我小朋友未讀大學，到現時為止，大約：
幼稚園連N班學費$110,000
小一至中二學費連課外活動$1,000,000
中三開始去咗外國，今年第五年，讀完就高校畢業，$750,000
請工人十二年$800,000
暫時係$2,660,000
不過佢唔會讀大學住，會先工作，所以我應該係3球有找。
大家都好捨得洗係教育上面
1個讚
就咁計教育開支，唔諗通脹/升中加學費，只係平均
學費同補習/興趣班
如果要讀 ESF 國際學校，然後去英國讀大學：
12 年國際學校 130,000* 12= 1, 560,000
英國大學 3 年：300,000* 3= 900,000
一體一藝一對一 12 年：(300+800)* 52* 12= 748,000
補習社數學 12 年：2200* 12* 12=316,800
齋咁樣都 3,524,800，未計幼稚園。
如果係讀直資 12 年，然後香港讀大學，只學跳舞同鋼琴學到八級，補中英數 12 年：
學校 30000* 12=360,000
大學 41200* 4=164,800
學鋼琴 500* 52* 12= 312,000
學芭蕾舞 1400* 12* 12=201,600
補中英數 2500* 12* 12=360,000
咁樣又 1,398,400
只計算 12 年教育咋，幼稚園冇計，有啲要學埋游水、科科補之類。
2個讚
教育係好值得洗錢㗎
1個讚
同意
淨係教育嗰part都有排計
根本唔使計燈油火蠟呢part
eg有d家長特登搬去校網好d嘅地方for抽獎，雖然叫做慳學費，但買樓幾百一千萬依家好平常，又要比agent fee+律師費，又要裝修…
邊計到咁多
好勁
數口好清
如果小學係讀私立學校，即係 DGJS、CKY、音小呢啲，仲貴吖！五年後 10 萬學費一年不是不可能。
你都可以試下一次過計曬今年教育開支，然後諗下將來入咩學校，睇定啲興趣班價錢。計下計下都好甘，就會覺得「哇，咁大筆錢我邊度搵」。但最後你嘅開支肯定多過呢條數。
讀官津小學條數未必細。雖然係冇學費，但校車動不動都千千聲，仲有午飯、學校課後班，同自己啲興趣班/補習，一個月好容易三四千。未計請工人…
我計過朋友屋企，兩個仔女讀直私，齋學費都一個月一萬，未計啲補習、學音樂、校車費。
慳學費但賠了一層樓，仲要未必成功入讀，仲貴過讀 IS。依家啲兩房一廳，閒閒地都五六百萬，6 年 ESF IS 學費就咁樣唔見左了～
又未必去到賠
放租放賣自住都得
如果呢兩年放租放賣，真係 
識人做空姐，一粒仔讀私小，本來想買多層樓但最後冇買。佢今次好彩冇被炒，但減人工 30%。佢話好彩冇買樓，唔係真係要賣賤賣樓同阿仔轉去官津讀。
咁誇張，仲有老公份糧頂到下掛
佢哋仲供緊樓。佢做左空姐十幾年，正常飛嘅話，人工好客觀嘛，一下字依家得一萬多啲，仲要可能遲啲炒埋，離職又賠錢。上年諗住買第二層，反正佢哋生活唔拮据，但依家縮咁多。
1個讚
而家教育費真係高昂，當然我承認呢個唔係最低消費，都係睇餸食飯，不過我重視教育嘅，慳其他嘢都儘量比佢哋最好嘅教育，睇留言見到呢度好多會員都係咁，所以我見到隔離 forum 好多父母話寧願將筆錢做首期買樓比仔女好過比佢去外國讀書，覺得十分不理解
你啱，唔好意思我反應大左。
我覺得其實好正常，大部分父母都會俾能力範圍內最好嘅俾小朋友
不過話說回來，你小朋友點講都算係富養，話係金菠蘿都不為過呀
我明呀，唔使唔好意思
幾百萬聽落好驚人，我當時計到呢條數出來都嚇一跳，但係唔係一次過比，攤返開 20 年，每年分開比，就冇咁難接受
最近大家都熱議 BNO 5+1，我好多朋友都準備動身，我都有問佢哋有冇睇過佢哋嘅行業英國咩環境，佢哋好多都話，喺香港仔女教育開支好大，而且將來都係預左送佢哋去外國，如果移民，佢哋讀公立學校，大學比 local 學費，淨係慳左呢舊錢，即使做唔返本行或者要從低做起，都值得。可見教育費用對香港中產家庭嘅負擔幾重
1個讚
唔敢計… 
但我有記數習慣，約莫心中有數…可以比大家參考下…
阿女每月開支—
學費+興趣班︰$12000 (升小學之後暫時跌至$8000)
工人(冇阿女冇佢)︰$5600 (包人工機票保險agent，平均除開)
1個讚
呢樣真係好難講
如果小孩讀書無天份，去外國先勉強讀野雞，是否有層樓俾佢好過
2個讚
我90後，細個嗰陣屋企家庭收入一萬左右，一家4口，真係百幾萬就兩個小朋友。係香港讀大學其實可以問政府借錢自己還，利息好低，學費都唔係貴。
雖然話通貨膨脹，不過我冇打算幫小朋友幫乜乜興趣班又讀IS，咁養我又唔覺得有幾貴，反正一個人嘅成就，唔會因為佢識跳下無彈下樹琴而有好大變化，做父母嘅點教點同佢相處，重要過花幾多錢。
3個讚
我有出個post講自己養育子女，其實讀書，係睇子女嘅資質及自律性，唔係話讀IS就成績好啲，將來條路易行。
本地香港三大某些科目，學術水準係世界級水準，係香港讀同外國讀分别唔大。
養育子女花費金錢有限 (始終唔會為培養個仔攪到傾家蕩產，負債累累，係自己能力內付出) 
但父母所付出的愛心、忍耐性係無限，這才是養育子女最大的花費。 
4個讚
我自己細個屋企窮，即使有課外興趣都冇能力去發展，所以我好明白嗰種失落感。我一向都相信人唔係一定要讀到書才有出路，才會幸福，所以我仔細時，我都俾佢報好多興趣班，只要佢開聲想學想試，時間體力許可的話，我都會俾佢試，目的唔係要幫助升學，而係發掘可以長遠發展嘅興趣。終於佢八歲時就搵到佢嘅目標，十三歲去外國追夢，讀埋今年高中畢業，希望考到唔錯嘅團，踏入另一階段嘅目標。
我只可以講，唔試過唔會知小朋友有冇天份、鍾唔鍾意，我都冇諗過我仔會將興趣發展成專業，甚至事業。
7個讚