都係唔好睇留言好d
有d離題同負面
https://m.facebook.com/story.php?story_fbid=264374888520171&id=110727667218228&fs=1&focus_composer=0
【我都唔想慣！可以點反抗？】
強制檢測、電話咭實名登記、封區、大搜捕…每日都有新鮮事，但每一樣我哋都阻止唔到。大家都知唔應該慣，心裡都好想反抗，但無力感好重。喺迷茫之中，或者我哋可以透過學習前人嘅思想，從歷史經驗中找尋出路。
『無權力者的權力』
生於共產極權時代嘅捷克劇作家、思想家哈維爾認為現代極權唔可能只靠武力去維持高壓統治，而係透過灌輸意識形態去令人民心願誠服咁支持極權。喺《無權力者的權力》中，哈維爾認為人民喺面對極權時應該抱住「活在真實中」嘅心態，去對抗意識形態。佢提出咗一個經典例子：
從前有個雜貨店老闆喺店內貼上政權所派發嘅「全球無產階級聯結起來」標語，其他老闆驚俾政權盯上，於是跟住貼。然而，老闆們心中未必支持標語嘅內容，甚至根本唔知標語嘅意思，只係盲目服從呢種「表忠」嘅儀式。當時捷克正處於鐵幕管治，每個人都怕踩中紅線，生活喺謊言同惶恐之中。呢種服從行為看似無傷大雅，但無意中協助政權落實意識形態，製造全民支持政權嘅假象，慢慢蠶食反抗意識。
『活在真實中』
如今香港人喺日常中都會面對類似問題，喺忠於自己同附和極權之間掙扎，例如會唔會自我審查言論、做唔做檢測、宣唔宣誓等等。每個人嘅負擔都唔同，正面反抗往往要付出巨大代價，亦未必成功，咁我哋應該用咩心態應對？哈維爾提出嘅「活在真實中」係一種反抗心態，我哋應該按個人嘅承受能力（無需同其他人比較），選擇一種不服從嘅應對方法。例如我哋可以選擇唔做自願檢測、杯葛安心出行，就好似雜貨店老闆都可以選擇將標語歪啲。哪怕只係微小嘅行動，當唔係所有人都無條件服從，反抗者就唔會被孤立，改變就會慢慢發生。
哈維爾認為再嚴密嘅極權管治，當中總有空隙，喺日常細節中總有空間反抗。喺後國安法年代，我哋好難再直接政治表態，但唔代表要完全滅聲。例如我哋可以戴黃色口罩、喺演唱會入面嗌句「香港人！加油！」、喺交通工具上貼文宣等等。一點一滴嘅行動能夠鼓勵同路人繼續反抗，撕破國安法後已經止暴制亂嘅假象，呈現香港人仍會繼續反抗嘅真實。
電影《十年》裡面《本地蛋》有一段講到少年軍去書店掟蛋。當身邊嘅人都無條件服從政權嘅命令，去逼害違規嘅書店。主角明仔身為少年軍一員，佢冇跟住一齊掟蛋，因為佢記得老豆叮囑過佢唔好人云亦云、盲目服從，要堅信賣本地蛋係冇錯。呢種不服從嘅心態正正體現咗「活在真實中」嘅精神。
『埋下反抗種子』
「活在真實中」雖然冇乜即時成效，阻止唔到制度壓迫。但呢種不認命、不服從嘅心態，係所有抗爭嘅先決條件，令公民社會嘅土壤不受專政完全控制。當人民意識到唔係咁多人支持極權，就會慢慢組織行動，革命先有可能發生。自布拉格之春(1968)被武力鎮壓後，捷克人民之後三十年都活喺無力感之中。當時好多人恥笑哈維爾嘅「活在真實中」係冇用，只係自我安慰。但當時機來臨，「活在真實中」埋下嘅種子就造就咗天鵝絨革命(1989)，成功推翻共產政權，哈維爾仲成為咗捷克第一任民選總統。
正如《本地蛋》尾二句對白：「其實邊有得禁㗎。」只要人民選擇活喺真實之中，再強橫嘅極權都唔能夠禁絕我哋嘅思想。唔一定下下都轟轟烈烈先算反抗，即使短期內有好多荒謬嘅嘢都阻止唔到，但只要我哋把握每一個微小嘅反抗空間，唔好習慣活喺極權嘅謊言之中，磊落真誠咁喺自己相信嘅領域繼續耕耘，終會迎來春天。
—————————————
想繼續睇多啲本土抗爭論述？Follow我哋嘅：
【Facebook】Gear噏
【Instagram】gearup_hongkong
【Telegram】gearup_hongkong
#Gear噏 #gearup_hongkong #香港人 #活在真實中 #無權力者的權力 #哈維爾 #本地蛋