最近發現老公有外遇, 佢都認咗, 仲要唔係短時間既事, 初初佢係話想離婚, 但之後唔知咩事, 佢又無啦啦話都想考慮吓同我重新開始, 但因為佢話佢真係好愛對方, 唔可以即刻放低佢, 我心軟, 畀咗一個月時間佢去解決, 而家仲有1 星期唔夠就到期限啦, 但我知道佢仲有同個女仔聯絡, 而佢都明言未有提及到"分手"兩個字, 只係話大家唔可能再一齊。照呢個走勢, 我自己覺得佢唔會同個女仔分手, 而家佢係逃避, 唔想解決。但我真係仲好愛佢, 好想同佢重新開始, 如果到期限之時, 佢仍然選擇呃我, 話同佢已經分左手啦, 我哋重新開始啦, 我仲要扮傻咁繼續同佢一齊, 係咪好自虐呀… 
如果佢想同你一齊，就冇可能再同那邊一起。一腳搭兩船既男人，不值得花時間青春去愛。 明白你仍好愛佢，你也可想想仍愛他甚麼？你想揀咩人同你過一輩子？有誠信？負責任？…
D人話男人唔會做衰人講分手，總是無寧兩可…
會遇到一個懂愛你的人的
加油！
I feel really sorry for you… 
你地起初係以一個月做限期，一個月後就要斬鑬？佢係咪都應承咗你會同嗰邊斬鑬呢？
咁你呢大半個月覺得自己係咪仲可以相信呢個人呢？你同佢期望中的重新開始係點？建議你地傾下，或者搵下婚姻輔導。等有人guide住你地重新修補返段關係，如果之前有咩唔開心/問題都一併處理咗佢
你講既我都明白, 我期望有個愛我既男人, 但而家…我真係好辛苦, 又好執著
你哋結咗婚幾來？
係, 我哋係傾過, 畀一個月時間佢去處理, 一個月後就要斬鑬, 佢亦都應承過。至於信唔信任問題, 我相信要雙方努力修補, 而我亦都會選擇再相信多佢一次, 大家一齊面對今次既難關。只係我好怕我諗既嘢成事實…
最緊要識自愛，有資產就盡快分配好
2個讚
6 年
有仔女嗎 ?
佢話唔想離婚，可能只係唔想改變現狀。因為無論離婚定同個女人分手，對佢都係有改變，佢未必想承擔個風險，所以拖得就拖。一個月…你估如果果個女人死纏住佢，佢會唔會放手？講得話一個月時限，我諗你老公都係拖泥帶水既人。
你比限期佢處理已經仁至義盡。你要有心理準備，佢會同你講一個月唔夠時間，對方好慘，想比時間去處理，然後繼續拖，拖到你同個女人是旦一邊頂唔順放手，佢咪唔洗做衰人唔洗揀囉。
係好自虐，但感情事旁人不足道。唔係話一定要離婚，感性上仲未做到決定，你就試下理性去分析下先︰
1, 有冇細路
2, 離婚你夠唔夠養自己
3, 離婚你會攞返D乜
4, 離婚之後你會點安排生活
如果選擇分開，分居比自己適應左先，會冇咁難接受。
如果選擇繼續，你要預左有可能佢繼續同第三者保持關係，係咪真係可以同人分老公？頂到幾耐？
最後要點做都冇對錯架，最緊要你自己諗清楚，可以承擔後果。
2個讚
六年都話長唔長，話短唔短
從你嘅文字覺得你想原諒佢，重新開始，多於責怪佢，亦冇埋怨。
成日話莫教人分棲，如果你真係㨂同佢一齊返，預咗一定有條刺，佢一拎起電話，出咗街，你都會胡思亂想，要衡量自己心臟夠唔夠强大。當然喇，佢有心修補呢段關係，就會付出200倍努力同耐性去令你重拾信心。
雖然佢仲未表態，你都要有心理準備佢真係揀分開，你自己立場又點？要諗下自己，唔好俾對方主導曬成件事。
加油。
2個讚
你分析既嘢同我諗既都好相似, 知道佢而家態永都係拖得就拖, 因為佢唔想諗唔想解決, 拖泥帶水。
其實我真係好想好想自己可以瀟灑啲離開, 或者我都係一個拖泥帶水既人, 唔想改變現狀, 佢一日仲留係呢個家, 一日我都有機會令佢再次愛返我多啲.
我哋有1 個小朋友嫁, 如果離婚, 我一個人好難有足夠經濟去照顧佢, 而佢亦都無幾多錢可以畀到我, 我同個仔都會好辛苦, 而佢自己亦都照顧唔到個仔, 不過…到最後佢真係放棄我畀佢既機會既時候, 我諗, 我真係要做抉擇, 幾唔捨得幾愛都好, 可能分開真係對大家先最好~
多謝你既安慰呀!!! 其實呢段時間, 我都好敏感, 佢一玩電話, 出左街, 我真係好易亂諗, 但又要抑壓住自己, 唔好成日搵佢, 令佢覺得我好煩…
我仍然相信, 如果佢真係有心同我重新開始, 佢一定會比以前更努力, 而我哋亦都會正視返當初我哋既問題係邊度, 點樣一齊解決。
畢竟結婚就係一世既事, 你真係好愛一個人先會同佢結婚, 唔再係拍拖, 講兩句就可以分手…
有個小朋友比較麻煩，我諗你老公都係因為咁先拖。
離婚你唔會一個人承擔所有經濟壓力，因為佢要比贍養費。你坐低同佢好理性咁傾一次安排，比佢知道你係認真對待離婚呢件事，可能佢就唔想離婚，會即刻處理好個女人架喇。當然亦有可能，佢會順住安排離婚，真係話唔埋。
其實之前佢話要離婚, 又講到真係唔可以即刻放棄個女仔, 我係打定輸數離婚, 我亦都有去搵律師問過資料, 之後有一晚, 同佢傾到離婚後大家要處理要傾既問題, 佢話叫我畀時間佢諗下再傾。 咁當中, 我都有做少少挽留既嘢, 同佢講返我唔係想離婚, 但佢要走, 我都無辦法, 亦都提及到想佢諗吓大家係咪真係唔可以再重新開始。之後有日佢就突然話諗過我提及到重新開始既問題, 佢都想…但就要我畀時間佢解決, 當刻我當然唔想佢拖啦, 但太清楚佢既性格, 佢唔會主動提出分手(就算我哋要離婚, 都係我發現有唔妥而提出), 所以我知道迫佢即刻分都無用, 咁就寧願畀時間佢解決, 點知…一直都未見到有結果!
男人係想分手，兩個字架ja. 分分鐘打個電話就搞掂。比時間佢拖，即係唔洗處理住啦，咁又拖下先…根本係佢唔想面對個問題。
拖唯一不利果個係你，佢同個女人係一D損失都冇架，佢地不留都要偷偷摸摸，依家仲可以光明正大添。拖係對你最不利既選項。
一係試下扮介入比少少壓力佢，但介入得有技巧D︰我知你好難做，如果你真係想分手，我會企係你果邊，我同你一齊同對方講啦。大家都女人，我會講得令佢冇咁難受。然後我地重新開始。
睇下佢有乜反應，我諗到時你會更清楚佢想點。
1個讚
男人最叻就係拖字闕
佢一樣係同嗰個女仔講佢就嚟同屋企嗰個離婚架喇 
俾佢拖多你幾年你更加無能力獨立, 更加習慣現狀
十分同意，樓主你好好諗下，因為佢有兩邊女人要顧，佢實會好飄忽，一時sweet D一時又會令你懷疑多D，你要set 個底線俾自己：例如如果佢地真係繼續聯絡，你係咪就會離婚？呢D底線要講清楚，你係俾多次機會大家，俾時間佢處理，唔係俾時間你地去拖。越拖只會越傷心⋯⋯
好似呢D你相信嘅嘢，係你期望佢有嘅轉變，你要清清楚楚講佢知，如果佢唔做，就會係離婚收場。
我睇你的post，其實你唔清楚點解佢會揀同你重新開始，呢樣你最好同佢傾清楚⋯⋯因為所謂重新開始可以有好多種：純粹唔想離婚、純粹為小朋友、想慢慢丟淡對嗰邊嘅感情、會投入200%努力修補關係⋯⋯等等。
我知你好愛佢，但為咗留喺佢身邊而唔理自己開唔開心係唔應該的，亦無結果的。有時你為自己設想一D，保護自己多D，關係會更健康更長久。
1個讚
我唔可以介入佢同個女仔既關係裡面, 呢個我試過, 亦都FEEL 到佢唔想, 佢話佢會用自己方法解決, 唔需要有人畀意見佢, 呢個係佢同個女仔既事, 唔需要其他人教佢點做喎!!! 佢講到咁, 我而家只可以等…係呀, 而家拖左成個月, 我辛苦, 我老公都辛苦, 因為3 日唔埋, 2 日我又撩出黎問佢搞成點…咁如果佢未諗到點解決, 或唔想解決時, 我一問佢咪覺得煩囉…
其實一直咁拖, 大家都好辛苦, 我都唔明, 點解佢又唔明確表明自己想點?! 我都好想知佢心裡面個句…但佢唔肯同我講
係呀…佢而家對我都係一時熱情, 一時冷淡, 我真係好難適應, 發生左呢啲事, 當佢whatsapp 已讀不回, 我又會亂諗, 我唔知道之後我哋重新開始, 我仲會唔會有呢啲感覺, 我係一個好信感覺既人, 如果佢真係畀到我一個感覺, 佢真心改過, 無再講大話呃我, 我係絕對會100% 再次信任返佢。而我亦都表明, 限期前, 如果佢都解決唔到同個女仔既關係, 我哋就離婚啦!
多謝你畀既意見, 如果到時, 佢同我講已經解決左, 我就會同佢講我對佢既期望係點…不過佢亦都有講過, 我對佢已經無晒信任, 就算佢點做點努力都好, 佢話我都唔會信任佢, 有少少講到就係, 我哋返唔到去以前咁樣, 其實…係咪因為佢自己都無信心做到?! 因為佢未放得低個女仔, 又點樣對我有心思呢?