雖然bb只係得六個月大，但我突然覺得佢大得好快…時間流逝得好快，作為一個ftm，雖然每日都過住湊仔生活，更加因為疫情關係而基本上冇帶過佢出街，但每日見住佢由淨係識喊到開始有笑容，再到而家嘅爽朗笑聲，偶爾嘅尖叫同咿咿呀呀，到最近嘅ba ma 音；從馬騮精咁嘅樣變到而家眼仔碌碌圓嘟嘟咁得意，原來只需六個月…
慢慢地佢唔再只依賴埋身嘅奶奶，佢開始接觸輔食，餵食唔再只係媽媽專有嘅權利…
忽然想時間慢落嚟，俾我靜靜見證佢嘅成長，回想亦有啲後悔，之前嗰六個月(尤其係初生時期）只係想佢食飽瞓飽，一直將自己陷入一個「佢肯瞓未吖」「湊全埋身嘅bb猛漲期加腸絞痛真係好辛苦」「佢幾時先可以瞓多啲，唔瞓覺點發育」嘅死角到，忽略咗佢每日嘅變化同進步。
希望而家醒覺唔會太遲啦，到佢翻幼稚園，我都要重返職場，到時更加難無時無刻伴喺佢身邊望住佢一日一日咁大。一定要好好珍惜每一日相處
最後講一句，湊緊初生bb嘅媽媽們加油！
多謝媽媽提醒， 
囝囝依家兩個月多啲，每日都想佢快啲大
「喊乜野啊」「食飽架啦喔仲想再啜？」「半夜仲唔訓」
我都係全埋身，bb是個高需求bb，未滿月就識得谷到面噴奶等你抱，到依家抱足24小時，訓教都要抱住放唔返落床
但睇返佢初初出世到依家啲相真係變化好大，為有同自己講，辛苦多一陣架咋，好快大，大左就唔要你抱架啦
想請教下媽媽，bb猛長期係隔幾多個鐘就想飲一次，我都仲未摸熟佢點先到猛長期
我係在職媽媽
疫情下公司唔掂 放咗好耐假
雖然錢搵少咗 但多咗好多好多時間陪住佢
尤其4，5個月後到一歲變化真係好大
好似每2星期就識一樣新技能咁
能夠見証住佢由反身到企到爬到行
總算得到比失去嘅更多
我他一歲生日果晚我望住佢瞓都係諗同樣野係咁喊。大得太快
不過過幾日又打回原形 
要時不時提住自己先得 
好明白你嘅感受
我bb五個月大，之前全埋身，到我返番工就每日食兩餐樽，而家啱啱開始加固，見佢食糊仔食得好開心，一方面我當然開心佢肯食，另一方面都覺得佢開始唔需要我lu…
bb真係大得好快~ 成日睇返佢初生d相，都仲係覺得成件事好amazing…
我嗰隻當時一個鐘食一次 我仲懷疑過唔夠奶，後來見人奶姑娘又話唔係，不過唔係個個bb有明顯猛長期
疫情的確增進咗唔少親子關係，見到仔女一步一步邁向新歷程，呢種滿足又係錢未必代替到嘅收穫
係，湊湊下又會忙+攰到唔記得自己早幾日諗過啲乜，又想佢乖乖哋又想佢活潑笑多啲，好矛盾
謝謝你分享
雖然我唔係埋身媽媽同埋Ftm, 只係放緊產假湊緊個一個月多啲既bb
而家踏入第二個月，已經覺得bb有唔同
頭一個月佢都淨係識得食、訓、痾，對佢都仲好有耐性同愛心
但係慢慢佢開始識扭抱、大喊、嘆奶 etc, 媽媽表示身心俱疲，搞掂左佢換片食奶訓覺，就到我自己泵奶洗奶樽食飯，有時仲要做埋家務，覺得multi tasking都唔掂
食飯同泵奶一齊做先至叫做好少少，但都會自私啲諗如果唔泵奶（其實奶量唔多）慳返啲時間咪仲好，但又唔想連少少人奶都俾唔到佢
再加上要應付屋企兩老⋯ 有時情緒都會到臨界點，變得好易喊
咁既狀態下，我就有你以上既心態，「點解唔訓覺呀」「點解食奶食咁耐呀」「點解又喊呀」，雖然內心真係好愛呢隻仔，但係好似現實上唔容許我有時間同佢相處多啲同觀察佢，覺得好可惜
同埋轉眼間我就放完產假要返工，一諗到咁就好唔捨得個仔，好矛盾⋯
加上呢兩日個仔好喊，我抱既時候好似喊得仲犀利，就對bb講左晦氣說話，後來先覺得應該係佢腸胃唔舒服，我就覺得更加後悔⋯ 因為知道bb已經識聽
Anyway, 多謝你提醒
我都會嘗試調節自己⋯
我反而係初生嗰陣冇乜耐性，因為我抱佢唔肯瞓，好似淨係識搵我食奶，玩都唔係同我玩，有時餵奶餵到精神就崩潰都control唔到自己情緒兇咗佢幾次。後來佢開始慢慢認得我，識得對我笑先好少少，但到而家好黐我又覺得過咗啲
返工要兼顧bb同事業都係一個新挑戰嚟，不過記得幾攰都要同bb相處多啲增進感情～bb大啲就會識得氹翻媽媽笑咖啦～