該名港女於Dcard討論區發文，分享中秋節當日到男友家晚飯的不快經歷。她指當晚男友媽媽下廚，晚飯前便與親戚們一同「打機」等候，其中1名長輩見她一直站著，便友善地讓出部份梳化位置。沒想到男友媽媽看到便立即大喝：「企起身！做咩啊你𠵱家？當呢度自己屋企啊？外人坐返圓櫈！」
港女指當下「好hurt」，認為自己沒有做出失禮的行為，惟尊重起見仍即時站起，但男友媽媽仍繼續大罵：「嚟到我哋屋企都唔識主動幫手，一嚟就喺度玩，一啲貢獻都冇！」她續指，當晚男友媽媽無論在食飯或聊天期間也對她「眼超超」，而目擊一切的男友卻沒有任何反應，「第一個出嚟幫我嘅，竟然係讓梳化畀我嘅姨姨」。
當晚的經歷令她非常難過，直言不明白為何男友媽媽要刻意強調她是外人，「大好中秋節團團圓圓搞到咁，我都真係唔知可以點算」。她又指對方的難聽說話已深深印在她腦海中，擔心日後不懂如何面對對方，甚至影響到她與男友的關係，「咁小事佢媽媽都已經鬧得咁狠，真係唔知以後可以點相處落去」。
不少網民也對樓主的經歷感震驚，認為男友媽媽的說話非常過份，「呢家人好衰，戥你唔抵你又冇做錯。樓主你要記住你都係你屋企人嘅寶貝女，唔好咁委屈自己」、「一嚟地位就咁唔平等，你第日繼續行落去一定俾佢阿媽整到抑鬱」。
亦有不少網民指出，事件中最大責任的是看到一切仍毫無反應的樓主男友，「無論你有冇錯都好，你男朋友呢個時候仲唔出句聲，我真係建議你有咁快走咁快」、「當刻佢即時冇護航，任由自己親人去侮辱你，你喺佢心目中嘅地位可想而知，就算佢尊重屋企人，都唔可以攞你當作犧牲品」。
5個讚
過門都係客，叫個客人入廚房幫手？個阿媽都痴痴地喎，都唔知係邊個唔識禮貌
條仔仲可以一句嘢都唔講，比著係我飯都唔食直接同呢條仔say goodbye，無將來真係唔好嘥大家時間
20個讚
我又咁睇，既然係外人，做咩中秋節去人哋屋企食飯？
既然去得人哋屋企食飯，扮吓樣都問下使唔使幫手。 通常D阿媽都會話唔使。
唔係話假，呢啲係禮貌。(可能你哋會覺得我老土)。
4個讚
其實…我同你睇法類似
個阿媽的確係講得難聽
但上得人屋企食飯無論對方係邊個禮貌上都應該問下要唔要幫手
更何況係男朋友屋企
雖然通常屋主聽完都會叫個客坐低玩
但有問呢一下就好影響個印象分
尤其係第一次見
所以我覺得2個都有做得唔好嘅地方
1個讚
個女仔又唔醒， 係咪都要幫吓手。
呢個阿媽對阿仔女朋友有要求， 會擺款個種。 有d 阿媽就唔會，就萛會都會唔出聲，後話再嘈阿仔。
條仔好廢囉，係咪媽寶黎咖。
第一次見面印象分好重要。
如果入門後， 呢個奶奶幾係野
1個讚
我細佬咁多個女友，
中秋節都會買月餅或其他餅的禮物比我媽咪，
會唔會覺得女仔唔識做人。
男仔阿媽確係過份咗。
如果我係個女仔，一定速速分手。見到個阿媽係咁，男朋友又冇反應，以後都應該難相處。
4個讚
完全同意。
我成日覺得，一日未嫁(或者開始談婚論嫁), 中秋，冬至，團年呢啲飯局，女仔都係唔好出席。平時食吓飯冇問題。
如果男方阿媽叫到，就做足禮數，冇謂俾人唔好印象。
3個讚
雖然個女仔冇做足禮數在先比位人入，但係身為長輩嘅男友阿媽咁跳掣，男友都唔出聲，應該都係裙腳仔嚟㗎啦
除非個女突然間被發現係億萬富翁失散多年嘅親生女，如果唔係嫁入呢家人都注定冇運行，不如早啲分手好過啦
2個讚
