呻!
老公開公司, 我幫佢做會計同所有打雜。
老公幾十年都係做上司, 只有佢鬧人, 無人敢鬧佢, 包括佢以前d老闆。
依家幫佢打工, 我就成日受佢氣。佢講得唔清楚, 問多句都黑面, 唔問而做錯又俾佢黑面。唔緊張佢公司就唔會問咁多, 由得d 數錯啦!
琴晚佢同人講一d會計數, 我俾意見(否則d數會亂), 佢又黑面。過一陣佢道歉, 我正想講我感受佢又再發脾氣, 我忍無可忍講句"成日突然發脾氣, 我問或講句都嬲, 同你打工真係好辛苦", 我就入房瞓。佢就成晚自己瞓梳化, 黑面到依家。明明係佢發脾氣在先, 反而怪我嬲佢。
每次都話以後唔會咁, 但仍然不斷repeat。我試過要求辭職, 出去搵工, 以免因公司破壞婚姻, 但佢唔俾。我自己打定輸數, 遲早一日我核爆, 掉低封辭職信就搬返娘家。
每次同朋友呻, 佢哋都覺得係小事, 話"我日日都俾老公鬧㗎啦!" 但我想講, 你忍受到一段成日俾人鬧嘅婚姻, 我忍受唔到。
有得唔比？你仲打算第時比辭職信佢？
我唔會想24小時都係咁對住
好可怕既言論
嫁俾我老公十幾年，佢連大聲啲話我都唔夠五次，仲要話完我後每次都俾我嬲佢好幾日
兩公婆真係唔好一齊工作
點解仲要忍？
一係辭職一係離婚一係佢改吓脾氣
我覺得你要解決呢個問題，一係繼續做，同你老公好好溝通，或者淡化角色做少啲避佢，一係就唔好做
我父母就係咁，細個睇住佢哋鬧交咁多年，最後邊個都原諒唔到對方
我明有啲位你想出聲提佢，唔想睇住佢瀨嘢，但係佢唔領情，好多男人唔鐘意人咁多意見，尤其你嗰個大脾氣，我父母exac7ly就係咁嘅情況
鬧人還鬧人，但呢個唔係普通人，係老婆！
我認為唔可以接受！
講就講左，今次要企硬，唔係日日比人鬧到隻狗仲得了？
你有無同佢好清楚講，辭識唔再做，因為唔想工作日日受你氣搞到感情關係差而離婚。
佢咩老闆咁巴閉？上市呀？跨國企業呀？Bill Gates 定李嘉誠呀？做個老闆就向所有人發脾氣
有本事就唔使老婆幫手囉
以佢脾氣, 我堅持辭職等同要求離婚, 因為佢覺得我唔幫佢打江山
其實好多人講過兩公婆真係唔好一齊工作, 但見住佢資金唔夠請人(亦唔信外人管數), 作為老婆幫到就幫
其實對上一次我已經企硬咗兩日, 要佢真誠道歉, 要佢清楚明白佢個問題有幾hurt段婚姻, 佢亦應承無下次, 但依然不斷repeat, 只係我每次都提佢"你又燥咩呀?", 佢自動㩒返低把火, 可惜今次佢㩒完, 我一講返我嬲咩, 佢又開始扯火, 仲火到依家。
今次因為唔提佢, 就我瀨屎, 盤數亂咗要我執手尾
一係唔撈
一係當場就還拖爆返佢
無可能係佢錯都繼續硬食架，佢係老闆，咁你都係老闆娘，大家咁高咁大啫
今次有爆返佢, 所以佢覺得係我錯, 唔應該嬲佢。
我今日有公事同佢講過兩句, 但佢無應我, 佢仲自己煮晏晝無理我, 所以我專登唔煮晚飯, 佢問我今晚食咩, 我話我唔食, 企硬要佢認錯先理佢, 佢就嬲到自己煮, 依家揸埋車出去。
我msg佢話:
當一個人講咩說話都令你煩厭, 甚至無名火起, 你討厭嘅已經唔係佢嘅說話, 而係討厭佢依個人。你諗清楚係咪已經討厭我, 係嘅話我可以走。
佢已讀不回。咁算好㗎啦, 以前係會鬧返我轉頭。
你應該即刻book番晚酒店瞓，唔好理佢，睇下佢緊唔緊張你，會唔會搵你。
好唔成熟，作為一個老闆唔應該咁樣。。。
俾啲時間佢消化下
或者好似你咁講，佢以前會鬧返你、依加無，都叫做進步左，可能佢都反省緊，或者需要啲時間諗下。
兩公婆為左公事而嘈到咁樣真係唔值得，希望你老公快啲意識到自己嘅脾氣
佢只對我發脾氣, 對所有親戚朋友都係好好先生
剛剛返咗嚟, 入房拎電話又出廳, 明顯仲嬲緊