聖誕禮物大家準備好送咩未？每年都總有朋友鍾意挑戰友情底線，於聖誕派對或年尾聚會送上絕交禮物！收禮物者只可以表面歡笑，但暗地裡露出《全民造星III》卓韻芝式「唔好啦」表情。最為人所熟悉的一定有「絕交三寶」，就是杯、相架和護手霜。小編特別準備「10大聖誕絕交禮物排行榜2020」，為您親愛的朋友留下最難忘聖誕禮物或交換禮物回憶！
第10位：公司免費年曆
公司免費年曆用嚟抽獎真係可惡至極，如果是對家公司的年曆更加尷尬。但年曆都叫做可以望日子，有少少用，即管放在絕交禮物第10位。
第9位：古怪溫暖牌頸巾
好多朋友都好鍾意送頸巾做聖誕禮物，尤其唔少係親手織。但如果編織技藝唔係非常好，選色又比較尷尬，真係好難平日會用到。小編曾經收過親手編織頸巾，但佈滿漏針洞，而且朋友可能一路織一路食零食，仲有餅乾碎…但念在都有誠意去準備這份禮物，所以放這款「絕交禮物」在第9位。假如你想再絕交一點，轉贈頸巾，或者純粹送頸巾素材會比較想絕交。如果真係想送頸巾，不如正正經經揀條百搭單色款，唔會浪費亦可以真正保暖。
第8位：好厚勵志書
不少朋友都好喜歡裡送書作為聖誕禮物，期望為大家帶來正能量，但其實各人睇書口味不同，有時收到唔適合自己睇嘅書，除咗擺係屋企封塵，亦都浪費作者心血。與其送一本未必啱睇嘅書，不如試下轉送Google Play禮品碼，等朋友自由挑選電子書，更加實用又達到分享閱讀樂趣目的！
但若果你個聖誕禮物主題是真的要絕交的話，小編見識過有朋友突登到博物館拿下了一本非常厚的資料參考，是免費拿取的放心，再用來做「絕交禮物」。小編認為這是一份有花時間去準備的絕交禮物，所以將其絕交排行放至第8位。
第7位：尷尬印樣淘寶訂製抱枕
唔係講笑，小編真係收過淘寶訂製抱枕，而且朋友喺小編Facebook帳戶下載自拍照，再加上騎呢長輩圖設計，尷尬程度比收印相水杯更甚，因為抱枕體積大，印相又帶有低像素模糊感，無論擺係屋企定係辦公室都引起強烈恥笑，最後只好擺放雜物房，從此不復相見。想玩命的話，淘寶更有高清訂製抱枕，月銷量高達1.5萬質素有保證，一齊認真挑戰絕交禮物底線。
第6位：奇怪當有趣禮物
網上常出現一些奇怪當有趣的禮物，例如動物腳襪子、大肚腩腰包、Pizza毛毯、鯊魚造型Bath Bomb等等，用來呃Like都幾有話題性，但收到呢份聖誕禮物都真係唔知畀咩反應好。同樣都係真人真事，小編曾經收過素描雕塑，除咗對於真係送畀有志學習素描嘅朋友，一般人收到真係唔知畀咩反應好。曾經試過擺首飾、掛帽、做紙鎮，但由於實在太大件，雕塑表情又相當詭異，最後都係默默送咗去二手家具店，祝佢搵到個好主人。
第5位：摸不著頭腦的設計禮物
曾經見證過有朋友收到Cosplay小護士套裝，即場黑面全場氣氛跌到谷底，原本想得啖笑嘅送禮者唔敢認係佢送，場面尷尬到結冰。假如你真的想挑戰友誼，都可以從網上獵奇式地尋搜禮物，當中小編找到這對動物小襪，真的摸不著頭腦為什麼會有如此設計，絕對能登上「絕交禮物」排行榜第5位。
第4位：已經唔啱型號嘅手機殼
手機年年出新，收到唔適合自己手機型號嘅手機殼真係好困擾，而且手機殼大家都有唔同品味，收到唔適合就真係一世都唔會用。如果真係想送的話，不妨揀手機防趺支架環，可以配合任何手機之餘，又真正實用，點都好過又送一個唔啱用嘅手機殼！
第3位：相架
呢個年代雖然真係有大量菲林相機發燒友，但相信都應該唔會需要老土四方相架。每次收到都一定會無言，又阻位又惹塵，再加上送出去都無咩人會想要，不愧多年都係「絕交三寶」鐵腳。朋友真係好喜歡用菲林相機影相的話，或者可以試下以下呢款LED照片牆掛飾，有創意又可以打卡，應該會減低絕交率。
第2位：轉贈專屬東西
好多時聖誕Party收到公司吉祥物公仔，真係唔知笑好定嬲好，就算嬲都要開心笑影張相，等HR姐姐可以擺上公司Facebook同大家開心share。最慘有人夠膽拎去party抽獎，轉贈朋友，有無禮貌？
第1位：印相水杯
水杯作為「絕交禮物」長期榮譽會長，本身已經神憎鬼厭，如果仲要係印相，真係唔需要有挑戰友情，因為大家之間根本就無友情，完全無愛！仲想挑戰一下？淘寶都仲係有DIY水杯服務，仲可以雕刻文字、訂加熱變色顯相功能，亦即係每次沖熱水就會見到張相！挑戰吧，不怕死勇者們！
