我自己覺得，生個新生命出黎，個目標起碼要個子女覺得“有出世”好過“從來沒有出世”，喺現今香港地唔易做到。要有一定財力時間愛心
但係領養嘅責任就有啲唔同，你唔係生佢出黎嗰個，養父母如果做到仔女覺得“領養佢返屋企”好過“留佢喺孤兒院” ，咁到算對得住子女
大家覺得咁諗make 唔make sense?
當然，絕大部分人個first choice都係自己生
生唔到好多都無後，算數
只有一部分人會生唔到走去領養
更加少人會first choice揀領養
想自己生係咪多數覺得想有兩夫婦的愛情結晶品？
定係覺得自己生先叫“自己嘅”
想睇下大家點睇
睇你有冇大愛，有啲人自己生到都會領養小朋友，當正親生咁。
如果你話領養完就自我感覺良好，覺得自己俾左頭家佢好過留係孤兒院，咁我只能說唔領養好過領養
冇，純粹大家討論下，我冇真係要領養，不過我都冇要生小朋友
但係大家都話領養大愛啲，但係其實法律上都自己仔女丫，定係基因真係咁重要
另外對養仔好似親生咁，其實親生都唔係事必對仔女好架，有啲立心想老左有人陪有人照顧先生bb, 養兒防老，咁有幾好？
同埋領養得都預左日常照顧，養育，供書教學，同親生有咩分別？
我改左我上面個留言，係要個小朋友覺得有個領養家庭好過喺孤兒院。唔係領養父母自己一相情願咁諗
我係覺得，世上有好多孤兒需要人照顧，點解要自己生一個“需要”出黎，而唔去滿足現時就有嘅需要
首先香港想領養都唔係易事，外國就好多新聞，好開心又有好變態都有。我自己有小朋友，如果各種情況許可都想養返一兩個，想屋企熱鬧d但又冇乜心力再生，而且地球真心太多人，我成日覺得生多個作業多次，領養唔係主動加多個人係地球感覺好d。我諗我可以視如己出
我覺得同天性本能有關，動物界都冇收養呢回事。
動物界有收養架，有文獻記載海獅、猴子有收養幼崽。海豚甚至會收養唔同種族嘅其他海豚。
因為果個係人，唔係寵物，唔係流浪貓流浪狗，領養代替買。
可能你冇小朋友，當你經歷過懷胎十月再生佢出黎朝夕相對，果種血濃於水嘅感覺好難用語言表達。
自問如果係領養嘅話，我一定俾唔到我依家對阿仔相同嘅愛俾佢。
我覺得嗰種 bond 係好特別，乜都取代唔到，係獨一無二。就好似一條無形嘅紅繩綁住大家。
係
領養嘅你幾錫佢都好
唔會有嗰種「我個仔/女最靚仔/可愛病」，佢瞓、笑、咩你都覺得佢係世界上最靚仔、最可愛嘅咁
自己生個好曳心甘命抵
但領養嗰個如果好曳係咪可以一樣視如己出
如果有錢，我會揾外國d專業代母生，不知幾好，唔洗自己煩，所以領養同親生對我都無分別，最重要係個小朋友優唔優秀。。。
領養最大問題係確保唔到血統優唔優秀，例如吸毒者生出尼既bb有無隱性問題，可能唔過長時間都唔知。
利申：自覺血統低賤，所以唔生。
我有諗過，如果係養仔，萬一 touch wood 有地震火災，我會唔會好似電影甚至報導見到嘅媽媽一樣，唔理自己安危，犧牲自己都要救返佢？如果佢忤逆又頂心杉，我能唔能夠做到無怨無悔，包容愛護，拼死救佢？
夠愛錫既話就冇分別
唔愛錫既話自己親生仔女都會虐待佢
exactly
幾多人對貓狗好過對自己
心理上基因真係好重要，但實際上係廢嘅⋯⋯
同意你嘅推論，不過我都係prefer自己生
動物天性。人始終係動物，所以基本上到咁上下就會有繁衍自己下一代諗法。所以無論個小朋友係咩樣你都會覺得佢可愛，佢點曳都會係你心頭肉。如果唔係咁，應該大把人領養至係。
當然我地又同動物有分別，所以冇話一定要生。
我唔係特別鍾意細路，應該唔可以將領養嘅視為己出咁照顧遷就
用視如己出去衡量領養細路有d怪怪地……本來就唔係自己生，點解要强行逼自己“承認”係自己親生？反而我覺得同你愛一個人，或者關心一個人既原因有關。
for example，點解要做"家長"？因爲你可以將心比心去愛其他有困難既人，or more specifically 小朋友，你愛佢地想照顧佢地，僅僅係因爲你視佢為一個同自己一樣寶貴同有價值既生命，唔係因爲佢有無血緣關係，係咪你親生。
我覺得其實每個人都有領養小朋友既愛同能力。分別係如果自己只有有限資源，係咪會選擇比自己既親生細路。親生細路個着數位係佢係你個肚度經歷左10個月，而領養既小朋友無，相對黎講贏在起跑綫。但係育兒本身都講bonding，即係一場馬拉松。
個人不負責任睇法係，好早期都係BB果陣，可能親生細路跑快d，但係如果養左好耐，幾十年感情，或者真係會好難再分親生唔親生，一樣都係自己小朋友。
領養愛心同勇氣係非常强大，領養小朋友如果唔係預期: 如健康欠佳，性格難教，成績唔好，養父母心理質素就已經要好强。
領養感情冇咁深厚, 生唔到都唔會領養