細女出世喇！王祖藍好興奮：個樣唔似我
藝人王祖藍再做爸爸喇！佢喺社交網站宣布細女出世，佢晒出一家四口合照，留言：「三個女人一台戲不要像我就可以，gabby寶貝生日快樂」。相中所見，祖藍負責抱住大女，老婆李亞男抱住細女，一齊向新生命送吻，非常有愛！
祖藍細女英文名叫Hayley，中文名叫王海靜。問到祖藍同亞男第一眼見到Hayley係咪好感動？李亞男笑言：「當我哋第一眼見到Hayley時，係覺得好搞笑同神奇，因為佢同家姐一模一樣樣，見到佢就好似見到啱啱出世嘅家姐咁，實在真係太似樣了；唯一有一點唔同，就係Hayley個鼻好似仲大過家姐咁，係一個大鼻妹嚟，哈哈哈！但好感恩佢係一個好漂亮嘅孩子，好多親友睇咗相後都讚佢好靚女。」祖藍補充：「好感恩佢唔似我，最緊要係個樣唔好似我，似晒媽咪就可以㗎喇。」
問到再生第二胎係咪冇第一胎咁緊張？佢話：「因為有咗第一次嘅經驗，又因為我係開刀，好多嘢都按照住schedule發生，所以今次就真係冇咁緊張同激動，但當然嗰種開心同奇妙嘅感覺依然係非筆墨所能形容。」
