【擴疫一周年，弊到封區，陰謀論愈來愈理據】
想講「同心擴疫」呢個陰謀論。
屋企附近可以遙望被封鎖嘅佐敦及油麻地「小區」，
(政府正式文件都「小區、小區」，呢個大陸制度幾時嚟咗香港？)
佐敦封區後，官員開晒口，話下次封區會封得更好，
果然，尋晚就封到近果欄一帶，更接近我屋企。
我都有去親臨電影場面，感受荒謬氣氛。
大家都知封區唔封關，
封嚟有乜用？
唔講咁遠，睇隔籬澳門，遠啲嘅台灣，
封關做得好，香港會搞到而家咁大鑊嗎？
武肺一周年，香港疫情越演越烈。
越嚟越認為，
以特首為首嘅一班高官未必咁蠢咁無能，
唔係唔明封關有用嘅道理，
而係故意唔做好封關，「同心擴疫」。
「同心擴疫」呢個大計，特首同高官唔使開會夾定嘅，互相心照啦。
過去一年以嚟，瘟疫不斷，政權以防疫為名，押後立法會選舉，
之後DQ立法會參選者、DQ立法會議員，
不斷政治拘捕兼起訴，政治情況不斷惡化，
政權就以限聚令 ＋ 國安法，鎮壓反抗。
限聚令好用呀，錢大媽派菜，成街排隊，冇事，
建制派去美國領事館示威，又冇事，
兩個人一組派公民權利傳單，就計埋隔籬街派緊果兩個，
發你四張告票，唔理你相距 1.5 米，定係 1.5里。
前幾日幾個警察欺負孕婦，搞到佢幾乎早產，
屋企人嚟到鳴不平，有個警員警告佢：「妳戴返好個口罩！」
言下之意就係準備票控。
瘟疫，幾咁好使好用。
「同心擴疫」，特首同高官心照，
開會好似好認真咁抗疫，但係點都要留返啲穿窿位，
唔係點「擴疫」呢？
記得舊年有一排有連日零確診，大陸叫「清零」，
間中又有個位數字確診。
後來有醫護朋友同我講，話當時衛生署夾硬都要將一啲假陰假陽個案推落去醫院，屈做初步確診, 似乎係唔俾「清零」出現，要武肺永續，我當時都半信半疑。
睇埋封區單嘢，搞場大龍鳳，又事先張揚，
雞飛狗走，三百多戶人去樓空，簡直激發播毒。
打草必驚蛇, 咁簡單嘅道理,
高官真心唔曉? 定真係做嘢甩漏?
真膠? 假膠?
「小區、小區」，係呀，大陸係會封「小區」架，
香港經歷多啲，遲下就慣，慣咗服從強權架啦。
唔「擴疫」，又點有機會繼續封鎖「小區」呢？
政府高官點苦口婆心都好,
經過 2019 , 經過 2020,
咁多搵老襯事件,
唔好怪人諗你有陰謀。
對於特首及一眾高官，
佢哋唔係真係要消滅瘟疫，而係要玩權力遊戲，
一邊消滅異見，一邊向北望，
你話佢騎虎難下又好，話佢甘為奴才又好，
總之要擴疫, 唔要抗疫。
香港不乏優秀人才，高官就將真正專家貶稱為「所謂專家」，
香港人自救抗疫，高官就設法喺海路陸路打開缺口，放毒入港。
777 任期正在倒數，有建制人士指責佢抗疫不力、無能，信錯佢幾年 (真係笑死冇命賠)。
777 係過期 CONDOM，收皮在即，做埋個任期就算，話之你死，
憑佢往績，你都咪使旨意佢有乜好事做到出嚟。
但畢竟佢仲係香港市長，都要向中央交代，
而家只有靠「擴疫」穩住個局面。
趨炎附勢果班奶共人士逢迎上意，知 777 係棄子，
準備迎接新接班人，就插你 777 抗疫無能，製造輿論囉。
777 都冇乜得揀，佢都招數無多，冇計啦，
唯有使出「擴疫」雙刃劍，
一面搞到佢自己俾人插，
一面俾藉口佢自己做嘢，搞封區、搞限聚，
總之搵啲可以向北京交差，又可以調校蟻民嘅嘢嚟搞。
擴疫之下, 佢維穩, 你找數,
搞到百業蕭條，員工減薪、企業裁員 / 倒閉持續，更加深擴大。
見你好似咁慘，政府就推出所謂「保就業」, 話俾你吊下咸水, 氹下你，其實當中向財團輸送大量利益。取悅緊邊個？漠視緊邊一班？
做緊嘢、做緊嘢…
幫緊你、幫緊你…
小說《1984》裡面，三個獨裁政權互相攻伐，
其實大家有晒默契, 只係打假波, 打消耗戰,
話之百姓做炮灰, 冇飯食,
總之永遠唔會戰勝對手，
只係想永續戰爭, 持續統治。
同樣道理, 現實暴政就永續武肺，不斷擴疫。
極權邏輯, 都係咁上下。
好陰謀, 好陰毒,
信焉?
