梁文禮、梁釗峰、陳潔靈、谷德昭 & Tim@Dear Jane
ViuTV大型選秀節目《全民造星3》進行得如火如荼，40強喺上星期順利誕生，而噚晚亦已經開始進行第二輪比賽。第二輪比賽就嚟咗陳潔靈（Miss Chan Chan）、谷德昭、梁文禮、梁釗峰及Tim@Dear Jane做評判，當中好耐無喺螢幕出現嘅谷德昭，身型瘦咗勁多、兩鬢花白、仲要連把聲都變埋，真係嚇親唔少觀眾，有網民擔心佢係咪有病。
現年55歲嘅谷德昭，體重最高峰曾重達200磅，但佢喺2015年突然減咗50磅，當時已經令好多人擔心，當時外界有傳佢患上甲狀腺病而暴瘦，不過佢就話係跟營養師指示瘦身。隔咗咁多年，佢罕有現身電視節目，唔知係咪太耐無見，唔少觀眾都覺得佢「瘦到唔同咗樣。」、「完全唔認得」、「唔同咗樣」、「谷生瘦到咁」及「谷德昭瘦咗咁多」等等，更有網民擔心佢係唔係患上大病。
