好誇張! 一買返嚟就爛, 梗係呃錢!
Update
啱啱店家喺Google同Email都覆咗我
佢無視咗我話要退款嘅問題，叫我Add佢哋個Line睇佢哋裝箱前個商品攝影存證
我心諗即係推卸責任啦？我好肯定我收到嗰陣個包裝冇穿冇爛，一開盒就見到係咁，唔知佢哋個意思係咪運送途中有外星人用隔山打牛嘅超能力射穿隻鞋，所以個盒先可以冇事
不過睇到佢個回覆我諗恐怕都好難退款，呢3百幾蚊唔貴多但係啖氣真係吞唔落
綱上買野風險好大^
你有冇扛過去消委會問下?
人哋喺台灣隔咗成個海，問嚟有咩用…
已經正式Confirm咗間垃圾公司係唔會退款的
我呢300幾蚊凍過水
真係寧願捐咗佢都好過買隻爛鞋
等呢兩晚得閒我先再喺自己個Blog度打返篇文
上次我嘈草莓網篇嘢已經有5千幾View，Google search頭幾個已經係我篇文
今次我都會瘋狂咁免費宣傳令呢間垃圾公司後悔
2個讚
如果真係好鐘意對鞋，去旺角補鞋整返好
但呢間公司就一定冇下次
我喺一間叫Catworld嘅台灣網店度買衫又係
訂衫時寫有現貨
落訂之後先send email嚟話「因為疫情」所以啲嘢要「消毒」會延遲7-30個工。作。天！
唔知消咩毒要成個月
Send極email去問都不果
第一次繼續話消毒
第二次話要等埋其他單
總之都係話海外訂單無。得。取。消。退。款！
所以係焗等
訂之前問過啲衫邊度嚟，佢話台灣
事隔個幾月到貨一拆，衫上面啲tag已經係全部簡體字
仲要唔啱size
完全feel到係儲埋一次過等淘寶出貨再運嗰啲朋友 
咁大個窿都有得補？
其實我咁大個人都冇去補過鞋，你知唔知大概幾錢左右
如果過100我就唔補了，補嚟不如買過隻好過
咁價錢上你接唔接受到先
如果賣到貴一貴又收到殘體字我真係會嬲到又要去Google評論連文帶相唱衰佢
而家啲黑店好鐘意乜都賴落疫情度
出貨慢又賴，客服覆得慢又賴，你間黑店個7~30日先係世界級，代表佢哋做嘢冇系統
我上Book Depository個Frontpage已經有講明受疫情影響物流會拖慢，但係人哋有講明拖慢幾多日，出貨同收到嘅日子都唔會差太多，唔會要你無了期咁等
你講嗰間黑店嘅7~30日根本就係斷估，一間有系統嘅公司點會唔知幾時「消毒」完，幾時出到貨畀人？
總之無論如何，收到貨之後記得影低相
之後上網唱衰佢等其他人知佢有幾垃圾都好
價錢上，我會話，如果我無訂過第二間，佢係偏平，三件衫一千蚊有找（唔計廿幾蚊運費自己俾）
但問題係我同一時間訂第二間台灣鋪，大家都係MIC，價錢仲平過佢，包運費，4日到手，質料摸落好過佢，同埋size同webpage上講嘅一樣
真係一個天、一個地⋯⋯
呢間Catworld個page佢望落啲衫就fancy啲
但買返嚟唔啱著咪又係徙氣
但試過今次我寧願買另外一間，都唔差
爛得好誇張！擺入盒果個係咪盲架…咁都唔退好賤，唱衰佢！多謝你
事件教訓我哋以後上外國網買衫真係唔好衝動
點都要碌一碌佢哋T&C睇清楚海外買家嘅權益先好落單
事後有咩問題都知自己可以由邊方面申訴
就算冇得Refund衰極講句落單之前自己都有咗個心理準備先
介唔介意講吓你另一間網店個名係咩
我都想睇吓
佢哋講咗好多次話出貨嗰陣有片有相做證明喎
我心諗咁又點？佢哋又解釋唔到點解個盒冇穿冇爛但係隻鞋爛，而且我有少少覺得佢哋明知我係香港人，而佢哋網站寫明海外唔可以退貨，所以先特登送隻爛鞋畀我硬食
成抽Email都係兜圈不停咁話唔關佢哋事，一係關物流事，一係就關我事
呢啲垃圾黑店呢兩晚真係要喺Blog度鞭到佢發發聲
1個讚
補到，我成個鞋底甩左，都整得返，換新鞋底俾我。
可去問價先，應該不過一百
叫旺角 陳記補鞋，喺黃錫明診所嘅麻雀館隔離
Mamamia
1個讚
其實佢地真係好蠢, 唔退比你唱衰冇人敢買佢地D野, 得不償失
1個讚
咁都好過冇咗3百幾蚊
有樣嘢好好笑，佢哋今日覆我封Email話其他人都冇事，係得我有事
我即刻叫佢上Google search吓PTT啲抱怨文，再唔係睇返佢哋自己個Google評分，講大話講到連自己都信埋 
好彩Google唔畀Del評論，如果唔係我敢擔保佢哋一早Del咗我篇評論十世
咁啱得咁橋我個Blog係台灣讀者多，今次幫佢免費宣傳完唔知可唔可以又推到上Google Search第1頁呢
我今日覆佢哋客服就係話你哋唔肯退款冇問題，你有你做法，我亦都有我做法，我會用我自己嘅方式嚟彌補呢300幾蚊
雖然佢哋依然好似巴哈啲小學雞咁不停話我誹謗中傷佢哋
不過訂單係真，啲相係真，個盒冇花冇爛亦都係真，我真係唔明我邊忽係誹謗？