從阿女換門牙開始牙醫已經預計好大機會日後要箍牙，無論牙科保健及屋企樓下個普通牙醫都建議換曬牙先整。
記得早2年有個女仔係學校嘅小食部買牛丸食哽死左，當時已經千叮萬囑阿女要咬開細細舊黎食，但阿女都係經常大大舊放入口食，依家諗返起真係好內疚，實情唔係佢唔想咬開細細舊食，而係佢咬唔到或好困難先可以用上下門牙咬開食物。直到上年佢上排D牙哨得越來越嚴重我先發現佢咬合有問題，但因為當時疫情嚴重同埋要考呈分試而決定考曬呈分試再算。
幸運地3月尾收到自行嘅中學錄取通知，即時預約經親友介紹嘅矯齒專科牙醫，期間仲搵多個有免費諮詢嘅牙醫。4月尾先見免費諮詢醫生，照左x光及3D scan 醫生講出阿女下顎後縮生長比較慢，上顎基本正常，只係門牙因為之前上顎唔夠位所以向外生變左哨牙，醫生俾左治療方案，分2個階段，先激發下顎生長，控制上顎，之後再箍牙，因為當日係隱適美嘅諮詢日，而本人覺得隱適美唔太適合阿女，所以聽完就走。
5月頭見矯齒醫生，照完x光加影左D相，醫生就同我地講阿女牙齒問題，基本上同之前嘅醫生一樣，另外仲發現阿女中線唔對及有大細面，治療方案都係差唔多，只係用嘅方法唔同，分2個階段，先矯正上下顎骨生長再箍牙。可能今次要俾錢（而且幾貴），所以中間好詳細講左治療嘅方法同依家係合適時機，因為阿女11歲未黎M，話黎M前後生長速度最快，而且阿女只有一隻乳齒未甩，亦有好多過往用同樣方法矯正上下顎骨照片比對。
雖然整個治療比之前的醫生報價差唔多貴一倍，但我同太太都覺得專科應該穩陣啲，所以即時答應左，即俾笫一期錢，之後每個月覆診再慢慢俾。
第一階段先做牙模，再做一個牙膠，配合一個叫headgear 嘅頭套一齊用，因為帶左會講唔到野，所以只需要訓覺同係屋企得閒帶就可以，為期一年。
等左一個星期再返去拎牙膠順便洗牙，阿女嘅矯齒生涯正式開始。
5月13號開始只係2星期，阿女話帶耐左會唔舒服，上顎會好攰，下顎門牙後面D牙肉會痛，試過幾次訓醒條headgear 唔知點解會甩咗，下個月覆診會問下醫生。
下面有啲相分享一下，定期更新進度，另外醫生就不作介紹了，始終阿女岩岩先開始，好唔好都未知
X光片，醫生話上下牙齒相距11mm，算係嚴重嘅
刷牙唔夠乾淨
左右面唔對稱
Headgear 同牙膠
訓覺帶左就係咁嘅樣
