佢哋真係比極權打壓，連家人都有危險
佢哋體現人性光輝
以下轉載：
【感激一眾中國維權律師】
過去唔少香港人都未必會關心中國維權律師嘅狀況，但喺今次12港人被送中嘅事件中，唔少中國維權律師都為12位手足嘅安危疲於奔命，甚至飽受政權恐嚇。希望各位香港人喺持續關注12位手足嘅同時，亦要感激一眾中國維權律師嘅付出，捍衛手足嘅基本權利。
事實上，喺中國做維權律師所要承受嘅壓力係一般人難以理解，佢哋從來都係中共其中一班頭號打壓對象。2015年嘅709事件中，超過二百位維權律師及人士被捕，當中王全璋等人更疑似遭受電擊等酷刑，可見其受到嘅打壓係何等嚴峻。
但就好似12位手足一樣，喺資訊封鎖嘅國度入面，佢哋越多人關注，往往就越安全。12港人事件中，部分律師如盧思位、任全牛都曾經做過訪問或公開露面，因此早已曝露喺被極權打壓嘅危險之中。
今日(11日)有受家屬委託嘅律師引述國保人員訊息指要求佢退出代理工作，更指唔能夠接受任何媒體嘅訪問，否則會嚴重影響其律師執業生涯。維權律師已經正式收到中共嘅警告，佢哋一旦失去關注，恐怕中共會有下一步行動。
在此希望一眾港人可以持續關注維權律師狀況及感激佢哋嘅付出。
