老公係全職爸爸 （兼職搵外快）
我全職工作，番工時間早，放工番到屋企5點
但每日我放工番黎同星期六日
我老公期望我主力陪小朋友
（其實我明白，但覺得好攰）
老公唔會點做家務
你要開到聲佢先郁下郁下
因為佢覺得陪仔最重要
家務可做可唔做
佢耐性麻麻 阿仔唔肯執玩具佢會喝佢
我同佢講左好多次唔好大嗌
佢話我唔明佢幾大壓力
每個星期總有一兩日要求一條友出街睇戲/行漫畫/figure
我自己生活除左番工就係湊仔
同佢講過 我都好辛苦 佢話我做人阿媽就係咁
因為我全職搵錢較多
所以佢湊仔我番工
長老只會玩 唔會湊孫
唔會請工人 屋企唔想多個人
我想知有無全職爸爸？
你地辛苦我知 但你地點諗全職番工既媽媽？
比心理準備佢，小朋友大D要揾工了。
以免佢休閒慣無心揾工，有你搞掂就算。
全職爸爸比較難，除非太太人工足以應付，但我都做過全職爸爸半年，但我從來無覺得辛苦，反而老婆放工，我會叫佢陪小朋友，我就做家務
我算係全職爸爸。
但係我老婆不嬲都唔需要特登返公司。
個女學術上嘅嘢我老婆負責。
屋企其他嘢，文娛活動就由我負責。
正常來講我老婆在間房間度做嘢，我哋就唔搞佢。
我哋初初開舖嗰一排，我每日朝頭早六點出門口，返到屋企七點幾。點都要同個女玩一陣。小朋友嘅時間唔會等大人，亦都唔會理解大人。
我哋知道返工放工好攰，但係時間過咗就係過咗。
家務俾你老公做返，你多啲時間同小朋友一齊。如果好攰，就咁攬住佢睇電視又好，讀書比佢聽又好。最緊要係接觸。
我老公一直都係自己生意home office
佢負責煮3餐同幫大b沖涼
我照顧兩個bb起居陪佢地、哄睡
我地都係一星期一次鐘點
Agree家務可做可唔做，啲碗洗晒佢有得用就算
老實講我地兩個係屋企都忙到甩轆
有時都會鬧下大b，例如佢手係打人、做危險野會大聲叫佢，我地唔係溫柔善良派父母
賞罰分明做得好就可以去街街，做錯野就鬧
我地教女另一半唔會出聲
老實講你老公冇工人冇長老支援唔係好sustainable
點都要搵保母咩人都好比佢抖下氣
任何full time mom/dad都係
否則人累左，你怪下我唔幫下你手，我怪下你教仔點點點，盞傷夫妻感情
買洗碗機、吸塵機同蒸氣拖把for 平日用；
請家務助理一星期deep clean 一次。
其實我覺得最辛苦係每日六點起身
放完工番黎又番另一份工（湊仔）
我番黎老公會煮野食
但有時覺得佢襯仔瞓晏覺
點解唔做下家務
有時我頂唔順會再早起身
5點幾掃地拖地洗衫
請人黎幫手有諗過
但得我一個賺錢
唔想用太多無謂錢
諗番自己媽媽都係家庭主婦
煮足三餐 每日都拖地掃地做家務
有時我就諗點解我老公做唔到
我又怕自己咁諗太harsh
但作為一個女人要持家
番黎又湊仔又要早起清下家務 真係好辛苦
如果做到大家都有怨言，請人幫手最好。
唔想多個人而唔想請工人，甘唯有請鐘點等大家都可以稍為抖下
我未有工人前都唔想有個外人係屋企，但同老公當時因為家務問題有好多嗌僑，請左工人後就冇問題，大家放工其實都想抖下。
你可以諗下兩個都返工請工人呢個option.
哇你依段野應該踩中晒full time mom/dad既地雷
「但有時覺得佢襯仔瞓晏覺
點解唔做下家務」 >>> 湊仔已經好攰，佢訓左玩下電話叉下電hea下訓下唔好，係咪一定要逼到自己抖唔到氣先叫好
上一輩係家務大於湊仔，啲仔冇餓死就合格
冇乜育兒陪玩親子時間，冇得咁比較
我諗大家都要諗下個地下緊要d定夫妻感情緊要d
我睇你打既野覺得好似你地兩個都怨氣好重
雖然唔係ftm/ftd 但我好贊成上面所講
我因為wfh經歷過響屋低湊仔呢幾個月 就深深明白做全職媽媽/爸爸係好辛苦
湊仔絕對唔係優差 有時我仲好慶幸自己有番工 呢度要向所有全職媽媽/爸爸致敬
我好建議你請人幫手做家務 或者兩個出去做野 請保母去睇小朋友（唔知你小朋友幾大）
我相信一開始你同先生有呢個決定既時候 一家係兩個溝通好
大家掉轉頭諗下 如果係爸爸番工 媽媽照顧小朋友 但爸爸有咁既諗法
全職媽媽一定感到好傷心
呢條路唔易，好多時真係要互相體諒同埋多啲同理心，咁講你地既關係應該會好啲
搵人幫手喇…
講多少少我既blackground
我係番早更
每日5點幾6點起身
然後4點幾5點就會番到屋企
我的確對我先生作為fulltimedad有期望
因為呢個放工時間每次都係bb午睡緊
但我一番黎 見到碗未洗
由生仔到依家 啲衫都係我主動話要洗/叫佢好去洗衫
我唔係無試過全職湊佢
疫症新年後我有4個月wfh
我都試過湊佢 跟佢時間表休息
我明白湊仔好攰 但我仔瞓成10個鐘 午睡又2個鐘
大人唔駛瞓咁多掛
但我番黎 我老公基本上只係煮晚飯
係我take湊仔role
佢半夜睇波煲劇 個仔午睡又煲劇
我問心番工好忙 剩係食飯一個鐘同搭車先叫休息
番黎湊仔仲要做家務
但成份糧又俾晒屋企
我老公做fulltime就係叫佢幫輕下
如果依家要我再俾錢請家務助理
倒不如一齊番工請工人
但佢又唔肯呀 佢話要陪個仔成長
但最奇怪佢唔體會我攰
剩係話我放工陪仔都係我做人阿媽責任
問佢點解無做家務
又話湊足佢全日好攰
我都攰 我仲要個仔瞓左先瞓
又全家最早起身番工
見到老公可以睇波煲劇
咁可以點
我以前都係你老公角色 佢兒家就係唔捨得離開bb
而且我日日做到好憎老公 佢遲啲返到屋企 我都黑面
bb瞓12個鐘 代表大人最多只有8個鐘休息 而且大人都要差電 12個鐘其實唔係多 講真同小朋友玩一個鐘 好多時乜都玩晒 咁全日至少仲有5六個鐘玩 可以做啲咩呢？咪日日捱囉
其實我覺得你老公都做得好唔錯喇 bb瞓覺 佢煲下劇 好正常姐 你多啲鼓勵佢啦 我個時都係趁bb瞓左先有自己時間 就更唔想瞓 惡性循環 搞到第二日都冇精神
信我啦 請工人/保姆/鐘點 對大家都好 呢個世代唔同啦 湊仔唔係剩係餵飽 仲要教佢玩玩具、上playgroup、伴讀 仲要煮飯、做家務 鐵人咩 以前個一代邊有呢啲野架
以前都係揀屋企樓下個間幼稚園 就咁返學啦 兒家講競爭架 冇得咁比較
我老公雖然home office但煮飯同幫我湊bb
仲要做野冇放工時間
我地係唔乜點抹地既一星期deep clean一次
我有問過你覺得我係咪唔係好老婆呀成日要你幫手
佢話：唔係咁計，雖然我心目中係想你唔洗我幫咁多手我可以多啲時間做野，而我都知如果我push你你可以做多啲，但我見到你已經有努力同攰，我再push你你都會唔開心同大家唔開心，咁咪我做多啲啦
兩公婆一世流流長，少挑剔多欣賞
佢有個想陪個仔成長既心，已經好過好多男人
唔好集中係家務上面，家務既野唔係人人都做得快手同主動做
老實講，好少男人會主動做家務（其實我自己都係，應該係唔多人鍾意做家務
）
如果真係潔癖頂唔順，買多d唔同機返黎幫輕下，洗碗機真係好快手架
唔想洗碗一係買外賣, 一係買洗碗機啦！
大型清潔果d我自己都係1-2個月一次, 習慣左唔好有潔癖就得。一係一個月請一次鐘點囉。
我都係全職爸爸, 湊仔之餘, 社會、朋輩同自己都會畀壓力自己.
返工嗰個父母無得同湊仔嗰個比,
仔囡除咗瞓覺, 係全天候扯晒湊仔嗰個啲力(體力兼心力),
對於全職返工嘅媽媽, 都唔會要求太多啦, 但想媽媽都唔好要求太多啦.
我覺得為人父母生仔始終都要有一個陪佢童年, 仔囡痴父母, 點都好過痴長老或者工人, 呢啲嘢錯失咗就返唔到轉頭.
睇完你呢句,
憶起我當初其實都因為咁,
所以由老公全職湊B
但係依家經濟負擔落左我度,
番黎又唔係可以抖,
我都要湊仔,
跟手其實家務我都無咩要求,
我最基本係要吸塵, 同埋一星期洗兩機衫,
其實我明fulltime攰
但有時我覺得我自己都好攰,
你地唔明, 我見到我老公半夜打機, 仔仔午睡又打機個感覺
好似好多時都係要我代入fulltimemum/dad角色
但就無人代入我角色,
最後結論都係生左仔就要捱咁囉
呢樣我唔認同,
點解對男性既標準可以咁樣,
而我身為女人, 要搵錢養家, 又要湊仔呢
做得全職，洗碗、吸塵抹地、洗衫呢d係好基本，我感覺到你老公有d懶散，但亦唔排除佢唔識分配時間。不過而家其實好多電器可以減輕家務工作，例如洗碗機、自動/無線吸塵機、乾衣機、抹地機，你可以考慮下。
其實返工果個放工一定要陪下仔女架喎
唔係既話咪完全冇親子時間？好似冇份咁？
如果你有咁既諗法可能你地既關係唔岩男主內女主外
依個模式好考兩公婆夠唔夠open mind同無私
睇得出你見老公有得抖就心理唔平衡