友情係用黎出賣 
君子之交淡如水, 雖然我兩個知己好友, 但大家都係平等交往。
1個讚
我有朋友成日講笑：即係話仲有利用價值
我覺得咁樣唔係打唔打份工既問題 係個老師唔識尊重人
學生都係人 冇話邊個高人一等 人地有心送比你 唔應該咁做
4個讚
你經理都幾好，一下點醒你
1個讚
我媽媽，由細到大都話我好醜樣，總之好樣衰，所以唔可以留長頭髮，只可剪短頭髮，青春期就買好cheap 既bra 同m巾俾我，搞到我好唔舒服唔自在，又只係俾我哥留底既衫我著，所以我好自卑，覺得自己好樣衰。係我預科時同學頂我唔順，教我扮靚買衫，又叫我留長頭髮，我先知道自己都可以有靚女一面。
我而家有小朋友，我會好有心機同佢扮靚，當然都唔會好誇張，但起碼令佢開心自信
20個讚
我都好 mean，都係俾啲好 PK 嘅幼稚園，和小學老師無理取鬧過。
可惜個老師死得早，唔係我一定 join 小學校友會。
我老豆係好偏心我細佬，所以我大個左對我老豆和細佬一家都無咩感覺，大時大節 hi-bye friend only。
6個讚
我記得細個扭阿媽買乜買物佢冇錢買，初時都覺得唔開心，但我發現佢比我更唔開心，我就記住自己要用自己錢買嘢唔好扭人哋買比你，同埋要珍惜資源
5個讚
我細個都係咁，
我媽咩都話我唔識買，我買一定好核突，
著唔出去曬錢放櫃桶底。
不論買衫買鞋，做咩決定。
媽媽都叫我等埋家姐同我去。
比家姐做決定。
去到家姐又話你自己決定啦，
你自己比錢。
結果都係怕著得唔好睇，
比佢哋話唔敢買。
影響應該係個人會無咩主見。
1個讚
點解多男仔鍾意？
利用嘅嘢，有得互相利用都好
單向就差d
2個讚
做朋友，都會互相幫忙，但我唔會用“利用” 嚟形容。
如果係利用，單或雙向我都唔太鍾意，咁單向直頭唔係朋友
1個讚
幫助都係嘅，哈
我發現3人行係最好,我有過好多朋友,3人行或2人一組最易KEEP到友誼,但2人都要睇對方係咩人,我好易俾人搵笨既 
有幾個同學係長期取笑我既。
因為一直都係咁，從來唔知道呢件事係唔正常
Arr… 令我諗起，小學P3 轉校、第一次英文默書0 分，老師向全班話我，我話我聽唔明（因為突然全英文、跟唔到），佢直頭同全班同學一齊笑我
最後我畢業係英文科全級頭3、入英文中學。
佢…. 就話自己當年用心良苦
（想爆粗）
7個讚
阿媽偏心,我盡量唔偏.
當年生第二個嘅時候,我阿媽喺我背後講,話我懶唔想返工,我等兩個小朋友讀幼稚園就出返嚟做嘢,一早就六年.
阿媽爛賭(麻雀),我克制(我股票.同大個先知,原來佢曾經股票都玩好癲)
阿媽唔顧家,我顧
阿媽對我說話好hurt,我警惕自己對小朋友講嘢唔好難聽過粗口
6個讚
細個時好容易鑽牛角尖，成日搞到自己好唔開心，直至有一日見到呢句
「無人有義務氹你開心，想要活得開心就要靠你自己」
叮一聲，開竅了
另一句，係睇雜誌杜麗莎訪問講的
「Remember your marriage come first, not you child」
就算有左小朋友做ftm，我仍然將老公放在第一位
9個讚
你呢兩句都好好
第二句，我身邊啲朋友生完好似冇咗個老公咁，我提佢拍下拖啦，又話放唔低又盛。不過我唔敢多講了
多謝樓主開呢個post, 我見到好多同路人，我身邊朋友嘅原生家庭都好正常
我原生家庭嘅問題都一直困擾我，細個俾佢地打到大，到十幾歲著咩衫出街都要得我媽批准（我著得普通d佢唔鍾意，要著好誇張同埋性感佢先鍾意）否則會黑面黑到你肯換第二件衫為止。十五歲女俾我爸撳係地下用腳踩住我心口，我媽見到唔出聲，一唔聽佢地話就用暴力制衡我，仲有好多好多不能盡錄。
就算到我而家生咗小朋友有另一個家，佢哋已經打唔到我但轉左第二個方式折磨我，就係情緒勒索我，有少少唔滿意就同我斷絕來往，但我老公又唔明，成日叫我搵佢地，我老公係針唔拮到肉唔知痛個種人
所以有時黑心d諗，或者要到佢地走個日我先可以真正同佢哋斷絕關係
9個讚
太多，嘗試吓簡略咁講講
-
天生成日肚痛肚痾，全屋人都嫌我煩因為成日出出吓街要搵廁所，小學先生唔信我，成日以為我詐病唔返學，結果有日我舉手去廁所，佢扔低成班學生陪我入去，叫我開住度廁所門痾，要俾佢見到我真係有痾到嘢出嚟先收貨，雖然佢係女先生但係都好侮辱記到而家。連我老竇都唔惹少，佢都以為我詐病，有晚拎住個鎚仔入嚟恐嚇我呢個小學生，叫我第二日一定要返學，佢個樣好惡好認真我除咗喊就唔知可以做啲乜，自始我就冇再同佢親近過
-
中學有個又靚身材又好唱歌又好聽嘅同學俾人蝦，先叫佢做A。處於勢力頂點嘅大家姐恐嚇我叫我唔好同佢玩，又迫我一齊踩佢個書包，但係我冇諗咁多，覺得佢係我朋友點解要咁做，而且見佢俾人排擠日日孤伶伶咁好慘，所以日日都照陪A食lunch行街。結果有日A粒聲唔出退咗學，咁就仆街喇，蝦佢班人全部轉曬蝦我，舊嗰班朋友扮唔識我，其他人又話我有愛滋個個都唔敢掂我，傳工作紙都係扔曬落地下要我自己執。放學又拉我埋一二邊玩刮人遊戲，3個人夾埋要令我輸，俾人刮咗十幾巴塊臉腫曬返到屋企我呀媽問我咩事都唔識答。又搵高Form喺ICQ呃我話鐘意我，約我第二日落去佢課室搵佢，我當年純情小綿羊信咗仲帶咗粒朱古力落去送畀佢，一入到課室就有人擋住度門唔俾我走，成班人不停侮辱我問我點解我覺得有人會鐘意我，又唔睇吓我幾豬，又叫我好心照吓鏡（下刪5千字），係到打鐘先俾我走。咁嘅日子過咗3~4個月就頂唔順，考考吓試我會突然間爆喊出嚟收唔到掣，Miss好好人以為我唔識做卷先喊所以陪咗我落醫療室冷靜，有日上普通話堂後面班人喺度一路笑一路話我好鐘意日日用牙刷自慰，我聽完爆喊到扯曬蝦，當場早退返屋企之後就冇再返過學，仲患埋厭食同抑鬱
-
承上，退咗學之後除咗呀媽冇人信我真係俾人蝦（因為佢真係見過我塊臉腫住咁返屋企），其他屋企人都覺得我係單純唔想返學先老作自己俾人蝦，所以好多閒言閒語冷嘲熱諷。呀媽問我退咗學之後有啲咩想做，我仲好迷茫，所以答佢「想學日文啩」，我家姐聽到，嗰晚就打開房門大大聲同佢朋友傾電話，話「幾時到佢學日文呀？係都你學先啦」，一路大大聲講大大聲笑，我聽到覺得好委屈，自始冇再同屋企人曝露過自己啲私人嘢
-
我家姐由我出世開始就冇鐘意過我，小2~小3同佢爭gameboy玩，佢一個唔好老脾就搵火牛扑濕咗我，爆曬缸，連我老母都罵佢係咪黐線。細個一齊玩啲乜，佢都會嫌我玩得差所以發脾氣唔玩。問佢功課就會罵我蠢，話呢啲嘢上堂咪教過曬囉，所以唔想教（事實係你俾人欺淩緊嗰陣根本唔會有心機上堂，你只會不停望住隻錶希望快啲放學，而且其實我係拎過英文全班第3，不過who fucking cares），搞到呀媽返緊工我都成日喊住咁打畀佢訴苦。佢又會成日拎我做笑料同佢班frd細聲講大聲笑，成個八婆咁。佢好鐘意話我裙腳成日黐住老母，喂，唔通你蝦我我仲要繼續同你玩？唔同你玩我咪同老母玩囉。屋企出事嗰排佢完全冇幫過手，我同呀哥有出手調停，佢就淨係識匿埋一二邊事不關己咁冷嘲熱諷。佢份人係非常自我中心，所有嘢都要圍住自己轉，例如某啲衫明明係我著先，佢都會罵我跟佢風；又會幻想我葡萄佢讀到中七，事實上我識有人讀過kong u甚至係oxford，澳洲籍大學教授又有，我都未葡萄佢哋，我要葡萄你？叫親佢做乜都會發大小姐脾氣，其他人焗住幫佢執手尾就好似好奉旨咁。咁我呀媽嗰期有精神病，某日因為佢遲開門就刮咗佢一巴，佢衝咗入房喊，我幫佢好大聲咁罵返我呀媽轉頭，罵到佢走咗，事後佢一句多謝都冇。自始我冇認過呢個人係我家姐，唔好以為佢大個咗就會有改善，你太天真。我兩老生cancer嗰陣有叫過佢一齊分工合作打理好屋企，垃圾桶要乾淨，地下同埋去水位頭髮自己清理返，碗碟唔好留咁耐洗etc，佢反應大到好似我侵害緊佢嘅自我同自主權咁，又話「我同你呢啲人唔同咖」，又話「我有情緒病咖」，其實我只係叫佢做啲好基本嘅嘢，同我講咁多嘢做乜啫？所以我隔離post都有講，我屋企咁樣我都未覺得係一種詛咒，但係同呢隻生物不幸生於同一個家庭就係一種詛咒
-
呀哥讀中學嗰陣帶埋同學上嚟玩，本身佢哋喺客廳打緊機，佢個肥仔同學無那那入嚟搵我玩，我唔想理佢繼續做自己嘢，佢又係咁煩我，見佢係呀哥同學有少少覺得自己要招呼客人就同佢玩，結果玩玩吓枕頭佢隔住張被咁壓上嚟，仲係咁磨，一路磨一路呻吟，佢肥到隻豬咁我根本推唔開佢，唯有一路扮笑一路叫佢唔好玩，好彩房門冇閂埋佢聽到我呀哥叫佢就行開咗，如果唔係我呀哥喺度佢100%會姦埋我，而家諗返起都覺得好L噁心
-
老竇借咗3間財務公司錢去賭，佢一直都冇講，直到有日班收數佬上門放火盤燒鐵閘先揚曬，自始我哋由小康家庭變到要拎綜援，見過佢推我呀媽落地，日日家嘈屋閉，老母仲黐埋線，屋企個氣氛成日都好緊張，搞到我越嚟越唔鐘意出去客廳，唔鐘意出去食飯，慢慢就變咗做個毒撚
唔覺唔覺打咗咁長變咗做金剛棒，係時候好收吓掣
5個讚