小朋友郁手，工人唔同我講

自由講場
1

我仔3歲
對其他人從來唔會郁手
但近呢2個月成日對工人姐姐郁手
通常係工人姐姐叫佢做d野
佢唔想,姐姐再捉佢,發脾氣時就會用手拍姐姐一下
一開始出現呢個問題,我好緊張好重視
罰企/罰鎖起所有玩具/大鬧/唔理佢/講道理/每日獎罰/洗腦
所有野都有做
佢次次都知衰,會同姐姐道歉
我仲比埋工人姐姐專屬coins,每日乖就有1個,夠x個就可以有獎勵
工人姐姐比唔比coin佢我從不干涉
因為想佢知工人姐姐可以話事,唔係淨係父母
而我每日一返到屋企就會問姐姐佢今日有無曳
姐姐話有既話我會即刻罰佢,佢係驚我罰既
近一個月姐姐大部分時間都話佢乖
我以為終於成功啦
點知我今日無意發現,佢原來有時仲係會起手想打,但姐姐會避佢等佢打唔中
咁佢打唔中,姐姐就覺得打唔中=無曳=乖
原來成個月黎佢同我報告既乖都係咁既意思…
我真係頭都大埋,咁我咪仲讚左佢呢d打唔中既行為?
我叫過好多次工人姐姐要認真stop佢
但就算我仔郁手佢都仲係笑笑口,半點不滿都無表達出黎
我仔對其他所有人都唔會咁,
係學校都唔會(老師話佢從來唔郁手)
只對姐姐係咁,仲要唔敢係我面前咁做
如果姐姐唔合作唔同我如實報告,我可以點知佢有無曳再去罰佢?
唔通我日日睇返個cam?
乜都做哂,但好有隔山打牛既感覺
到底我可以點做,好大壓力好depressed

P.S.我係working mum
小朋友同姐姐關係麻麻

2

佢應該係恰姐姐？

1個讚
3

我覺得係
但我姐姐某程度上好似包庇緊佢咁
如果佢乜都唔同我講
我應該點做…

1個讚
4

細路仔睇穿姐姐只係打工嘅角色

要令細路心服口服，要睇下其他會員有冇idea

5

我地對姐姐一直都好好
唔會呼喝
我仲特登比玩具coins姐姐等佢每日派比我仔
想佢知道姐姐都係話事人
諗左成晚，唔知仲有咩方法 :pensive:

1個讚
6

你工人唔敢話事(性格問題), 唯有每日放工問詳細啲，好具體咁問小朋友嘅行為。

員工性格話唔到事，僱主唯有睇緊啲。

2個讚
7

小朋友唔鐘意工人姐姐？小朋友每個行為都代表佢有心事，唔識點講，唯有你幫佢講。可以問吓：你鐘意佢照顧你？唔鐘意佢煮野食俾你？唔鐘意佢唔陪你玩？
定其實佢掛住你，唔想朝早只有工人姐姐？

可以同佢傾下計，了解左小朋友點諗先

8

我都只有可以咁,希望佢會誠實答我

9

平時如果得佢同姐姐係屋企
佢會同姐姐玩,相處都ok
姐姐都對佢好
但只要我同老公係屋企,佢就好抗拒姐姐
但問佢又話鍾意姐姐

10

小朋友好醒架，知工人唔同地位。

我女由出世到6歲都同一姐姐湊，兩個關係好到不得了，可以又攬又錫，姐姐當自己半個阿媽咁有曳行為會鬧會教佢。但到某啲位，阿女「條氣唔順」，都曾經講過 “you are only a helper”, 姐姐有啲唔開心都會同我哋講返。我有好嚴肅同阿女講要尊重姐姐。但除咗咁其實某程度上阿女冇講錯，佢知工人都係受薪照顧佢，自己係「小主人」， 心態係唔一樣，我亦冇可能要求佢當姐姐真係長輩咁尊重（咁做亦有風險），只可以打感情牌叫佢注意語氣態度唔可以令姐姐難受。

當然你仔會打工人，似乎係將自己「小主人」心態放得太大。要教小朋友尊重唔係咁易，不過我覺得呢個係問題所在。

1個讚
11

我成日都話你咁樣姐姐會唔開心,會痛
佢聽完都明,會內疚
但過幾日又會再做
其實佢係知衰,扭計個時起手好快打左落去
我即刻好嚴肅望住佢,佢會即刻唔敢郁/扮呵返姐姐
我教佢要好好地講,唔可以郁手
但就成日手快過口
好灰心,教極都係咁 :sob:

12

3歲仲好細個,會郁手郁腳好正常
例如你會留意到幼稚園生經常會推推撞撞,
小學生會少啲但都有,但正常去到中學就好少,除非特登打架
所以你仔仔打人,只係佢有情緒但唔識講,所以以手腳去表達,係好常見的

如果你過度反應,有機會令佢覺得你唔俾佢表達,到你唔喺度嗰陣,壓抑咗嘅情緒會一次過爆發,即係打得仲勁
所以見到佢或者姐姐話你知佢打人,應該話先了解佢經歷咗啲咩事情同情緒,然後再引導佢用一啲正確嘅表達方式

當然唔好expect教幾次就識,因為負責控制嘅大腦前庭仲係發展階段,一直去到成年先會穩定落嚟,但如果你有耐心咁教,教幾十次,應該慢慢會好啲架啦

仲有大前提係屋企唔好用體罰,被體罰嘅小朋友會以為打人係解決方法,咁就好難教

13

多謝你既意見
我地都從來唔體罰,因為以佢性格一定會學
我一開始都會跳哂掣咁鬧
但開始覺得鬧無用,同埋怕佢學我咁暴燥
所以我而家係會好冷靜帶佢行埋一邊
好冷靜問佢發生咩事
佢通常會答我佢嬲/姐姐唔比佢做xx
我會教佢嬲可以打cushion發洩,唔可以打人
你想要多d時間,可以叫姐姐set timer
但timer一響你就要乖乖去做你要做既野
道理講完就要罰企
企完要佢去同姐姐道歉
而玩具亦會鎖起直至行為好轉先解封
我不斷重覆重覆咁講/做
唔知幾時先可以完全改好呢個壞習慣 :sob:

14

如果要做嘅嘢做咗,咁剩下嘅就係等待
小朋友發展有階段,要好好咁自我控制最早都要小學,有啲去到高小先會好啲
當然身教都好重要

多用鼓勵,即係有時佢控制到情緒就讚
日子有功就會睇到成效

要對自己同小朋友有信心
好媽媽係會教出好孩子
識得上BD,又識得問嘢,又識反省
你一定係個好媽媽,放心

15

多謝你鼓勵
睇到我眼濕濕 :sob:
我係超心急+緊張型媽媽
有幾次擔心到自己呢埋喊出黎/飯都無心機食 :sob:
成日見到人地話教左一次之後小朋友就無再犯過
我又會好緊張,點解我個教咁多次都仲係咁
好擔心自己唔識教/有d位做得唔好
我而家都盡量佢一做得好就讚到超浮誇
逼自己比多d耐性佢

1個讚
16

幾乎肯定係吹水，唔駛太認真理呢啲人，3歲好少教一次就搞掂

17

我都肯定啲人吹水，我有二個，加埋身邊啲朋友，無可能教一次就唔再犯
所以你都要調整自己心態，有時人地講野聽下算，就算係真，每個小朋友唔一樣，你盡左力，唔得就教到得

18

明白
多謝你
最緊要做好自己
對其他人既說話唔好咁上心
我會好好學習

19

唔會㗎，3歲仲好細，不如你諗吓動手嘅行為其實係好正常，佢哋手、腳一定快過個腦，當然大人一定要教，到佢識得控制係以年計，甚至係「乖」咗一排，無端端某日又郁手。
其實你肯同佢講，佢識得內疚、道歉已經唔錯，再不停同佢洗腦，有一日佢大個會明白。

20

多謝你
我好似見到d希望
係我對佢要求太高,成日接受唔到錯誤
我都要好好學習,改變自己心態