借account
成日聽啲家長話咩個仔/女反叛期嘅時候好難頂，甚至有啲人當係一種精神病咁，好似小朋友突然變怪物，家長就係受害者。每當我聽到呢個詞就覺得好反感。我覺得所謂反叛期只不過係家長小朋友一個適應、過度嘅階段，我強調唔單止係小朋友本身，亦係家長嘅一個過渡階段。
綜合自己同身邊人經驗，通常所謂“反叛期”嘅摩擦，主要都係幾個根源。1）父母本身觀念錯誤，通常傳統封建型嘅家長最易撞板。覺得父母就係高高在上，子女就要千依百順，叫佢做乜就做咩，叫佢去東唔敢去西，小朋友往往敢怒不敢言，但到某個年齡開始有反抗嘅能力。呢啲家長喺小朋友係細個嗰陣普遍都好鍾意同親友曬命話個仔女好聽話好尊重佢，但到高小初中就黎料，通常有兩種結果，一係就火星撞地球，一係就疏離，仔女開始乜都唔同父母講。2）父母口中嘅“反叛期”多數都介乎10-14歲，呢啲年紀，係差唔多準備呈分試到適應中學嘅階段，通常父母都會有壓力，如果小朋友本身係hea低，無啦啦係咁摧谷佢讀書佢當然反抗；如果小朋友本身畀心機，父母再畀壓力，亦難免會有負面情緒。3）未搵到溝通方法。青春期呢個階段啱啱脫離兒童行列，但有未係成人，如果相處模式仲係好似細個咁就會出問題。要幾多空間同自由，要點樣相處呢啲都係要雙方去協商。呢啲原因都好正常合理，但恰恰呢啲年紀就係傳說中嘅反叛期，順利成章咁，唔理前因後果，將所有罪名推曬喺呢三隻字，再畀小朋友一個標籤。
點解我咁反感？講下我自己嘅故事。我高小嘅時候父母好緊張我嘅學業，偏偏我當時嘅成績都唔係咁好，於是就送我去私補，由於補習老師係退休嘅小學老師，就好尊重佢，覺得佢係權威。10歲11歲嗰陣我就對於佢嘅溫書方法有啲疑問。佢要求嘅溫書方法係點嘅呢？佢補我中英文科，每次補習一開始就打開本語文書，要我讀第幾頁到第幾頁，讀完就讀工作紙，之後佢就搵枝筆畫下書畫下工作紙講解咁，如果冇新嘅工作紙冇教新課文就重複讀同樣嘅嘢，講解同樣嘅嘢，分別在於本書同工作紙又多幾條鉛筆痕咁，再做下練習。佢強調只係幫我溫測驗考試，唔會溫默書，因為默書串字我同屋企人自己溫都得（咁我自己喺屋企夠可以照書讀啦）。
我越補就越覺得佢啲方法唔啱我，甚至覺得佢啲方法有問題。但係個補習老師係嗰啲你有少少自己意見就會不悅嘅人，例如同佢講話讀書唔想讀出聲佢就話一定唔得。終於去到小六嘅第一次測驗，成績唔理想。佢係咁話唔明點解唔明點解，係咁強調話冇理由呀，明明溫習好多次，冇理由咁嘅成績。我就決定藉機同佢講話不如改下啲溫習方法，話唔好讀教科書，因為考試唔會出，集中溫工作紙，但係唔好照讀，例如可以遮住啲答案考我咁。佢一聽到我有異議即刻黑面，就話我反叛期，話邊有考試唔考教科書，但事實上真係唔考。我同佢講話我問過另一個同學，佢意見同我一樣。但佢就係唔信，佢寧願信佢唔知幾多年前嘅所謂經驗，都唔信個考生講乜嘢，唔認真睇下份卷。只要我有一句異議，佢就賴話我反叛期，因為我當時12歲。
至於家長就一定係聽佢講唔聽我講。因為我只係一個成績差嘅小學生，佢係經驗豐富嘅退休小學老師。個補習老師明知我家長幫住佢就話如果我家長同意改方法，佢先改。真係佢哋玩曬，我無辦法。但係六年級功課好多，又要溫默書，補習嗰度一個禮拜三次，每次兩個鐘，我真係浪費唔起咁多時間。軟唔得，唯有用硬。到後期我專登採取不合作運動，佢要求我做嘅嘢，我唔做，佢畫完嘅工作紙，下次補習之前我一定擦曬，佢嬲佢鬧我堅持住唔屈服。既然我冇得主動離開，就迫佢放棄同我補習。最終我得償所願，但過程真係搞到我都喊埋。
除左我自己，幾乎所有人都覺得成件事係因我開始反叛期而起。係父母口中得知，其他家長知道我冇搵佢幫我補習，就覺得好嘥。其他人眼中我嘅所作所為簡直係一個好典型嘅反叛期暴風少女。但我眼中，反叛期係一個莫須有嘅污名。從來都冇人睇清楚我嘅需要，只係覺得大人啱，小朋友永遠係錯。但如果當時我乜都唔做呢？損失嘅唔係其他人，係我嘅成績，我嘅時間。
我見好多家長都不解小朋友變左咁多，就一味話反叛期呀反叛期。我只能講句：事出必有因。將心比己，如果他日仔女長大後再一次有大摩擦，你唔想仔女唔講道理就一味話你更年期呀更年期，唔係溝通解決問題，只係問更年期呀幾多歲黎幾多歲完，當你有病，你就唔好過分標籤反叛期呢樣嘢。
完。
，大人未必啱哂，有時都要係小朋友角度去諗。