現今社會仍有不少父母，將「玩運動」與「讀書成績差」劃上等號。有網民指，自己沒有讓子女學習任何運動，稱體育出色的人「都係讀書差啲的」，反指音樂人的成績則較為優異。這番言論立即惹來大批網民批評思想落後，更有人舉「女飛魚」何詩蓓為例，指她不但泳術超凡，更在文憑試（DSE）中考獲7科35分佳績！
該名網民日前在社交媒體Facebook專頁「家長 Secrets」發文，指早前東京奧運掀起運動熱潮，身邊很多家長都讓子女學習各種體育，不過他直言沒有「跟風」，更指覺得「體育出色的人都係讀書差啲的」。他稱，要替自己的子女找私人補習老師時，假設對方是名校出身，亦會問清楚是以學術、音樂抑或體育成績錄取，呼籲各位家長小心留意，強調「運動人成績真係唔OK」，而「玩音樂的（人）成績通常超班」。
帖文隨即惹來熱議，不少網民都批評這番言論反映樓主的思想落後守舊，「睇完笑咗，視野真係好窄，好多運動人讀書都好叻，只係你遇唔到啫」、「運動叻=讀書差？果然生仔真係要考牌」、「膚淺嘅人係眼中只有成績ok唔ok」、「做你仔女真係慘，運動對兒童腦部發展勁重要都唔知」。
另外，有網民勸樓主搜尋今屆東京奧運港隊代表的資料，指體育與學業兼優的人比比皆是，其中有人就舉例兩面奧運銀牌得主何詩蓓。翻查資料，現年23歲的何詩蓓在DSE中考獲7科共35分佳績，其中包括通識教育（5**）、英文（5*）、數學（5）、企業會計與財務概論（BAFS）（5）。
2個讚
佢半個鬼妹仔又成日出國比賽，個唔到通識仲叻過英文wo
1個讚
老實，又唔係真係個個都咁叻，文武雙全既
專心做一樣野要花好多時間，呢個係一定既
但同時顧唔顧到學業呢？真係睇個人
家長擔心，都可以理解啊？！
2個讚
玩運動同其它興趣例如彈琴跳舞捉棋一樣，除非太沉迷唔理學業，否則應該無乜關係
唔係個個人都有咁好精力同時應付咁多活動，最緊要約法三章，如果因為顧住運動而荒廢學業就一定唔得
2個讚
做到文武雙全固然係好，所以飛魚咪全港都識佢。但係更多既係平凡既人，顧此失彼，除非好有天份，否則一般邊方面擺多d 時間就邊方成就高d。香港地運動員不被重視，讀書叻做專業人士人工高，做家長自然係希望仔女第日走條舒服d 既路。
有d 人鐘意用李嘉誠都冇讀大學黎對比讀書唔係一切，係既，但呢個世界有幾多個李嘉誠呀。講機會率架嘛。幸存者偏差。
2個讚
兩睇，運動員培養左好多人生需要嘅特質，係同讀書/做嘢/做人相輔相成。
例：自律、面對挫敗、堅持、精益求精、時間分配等。
冇運動/讀書兼顧嘅需要，普通小朋友好少要經歷呢種木人巷嘅洗禮。
5個讚
有錢人私家車/的士出入，時間、體力已慳好多，可以顧到多d野，平凡家庭除非有超人體力先得。
1個讚
A_lcy
15
好可惜，香港家長好多都只係想仔女讀書叻。填鴨教育+家長死谷爛谷，造成好多高分低能。
A_lcy
16
我俾小朋友玩運動嘅心態好簡單，只係想佢身體健康。或者壓力大、唔開心時有一樣興趣令佢感到放鬆。做運動、讀書都講天分，到佢大個時自然有佢嘅路會行，運動員可能係會辛苦d，但後生唔做幾時做？
就算佢選擇咗時間分配喺運動犧牲讀書，都係佢嘅決定。讀書好=將來好只係父母嘅想法，人生唔係只靠錢、事業嚟肯定。
有人夢想係用嚟妄想，有人去實現，結果未必會成功，但過程中一定有得著。
A_lcy
18
做父母一定心痛，唔想見到。
但如果佢堅持行呢條路，唔通佢寧願脫離父子關係都唔理佢咩？咁我揀支持佢。
1個讚
咁個家長極端左啲，而家做運動又唔係做運動員，學下對身體都好啲。
但平心而論，運動有天分，讀書無咁叻唔出奇，因為香港讀書主要靠記憶力，但做運動用嘅係腦另一啲部分，例如平衡，肌力，咁人無完美,一部分叻，另一部分差啲好正常，至於音樂，又係係香港變到靠記憶操練，所以好似音樂叻讀書就叻
