《梅艷芳》電影正式上畫，唔少同梅姐一生相關嘅事蹟再度成為話題。電影除咗刻劃梅姐星途同感情路之外，亦出乎意料紀錄曾經令梅姐捲入軒然大波嘅夜店遇襲事件。梅姐甚至因此要去泰國避風頭，演藝事業一度叫停。
90年代香港嘅娛樂圈曾經受黑社會入侵，巨星如劉德華都試過被黑幫威逼拍戲，甚至李連傑經理人更被槍殺，娛圈中人曾經搞遊行要求外界正視。1993年，到夜店消遣嘅梅艷芳，估唔到會發生一件牽連甚廣嘅糾紛。
當時有報導指，梅姐某晚去到九龍塘一間卡拉OK消遣，期間電影人黃百鳴弟弟黃百年介紹一名有勢力人士俾梅姐識，點知發生糾紛。起因有多個說法，其中之一是江湖人士力邀梅姐「過房」唱K但被拒，另一個講法係涉足電影界嘅江湖大佬，約梅姐傾拍戲事宜，但係電影有部份情節令梅姐難以接受，雙方傾唔掂數。無論事情起因如何，綜合各方報導所見，當晚發生衝突期間，梅姐被人襲擊，最常見描述係被掌摑。前TVB藝人吳麗珠早前接受訪問，提到原來梅姐出事當晚佢都在場，仲話見到梅姐被人「質」咗幾拳。
後來梅姐搵當時男友林國斌以及一班朋友到場，事件總算平息。但係第二日，有江湖背景嘅電影公司老闆黃朗維喺街頭被人襲擊身中多刀，令人聯想到前一晚嘅酒吧衝突。點知幾日後，黃朗維喺浸會醫院休養期間，有2名槍手潛入病房，向黃朗維頭部連開多槍，黃當場死亡。
黃朗維死後，警方搵梅艷芳同林國斌協助調查，而梅姐為安全計隨即離開香港，據知係同林國斌喺泰國暫避，一去大半年。然而事件仲未平息，梅姐遇襲一年半後，有「灣仔之虎」之稱嘅陳耀興喺澳門參加賽車後，淩晨時份喺街頭俾人槍殺。有指黃朗維嘅死同陳耀興有關，於是黃嘅身邊人進行報復。有記者當年搵梅姐回應陳耀興被殺事件，梅姐就叫傳媒「放過我吧」。