好掛住我個小天使bb
自從佢離開左之後
呢兩個幾月幾本上都離唔開喊
係屋企人面前扮無野
唔想佢地擔心 基本上我只係係老公面前會爆喊
再唔係就自己偷偷地喊
明明呢幾日好左d 喊小左
而家訓唔著 情緒又好波動
崩潰咁大喊左一場 老公仲訓緊
起身問左句咩事就訓返
都明白佢返工辛苦又攰
我都想佢再關心我多d
但又好怕自己d負能量影響到佢
我好矛盾 我究竟可唔可以撐得過
我都唔知可以用咩方式去舒發我既感受
我只係好傷心好傷心好傷心
13個讚
我記得你呀~想喊就喊,唔洗忍。喊都係一種舒發~我果陣買左2隻一模一樣嘅毛公仔,一隻自己、一隻留俾小天使。晚晚就係抱住毛公仔喊,摸住毛公仔就好似同小天使玩緊同一樣野、同小天使一齊。我成日同小天使講,快D返黎,我地一齊玩毛公仔~
有樣物件可以轉移一下對小天使嘅情感,um…我都唔知點講好 
總之有件可以同小天使有個連結嘅實物,係好好多,自己一個都可以有D安慰,你可以試下~
一定可以撐得過,但真係需要時間。祝你的小天使可以快D返黎 
Big hug🫂
時間會沖淡
我果時就會block 曬所有有咗bb、啱啱生bb 嘅朋友，每逢有bb / 小朋友嘅聚會都唔出去。
差不多每日會攞bb 張相出嚟同佢講嘢，合埋眼諗返生佢出嚟（引產）嘅過程、抱佢望佢陪佢走（斷氣）嘅情境。
但我知道我需要接受、面對、同向前行，所以一步步返到正常狀態
你要加油
我都試過
始終唔係老公個肚有bb，佢唔明白我感受都正常
所以我唔會要求佢理解我，開解我，向身邊陪住我就夠
始終都係靠自己挨過佢，思想要正面啲
而家最緊要係調理好身體，準備下一次懷孕
我曾經覺得係自己做得唔好，令到佢出唔到世
我去睇流年時，師傅同我講，係佢無緣份嚟到呢個世界，唔係我嘅問題，唔好自責，話佢會再返嚟
我係釋懷咗唔少，結果bb都有返嚟，而家仲兩歲啦
所以要好好調整自己心態，再諗令到自己唔開心都無用，積極啲諗佢一定會返嚟，而家要令自己身心都好好，先有最佳狀態接佢返嚟
難關要過，加油!!
1個讚
給你一個擁抱
2個讚
想喊既就用力喊曬佢！
當你喊到好攰好辛苦時，要話畀自己知，呢一切要停架啦！
BB 係天堂見到媽媽咁辛苦，佢明架啦！
BB 係時候放係內心深處， BB 知道媽媽唔會唔記得左佢就夠。
加油！
推介你睇下韓劇《產後調理院》，最尾果集有個媽媽講過佢會因為太掛住小天使，日日去探佢，佢希望自己可以慢慢由日日，變成兩日，一星期，一個月，一季，呢個係一個過程，要慢慢去處理，所以唔好逼得自己太緊，唔開心係正常架
建議你哋睇呢本書，當中一個case係講小產，睇後你哋會釋懷好多，雖然傷痛永難磨滅，但會令你哋重新企返起身走落去。
各位媽咪，加油。
5個讚
我都啱啱經歷左我嘅小天使離開左我！
呢種心情我好明白，我初時都喊左好耐，成日都問點解，係咪自己做錯嘢先會令佢離開我～仲會時時刻刻都會諗起佢。有時係街見到人大住個肚，有時都會諗返自己而家個肚有幾多個月大㗎。
始終bb同媽咪連繫最緊密，男人嘅反應可能冇我地咁大，但係唔代表佢唔傷心，只係佢未必係你面前表演出黎啫～
搵啲嘢做分散下自己注意力，等自己唔洗成日諗住，呢個真係一個過程，時間會慢慢幫你行過呢段經歷。
最重要係養好身體，你嘅小天使一定會好快返黎你身邊㗎。
我而家都努力養好身體等佢返黎，我地一齊加油呀 
1個讚
曾經是過來人。仲係幾次。所以明白果份傷心。唔被明白的心。尤其當有啲人會怪責我地係咪食或做佐乜。我只可以說時間會讓呢份傷痛過去。你永遠也是bb的好媽媽。
呢段時間調理好身子。做運動。睇中醫。去預備自己下一個機會。我記得有個醫生同我講。而家個子宮係fresh。會易啲。BTW 2次M後就可以開始試。
我兩年前都試過
個陣只想放工日日買醉 喊到傻咗 老公又唔理 要一年幾先走到出黎
但好幸運走出後睇左陣中醫就有左 而家小朋友就黎半歲 雖然小朋友有病照顧上辛苦啲 但都開心
加油呀！每個人recover時間唔到 唔洗逼自己振作 慢慢來 ready時再試啦 support you!
老土講句"時間會沖淡", 但真係好難沖淡一切…
真心想喊就喊, 千其唔好死忍呀
我都係過來人, 就算過咗7年我都仲會記起…
1個讚
呢集我喊到…
1個讚
記得當晚抱bb既時候
醫院放左個心心係佢心口
我一掛住佢就會拎住個心心
但一同佢講野就忍唔住會諗起我地既回憶
又會諗起好殘酷既結果
成日會諗點解個天咁殘忍
要帶走佢
1個讚
我係醫院個陣已經quit 哂所有媽媽谷
間唔中有d媽媽會打黎
同埋會收到email提你而家幾多週
要變番正常真係要好漫長即時間
1個讚
我老公其實都好傷心
但因為佢要返工 好快可以將bb放左係心底入面 我就日日係屋企休息 煲劇 等報告 睇醫生
好多人都同我講係同bb唔夠緣份
仙館個師傅都有講如果夠緣份下次都會係佢返黎 我其實都搵到流產原因啦
係我子宮結構異常 令到Bb早產
我覺得我自己唔夠小心
雖然醫生有講下次可以做子宮頸環紮
但我仲係好恐懼 好驚 但一心又好想接返bb
我呢 已經喊到隻眼睇野好矇
喊得勁個陣就深呼吸
呢世都唔會唔記得佢
突然覺得生死真係一線之差
我唔敢睇呀
唔知會唔會又喊到崩潰
我都好想睇下
邊間書局有得賣？