39歲嘅袁偉豪（Benjamin）當年以大熱姿態成為港男冠軍，本來出名有樣有身材既佢，早前出席《萬千星輝頒獎典禮2020》後被網民狠批佢婚後走樣。網民仲喺討論區開POST問「袁偉豪個樣發生咩事」, 之後袁偉豪出千字文反擊網民。之後，佢上麥玲玲主持嘅節目《Master’s Talk 師父有請》又話睇嗰啲新聞有唔開心，亦有唔舒服，多多少少影響到佢嘅情緒。佢又強調自己有好大壓力, 佢都要搵錢供層樓，又要keep好個樣出嚟，點知又畀網民話面膠及醜男。
袁偉豪好似對網民嘲笑一事好上心, 日前喺於社交網上載半裸腹肌相片，大騷fit爆身型。佢似乎已經狀態回勇，相中嘅佢成塊面尖晒，兼有麒麟臂和六嚿腹肌。佢Hashtag表示「#農曆新年食多兩餐都仲keep到還未到六神合體」。老婆張寶兒當然有留言耍花槍，留言話「不要讓別人無地自容吧！」，而林子善大讚：「你呢啲就係叫好基因，話咁快fit返晒」。點知袁偉豪竟然回覆話：「但係我樣咁老，咁醜有鬼用咩。」
