先由一種回收物做去，覺得自己時間空間應付到，就再做下一樣。
-
鋁罐
鋁回收率達9成幾，有價易回收，多人爭著要，所以最值得做。
飲完我會叫小朋友洗乾淨鋁罐，按扁反轉放廁所。第二朝我裝佢放入專門膠袋。每次落街就攞去樓下回收。 -
紙
下一個可以試既係紙，有價有市，一般屋苑回收都唔會入亂丟，有時甚至有婆婆去收。
我有個專門既A4 folder裝廢紙放書房，另一個裝單面紙。單面紙會reuse, 廢紙滿左就攞樓下。
留意有膠面既紙唔可以回收，例如信封。
-
紙包盒
我特別重視紙包飲品盒回收，因為我去過廠房參觀，負責人真係有心做，佢亦講我知邊度既回收佢地真係會收到。
我有個掛廚房既膠袋，專放紙包飲品盒。每次有盒，就剪開洗淨晾乾，乾左就放袋，然後一星期去一次回收點。
留意一定要剪開，乾淨，無水，不然變壞左，同箱既紙盒會全部唔用得。 -
乾淨膠，乾淨玻璃
如果成功挑戰3，可以試下回收乾淨膠和玻璃。但記得要送去綠在區區先可信，佢地每星期會係唔同地方設流動站，去佢地fb睇下邊個近屋企啦。
污糟或招紙黐著既難度太高，這關先唔處理，直丟垃圾桶。膠既記得睇下咩number，無number既呢關都唔處理著。處理錯左，反而增加回收成本，好心做壞事。
我有個紙箱裝玻璃和膠，每星期就會按膠號分裝入唔同膠袋，袋上寫著膠號，然後攞去綠在區區回收。
- 成功挑戰4後，你會大致分到膠號：有d無寫號，但寫著PP既，你都會知係咩號啦。你又會發現零食袋係回收唔到，唔需要搵號碼啦。然後你會買少左野，又知道咩牌子易D回收買多D，因為分類都幾多功夫。
如果你仲有時間心力，就可以處理污糟玻璃和膠，每次用完洗乾淨，撕埋招紙。
