【唔驗武漢肺炎就入水飯房？羅湖手足需要大家關心！】
近日有還押緊嘅手足透過朋友向外界求助，指自己因為唔肯係監房參與所謂「自願檢測計劃」驗武漢肺炎，而俾懲教以「隔離」之名鎖入水飯房 — 即係要單獨囚禁。我尋日去咗羅湖探嗰位手足，佢有以下幾樣野想同公眾Update︰
一、多過一個人因為唔驗武漢肺炎而俾懲教鎖入水飯房
二、懲教前幾日畀左份野佢簽，同佢講因為佢唔肯唔驗武漢肺炎所以要「隔離」十四日，而期間嘅福利係唔會削減之類。但結果依家無工開無糧出、無任何野可以做、電視無得睇、連鏡都無得照。
三、試過夜晚七八點去到朝早嘅七八點，喺呢十二個鐘入面，懲教只係放咗一杯約250ml嘅水畀佢飲。佢試過要求懲教職員提供多啲水，結果俾職員鬧佢「自私」、「害人」、「做乜唔驗肺炎」之類嘅說話，完全唔明白點解要求飲水就要俾人不禮貌對待。
四、然後呢兩日又收到另一份文件要佢簽，懲教話因為武漢肺炎嘅潛伏期可以長過十四日，決定要延長單獨囚禁多七日至到九月三十號。
我即將會寫信要求懲教署解釋、停止上述嘅不公平對待。監獄唔同外面世界，無記者亦都唔會有直播，出咗事好多時都難以察覺、死無對證，我哋可以做嘅就係繼續關心佢哋有冇受不公平對待、得閒嘅可以寫下信、亦都建議大家用啲時間去了解一下囚權問題。
但最重要嘅係，只有光復到香港，呢班在囚緊手足先會真正得救，否則，惡夢只會繼續發生喺所有香港人身上。
