Hihi 自己啱啱有左小朋友，不過因為近期社會問題同身體不適，成日都令自己好負面，又擔心帶吾到幸福俾小朋友。
希望各位媽媽可以分享下生完小朋友的喜悅，可以為有孕媽媽打打氣
1個讚
社會問題唔係我哋可以控制到，盡自己責任去做，支持黃店、去投票等。
有小朋友係開心事，努力保護呢個小生命，期待佢嘅出世。
3個讚
恭喜準媽媽，做好自己就夠，有時d野控制唔到就由天啦，唔好諗太多，BB會感受到你嘅情緒，媽媽開心BB都開心d架
1個讚
我下個月生，自己成個孕期都係圍繞住政治事件、又有肺炎，香港冇一日係平靜。
但我又完全冇因為呢啲影響自己懷孕心情喎～
我同老公每晚睇新聞鬧鬧鬧，要投票或者現身嘅都會支持，但點解同肚入面個小朋友有關係呢？
社會問題的確會影響小朋友成長，但咁就要問下自己可以點做去保護小朋友，而唔係一味不安同唔開心。
你嘅心情會好影響Bb發育，如果你唔係啲好多諗頭嘅人，不如順其自然，船到橋頭自然直？
3個讚
我前日做咗媽媽啦，當你一聽到BB既喊聲，一切都變得非常美好。
短短嘅2日，我一見到BB就會甜絲絲嘅感覺，會覺得好神奇，就係佢係我肚入面十個月啦
早上同夜晚個樣又會有轉變，好得意，就算個B個樣幾肉酸，都會覺得好得意，因為係自己個B。
一啲唔開心嘅嘢，我都刻意既唔去睇，因為睇左對自己沒有幫助，我哋只要知道什麼是正確同良知。
2個讚
我係2個小朋友的媽媽
做左媽媽的喜悅係
見到佢食完奶好滿足咁瞓喺你心口的時候
佢將食到一半，半糊掉的餅餅塞落你口想請你食的時候
你返到屋企，佢好興奮咁半行夾爬咁飛撲埋嚟的時候
半夜喊醒，佢一定要你抱住先瞓得返的時候
以上呢啲雖然只係生活上的小事，但已經足以令我甜在心頭
加油呀，準媽媽
6個讚
我生左BB兩個月，頭一個月簡直是地獄生活，滿左月寶寶開始識笑，滿兩個月寶寶開始想講野， er er ar ar 又成日笑，真的好甜好得意。有時寶寶扭計，我惡少少同寶寶講野，佢就即刻喊大聲d黎回應，一抱佢就收聲，真的好sweet
1個讚
其實我生完就快3個月都仲未感到做媽媽的喜悅
所以專登入嚟吸吓正能量…
可能我唔鍾意小朋友嘅程度，係連自己嗰個都唔係特別喜歡
生之前以為自己會改，但暫時好似本性難移
後悔多過喜悅
Sorly 唔小心放負咗 
3個讚
有無人幫你手湊B呀？
吾緊要，做左媽媽，就盡做。自己情緒也要好好照顧
恭喜晒啊。
唔好咁緊張，放鬆心情。
時事新聞睇得多，咁咪睇下喜劇輕鬆下先囉。
媽咪嘅心情bb係feel到㗎。
當你見到bb同你笑，就會好sweet㗎啦。
湊new born係辛苦d，但係會挨得過㗎。
加油啊準媽媽，享受下babymoon先啦。
1個讚
恭喜樓主~
我好記得我係上年6月頭知道自己有左，之後幾日就係69百萬人大遊行，612，616…再之後就係每晚睇住直播 示威衝突睹路黑警打人濫捕…晚晚都睇到個人情緒低落，我老公就開始唔比我睇…晚晚都好早推我瞓覺…到一月臨生又開始武肺…陪產又冇埋…其實全個孕期都好灰
不過每次產檢照超聲波 見到bb健健康康，每次feel到佢踢我，每次去行街睇bb嘢，就會暫時忘記哂嗰d唔開心嘅新聞~ 有左bb係開心事，作為媽媽都應該調節好自己嘅心情，比肚入面嘅小baby感受到我地嘅開心~
到bb出左世，湊佢當然辛苦到爆，但你見到佢食飽飽個滿足樣，伏喺你身上面瞓到好冧個豬樣，見到你放工返到屋企個興奮樣…真係幾辛苦都唔記得哂~ 要好好enjoy呀媽媽!!
1個讚
大個少少陪佢哋讀書，猶如讀多次幼稚園同小學，可以再次回味愉快嘅童年回憶
1個讚
當你開始feel到胎動，你會好興奮，佢仲係肚時，見住個肚一日一日長大，佢會陪伴你開心既日子，你會成日同佢傾計，個種感覺好奇妙
到佢出世後，你見佢笑，ee牙牙，到慢慢識轉身，爬，識叫媽咪，識行，個種開心難以形容，個心會諗之前生幾痛，乜都值得！
社會問題你控制唔到，但自己心情可以自我調節，仲有可以做bb媽咪係一種緣份，放鬆心情，好好享受陀bb既日子，加油！
2個讚
好多謝大家，各位媽咪都辛苦了，大家加油