梅啟明解釋點解為《梅艷芳》告電影公司 梅媽慶幸梅姐交基金託管遺產
2021年12月9日週四 下午3:58·2 分鐘文章
王丹妮演《梅艷芳》
《梅艷芳》香港票房逾5千萬成為本年度港片之冠，而梅姐大哥梅啟明早前入稟高等法院，循民事途徑控告投資拍攝《梅艷芳》嘅安樂影片。梅啟明親自撰寫嘅入稟狀提到，《梅艷芳》製作過程中，電影內容及宣傳品等都使用有關商標，但未經梅啟明同意，佢作為梅艷芳兄長兼商標持有人，認為安樂影片令公眾被誤導，錯誤理解電影同佢有關，繼而造成損失。
梅啟明與梅媽
尋日TVB《娛樂頭條》節目搵到梅啟明受訪，佢解釋得知電影開拍時已經3次聯絡電影公司，對方都冇回應。佢又話因為電影拍攝嗰陣未知劇本內容，所以到公映後先入稟。對於梅媽（覃美金）聲稱因為官司而斷言斷絕母子關係，梅啟明認為阿媽唔理解。
近年梅啟明多次同梅媽就梅姐遺產事宜告上法庭，因此被網民冠以「遺產界KOL」，梅啟明回應時有啲扯火咁話「你啲人話我行行企企，我做嘢使唔使要同人交代？」。
《梅艷芳》電影中，廖子妤飾演梅愛芳
另一方面，網台D100主持潘小文聲稱早前探過梅媽，佢引述話梅媽慶幸女兒梅艷芳將遺產交俾基金託管，認為如果唔係咁做，梅啟明會駛曬啲錢，而家至少每個月有生活費。梅媽又透露，2000年大女梅愛芳過身，梅啟明冇出現，但到梅艷芳逝世就現身。後來梅啟明知道遺產冇佢份，就認為梅姐「欠佢好多」。潘小文又引述梅媽話「四個（仔女）都係我生，點知走剩呢隻！」。
