知7/30收到醫院電話 原來。。。小面團檢查報告有三個，出左兩個都無問題，可以放心8成 
不過都要等埋最後一個報告同照埋結構先至可以完全確定，但我同老公心情已經開心不少
8/10，20W3返PWH覆診，CONFIRM所有報告都顯示T13無問題，真係假陽性 
同日照埋結構都見唔到有身體缺陷，我同老公終於放下心頭大石
我老公後來都有問我如果當初無PATPAT痕去做T21咪唔會自己嚇自己，但我覺得T21(或其他無創)都係要做，始終準確率一定比醫院做OSCAR高，有能力做埋，有問題早D知道。
另外PWH醫生話好多胎兒形成之前係好複雜既分裂過程，當中可能分裂/複製錯左某DNA，但佢地會好叻豬自己修復返好，而做錯左既DNA就會丟出黎，再比媽媽幫手排走。因為T21抽血唔止會抽到BB DNA，都會抽到媽媽DNA，而且T21係好敏感既檢查黎，可能就會CHECK錯左所以好多假陽性都係因為咁而出現。
至於去邊做T21。。。婦X唔係唔好，做超聲波部機幾清既，抽血都快手唔痛，但報告有問題D醫生又唔比意見你，又唔識點安慰你，快快出張轉介信就叫你走呢個感覺唔係咁好囉 
估唔到第一胎就經歷左T21假陽性＋抽羊水，今日小面團已經38W6了 好快就同我地見面。好想分享呢個經歷比大家知，同一定要堅強面對，你既心情會影響BB。
如果你地有咩疑問都可以問我，雖然我唔叻但我可以分享我既經驗
其實之後仲發生左D事，懷孕實在係一個又一個難關 下次再分享
祝你一切順利
