【學校做所有決定背後嘅思考過程】
發現網絡上有一種說法：學校只係想你死，唔會教好你。
咁諗就大錯特錯啦。學校邊得閒諗點鋤死你？
學校只係唔想孭鑊。
教書最緊要係教晒考試範圍寫咗嘅嘢，理得你小朋友其實明唔明。上堂搞活動又係叫教咗，開個 PowerPoint 出嚟讀晒佢又係叫教咗。
你個仔話考試啲嘢無教過？你去問下其他同學仔啦！全部都見過個 PowerPoint，邊有可能無教過？無鑊要孭我出返去先啦！
攞住同一個原因，有學校甚至會唔俾老師自己搞多啲課室活動，要全級都要讀同一個 PowerPoint。「唔統一就會有家長投訴唔公平㗎啦！到時邊個孭鑊？」
你以為小朋友放小息有得玩，老師有得抖？一打鐘，幾個老師每人攞住疊簿衝入嚟，逐個嗌名出嚟改正，重改，你無做功課就成版做返，你唔肯做就鬧到你做。
係鬧到喊晒㗎！但係小朋友日日上堂都俾人鬧㗎啦！鬧人無鑊孭㗎嘛！
啲簿改得唔好，查完簿話我做得差，係我無得升職，係我俾科主任同老細鬧呀！你唔改好正，到時你入老細房 (校長室)，幫我孭鑊呀！
你以為老細好得閒？佢要 chur 老師寫各部門 report，無寫的話，教育局、校董 (i.e. 佢老細們) 嚟到，佢就要同你一齊孭鑊。
每一間學校嘅操作同決定，尋根究底，都係想避免孭鑊 (問責)。無話咁諗係好定唔好，睇下更多避免孭鑊而出現嘅真實對白就會明：
「考試點都要考返啲書裡面有嘅嘢，題目唔可以出到有模棱兩可，唔係家長就會有位入。」
「考試範圍出錯，教漏書事小；你放學放錯咗個學生搞到佢失蹤咗事大。你點賠返個仔俾人？」
「小息一定要俾飲水食嘢去廁所，人權嚟；小朋友話俾家長知，講啲又唔講啲，隨時告到你甩褲都似。」
「上堂一定要準時到課室，唔係課室無大人嗰段時間發生嘅任何事，有咩鑊你都要孭晒。」
／
「避免孭鑊」嘅 mindset，係好事定壞事，係由「做啲咩事需要孭鑊」決定。
邊個決定咩事要孭鑊？你估老師有得決定咩？全部人都係打份工，都係聽老細話。決定嘅人，係老細嘅老細 － 即係教育局，同埋家長你地。
「家校合作」唔單止係對學校 friendly，仲要俾意見，話俾學校知其實你想要啲咩。
唔係喺意見書度填篇文俾老師睇 (真係見過有人以為寫一篇話「功課應該少啲」嘅文喺問卷度，再 po 上網就會有用)，亦都唔係要凡事搞對抗蠻不講理，而係話俾學校知實際應該做啲咩，俾學校知同校有其他家長有同樣諗法，令到學校避免孭鑊之後，做出嚟嘅嘢係正常同 make sense 。
「邊會個個有時間跟埋呢啲嘢呀？」
咁老師都無咩時間㗎渣。平時都已經7點先收得工，仲要帶埋簿返屋企改，你唔跟進我又無鑊要孭，得鬼閒理你。
原 post： https://www.facebook.com/108771457588947/posts/224180032714755/