啱啱前日買咗新儲物箱所以執房
扔咗3大袋垃圾同捐咗1大袋衫
我平時好少亂買嘢所以對我嚟講已經係好多
我諗我份人唔算係好有物慾，平時生活上分得好清楚有咩係自己需要，同埋有咩係自己想要
所以就算呢一刻就算我要搬屋同離開香港都好，我都唔會帶太多嘢走
最多都係帶有回憶嘅嘢（信、禮物、毛公仔）同埋基本生活用品就可以即刻走人
講起斷捨離我諗起以前呀媽在生嗰陣佢好鐘意扔嘢
細個唔明點解仲會好嬲佢扔埋我啲嘢
而家大個咗有少少理解到，如果間屋亂到乜咁一返到屋企真係會覺得好心煩，又唔係話要你極端到扔曬所有嘢行minimalism，不過勤啲執屋個人真係會舒暢啲，空間多咗又少啲壓迫感
我諗住而家開始執下抹下,到年28就唔駛特登大清潔 
大清真係好爽 
今日假期開始執衣櫃，我諗50件衫得10件左右係會成日著，其餘40件都係過時/size唔啱唔會再著
但執起上黎又有d唔捨得，只係揀到20件可以即掉
但我相信執到冇野好掉就會掉埋
疫情下可以邊度捐舊衫？
平時d收集箱好似鎖左唔收，
掉左又好可惜。。。
最簡單，Facebook有好多free group。
小朋友衫我會俾FD~
大人衫夏天衫我會做地布抹布,冬天衫我唔要得一定好殘,我會直接掉~
我聽聞收集箱既其實最後都係去堆田區…
咁你同我一樣都唔算好多衫,但我地都算捨得清衫
我先2日就係捐落香港地球之友啲回收箱
喺正我樓下唔洗行幾多步就捐到好方便
聽聞年頭因為武漢肺炎衛生問題佢哋先鎖箱，而家應該已經開返晒
哈哈 50件留10件只係例子，現實仲多衫 
冬天衫都掉咗幾件，因為想買新衫，唯有叫自己掉2進1先可以買
我好幾年無買冬天衫啦,今年買左幾件,預計會掉20件
今日我朋友嚟同我一齊執廚房
掉咗勁多奶奶之前買落嘅過期食品同花曬嘅煲
如果唔係我朋友嚟幫手，我諗我一樣嘢都清唔到，因為我老公咩都話好嘢嚟㗎，仲用得唔好嘥
d糖冇食用期限唔好掉，但溶曬受潮變成一舊舊，都仲話冇問題
結果我朋友一走，我老公就執番一個小水煲，叫我‘省’返乾淨個煲，但明明我哋轉用電水煲好耐，li個小水煲至少兩年冇用過
然後又望住一個封塵厚鉆板話要留，我話得兩個人又唔斬雞，唔使要啦⋯⋯佢話可以留嚟斬柴，我真係俾佢激到叫佢搬上山住
Omg…咁收嚟做乜？！
嘩,呢d野真係留不得,早掉早開心~
懶環保,做下樣 
叫佢自己‘省’ 
老公唔肯掉，我諗只係過期嘅食材都掉咗一大袋黑色垃圾袋
有啲過期食品係2015年，有一大樽受潮嘅胡椒粉，倒轉個樽係反地心吸力，我老公都唔肯掉
D嘢包住曬，問佢係咩…佢話唔知，最好原封不動放回原位
之後我逐樣拆嚟睇，有d用廁紙包住嘅木筷子，痴線一望已經起曬黑色點，有d仲有霉
好似好衰，但我忍唔住笑左
肯掉都係個好開始，加油！！