呢樣野，同個朋友傾過，首先係唔希望小朋友讀唔到書行佢條舊路啦，又或者係想佢做份好工啦，唔洗怕唔識字比人笑啦（通常呢啲心態都係以前細個真係讀書唔成，就將自己既理想投射返比小朋友既補償心態）
仲有啲就係
因為細個家長無用力迫自己讀書，大個有啲埋怨自己既父母，唔想第日自己小朋友會埋怨自己既心態去做
結論係，想小朋友行家長本身想佢行既路，而唔係幫佢搵佢想行既路
2個讚
正是如此～
係父母都讀書唔多，幫唔到細路。
我識一個細路剛升小時成績唔錯，可惜愈大英文科愈差，爭d唔合格，其他科幾好都無用。
佢父母搵唔多但都願意洗下錢補習，但跟本唔識點幫佢搵有效的改善方法
1個讚
乜嘢叫做「佢想行嘅路」？小學生嚟計，無知識基礎將來真係咩路都唔使行。做好功課，測驗考試前要溫習呢啲我會覺得係基本，唔駛高分但唔可以因為懶而低分囉。學生嘅責任就係讀好書，家長就係負責幫佢哋搵合適程度嘅學校，督促佢地跟上學習進度。乜嘢為之合適，每個家長有自己嘅尺，外人也不用去理會吧！
2個讚
乜野叫做佢想行既路？
你想佢做既野=佢想做既野？
做功課係基本呢樣我同意，
但依家講緊係過份催谷。
身邊有朋友，係講到明，谷幼稚園，谷小學就係要比條我想佢行既路比佢
咁樣我就唔同意
學校分好多種，如果小朋友唔適合呢？
2個讚
幼稚園同小學嘅學生點知自己想行乜嘢路，唔通佢話想做YouTuber你就叫佢唔使讀書？
做家長最緊要靈活變通，試過跟唔上咪轉校囉，如果跟唔上迫都無謂啦
香港係咁現實，讀到書條路易行好多，冇盡過力讀書，大咗一定會後悔。
逼細路讀書其實係會破壞親子關係，有邊個家長內心係願意嘅？攞個童年去玩咪仲好？
依家就係講緊跟唔上勉強迫佢讀既人
難道你就係？做乜要不停追住我
唔知以為我係迫你讀書既家長
你同我講小學，大把小學家長洗腦式教育教小朋友大個要做乜乜乜，乜野叫我的志願，定係我媽的志願
唔係話由佢唔讀書就係比佢行佢想既路，而係做家長要幫助佢去成就自己想做既事。
最好既例子：讀書讀得好，品學兼優仲要喺運動健將定係讀唔成書走去做運動員？
好多家長會答一定係前者啦？
但係其實仲有第3個選擇架喎？
教育唔係教課本上既知識就算，係要話比佢知，做人係要點做，唔係死讀書就夠。
3個讚
令你誤會唔好意思
其實係我想借個位呻下
我係小學雞家長，而家個仔就係唔鍾意讀書，佢唔係曳，不過要人鞭策下
以前佢讀幼稚園嘅時候我都會諗條條大路通羅馬，但係上到小學，發覺學術根基真係好重要，啲小朋友偏偏就唔明。
有咩第三條路都好，學術根基係成功嘅基本，我不過係教仔教到心灰意冷者，我承認我冇乜耐性陪一個讀唔成書嘅細路搵佢嘅出路
尤其語文同數學根基，如果打得唔好，將來搵工進修都會困難重重，所以家長迫細佬讀吓書都係無可厚非（我諗）
呻完，請你原諒我
你試改下方法同佢學習，可能要不斷試先搵到夾用嘅方法，我相信實有一種方法夾到，佢唔中意死讀就稔d遊戲方法吸引下，唔好咁易放棄
1個讚
唔好講到原諒咁嚴重，我女都係今年升小一架
真係好辛苦，根基呢樣野我都認同好重要，最緊要慢慢比小朋友知道讀書係讀比自己而唔係讀比其他人架
講係咁講，今日都係到諗，如果我女考試默書唔好我又會可唔可以做到自己所講既，共勉之
我明你意思、做家長唔係要佢考狀元、但我地唔可能養佢一世，佢都會長大，都要生活，點都要搵到兩餐。
現實啲講、考政府工、有大學畢業同英文叻起薪點已經唔同。揾咩工都要識字簽合約。
我小朋友係肯坐低讀書溫書、本身能力不足、一年級時、真係科科個位分同0分、係常識好啲、本來我自己真心係冇所謂、但佢會見到其他人嘅分數、會覺得自己點解咁努力都做唔到、咁我都要諗辦法幫佢、唔可以令佢覺得自己係比其他人唔掂。
呢兩年學左好多唔同方法、呢傢三年級、佢放學食完飯、會自動拎功課出嚟做、老師話佢上堂會舉手答問題、啱啱默書有三十幾、當然都係差、但已經好大嘅進步、老師有讚、見到佢係開心咗好多。
1個讚
贊同，比佢自由發展唔代表放任，基本學術能力都要有。小朋友要為自己負責，但咁細個真係一講就明一講就做到咩，咩叫負責任咁抽象，真係要時間適應同理解，所以家長呢啲時間咪要介入幫手囉
響佢哋未成熟未識諗時幫佢哋，但又要隨住佢哋能力同年紀調整「對策」攞平衡，真係唔易做架… 大家都係家長，一齊努力
1個讚
幼稚園同小學係兩個世界，我響個女讀幼稚園時都有啲諗法，但發現係apply唔到落小學度而要調整… 今年你有機會慢慢體會加油
識人谷到個女有情緒病,成績好似都無跌,佢女之前暑假興趣班+補習班有11樣,佢都話係個女自己想去架 
調整「對策」真係好重要,個個小朋友既情況都唔同,我係FTM就可以跟得貼D,不過我一D都唔谷,我女日日都有玩玩具既時間,成績最好就有中上啦,無既考中間我都收貨
1個讚
其實有時聽到呢啲好心up,大果個又唔開心，細果個又唔開心
我自己細個係一受壓就好易緊要既人，大個啲先慢慢好啲，點知我女又係咁，除左提升佢自信同唔好理其他人目光之外真係唔知點搞
我小朋友有同學、家長晚晚嗔話做功課到12點幾（我小朋友咁唔掂都係兩個鐘做好）
原來一至五有三日要學野、游水鋼琴普通話。放學返嚟食完飯出去、學完返嚟抖下就食晚飯、到開波做功課小朋友扭眼瞓喺度磨。
佢仲話要我地成班家長一齊同家教會反映應該四年級先可以有抄寫功課。
佢地個CASE好怪,個女係自信心爆棚果種,個呀媽係要全部人都讚佢女最叻,佢媽係攪好多小動作果D人,入家教會分黨派,之前佢媽都有套我料,要我俾我小朋友既試卷佢睇,我唔肯俾(我小朋友大個D)
而家就同學校扮慘,話個女有情緒病,要學校優待佢女
功課都未攪得掂,平日就唔應該去興趣班~
同埋佢去興趣班去成個下午咁耐既
唔知佢點安排、我有估佢仔係ADHD, 如果係根本唔應該學咁多野、都吸收唔到。