轉自囧報：
再有一套本土電影誕生，就係由好耐冇拍過香港電影嘅王喜，主演新導演謝樂兒（Joly Tse）嘅作品《照單全收》。呢部戲係講王喜係一個需要坐輪椅嘅殘疾教師，喺校內遇上同為傷殘人士、由舞台劇女演員黃呈欣飾演嘅女社工，黃因為性別歧視同埋性教育等觀點經常同校方爭執，兩位殘疾人士一齊對抗封建校權，同埋要為有缺陷嘅人生畫出彩虹。殘疾，一樣可以去愛同被愛！
阿囧同王喜傾開呢部戲，阿喜就話當初聽到導演要賣樓自資開戲，曾經有少少半信半疑，因為之前試過有啲人以相同藉口游說演員減片酬，但後來拍拍吓，特別係其中一幕戲要去到屯門山旮旯單位取景，個單位係有人新搬入去，四圍仲有一箱箱物品未拆，原來係導演賣咗樓後搬去呢個單位自住，成間屋得張床係放好咗，係要嚟俾演員拍戲用，導演連自己都未搞掂，就俾個單位出嚟拍嘢；但係呢，阿喜一個男人去瞓女導嘅床，而佢不嬲大汗到死，現場又收音唔開得冷氣，直情係拍到爆晒汗，所以阿喜對於呢件事好內疚，覺得自己唔應該有質疑，同時佢亦對導演嘅誠意感到好佩服！
導演謝樂兒首次拍電影，唔單止自資，仲要集編、導、監於一身，電影拍成點未知，但誠意十足，單係電影主題曲《愛一次》，亦邀請到杜太田蕊妮主唱，歌曲meaning同電影一樣，希望殘疾人士勇敢去愛，唔好放棄幸福，因為總會遇到「照單全收」嘅另一半。
《照》片喺11月9至11號喺藝術中心古天樂電影院率先放映6場，10月30號喺各城市電腦售票網公開發售。早幾日有報道指撐警藍片《時代》有人包場，又傳呀吓，會喺11月上畫，唔知兩部戲有冇可能打對台，但阿喜講到票房信心時就明係揶揄：「票房方面，我哋只會有兩種下場，一、喺《時代》之前；二、喺《時代》之後，姑勿論出現邊種結果都好，因為我哋係冇任何人做包場，喺呢個基礎上嘅分別，我哋會如實地照單全收。」
WONG HE 王喜 黃呈欣
電影《照單全收》
—————————————————————
Follow us on IG：
www.instagram.com/smartposthk
