《全民造星III》截圖
ViuTV大型選秀節目《全民造星3》播出以嚟話題不斷，除咗評審準則不公及參賽者質素之外，監製花姐（黃慧君）嘅鬧人形象亦深入民心。花姐過往出品過唔少人氣ViuTV節目，例如有《慳D啦Honey》、《脱獨工程》及《全民造星》系列等等。早前，花姐就接受香港電台節目《音樂說》訪問，期間講述佢嘅入行經歷 。
1992年入行嘅花姐，用咗一年時間喺無綫極速由電視台助理編導 (PA）升上導演，因為好勝嘅關係, 佢仲曾經被人笑過外貌而將長髮剪短，改變打扮，亦因為佢係女人而質疑佢嘅工作能力低，所以佢改變自己，點知搞到男友差啲同佢提出分手，不過佢最終同男友好返，仲結埋婚生咗兩個仔。佢直言入行咁多年最挫折嘅就係一次擔任《勁歌金曲》導演時，因與節目監製意見不合，之後佢覺得受辱，於是即時辭職。
另外，花姐加入ViuTV後都曾經遇到樽頸位，老闆唔用佢構思真人騷橋，好彩最終俾佢試下做《慳D啦Honey》，節目出街後反應好好。後來到《全民造星》，佢話開頭單純諗住做節目，但後來慢慢俾班參賽者感染到。第一個感動到佢嘅係Jer（柳應廷），佢第一回合就被人淘汰咗，之後喺廠外面喊，花姐咁啱見到，佢覺得自己唔係幫人完成夢想，反而係扼殺咗一啲年輕人嘅夢想。佢覺得節目會傷害到唔少年輕人，所以每季做節目都好大壓力。
