上年第一次出文, 係因為發現老公出軌, 好想喺度發洩一下自己既情緒, 當時佢想離婚但又唔敢提出, 要我做衰人講出口先。當初我真係完全接受唔到呢個事實, 一直麻醉自己, 同自己講, 可以修補到既, 一拖就拖左一年啦! 我唔想離婚, 佢就一直係我同第三者兩個人之間互相隱瞞, 喺呢一年裡面, 經歷咗無數次既傷心, 失望, 絕望, 佢既大話一個接住一個, 佢個心完全無視我既存在, 所有嘢我都一一承受晒。
去到今年4 月就係轉捩點, 我終於都清醒過來, 明白到一個人唔再愛你, 其實點樣做, 做啲咩都唔會有任何幫助, 於是狠心地喺5 月既時候, 同佢講返清楚, 我決定要離婚! 雖然而家未正式結束關係, 但係我好慶幸, 靠自己可以捱過去。
而家, 我好幸運地遇到一個愛錫我, 愛錫我個仔既人, 之前一直都無諗過會唔會可以再接受其他人, 雖然經歷過婚姻失敗, 但我仍然相信愛情, 係對既人, 就一定可以一生一世。
有時喺呢度都見過有JM post 老公出軌, 偷食既文, 好想同你哋分享一下, 唔開心, 唔捨得, 唔甘心呢啲感覺我都曾經會有, 但千祈唔好太過執著要捉住一段關係, 有時放開了, 你先會得到更值得你去付出既人, 共勉之~~
祝你生活越嚟越好
