我預產期係舊年12月29日，27號凌晨見紅，此外完全冇其他生得嘅徵狀，照樣入院，不過當時都估可能好快就要退貨出院啦。到28號凌晨仲喺醫院過夜，但開始feel到有宮縮嘅感覺，大概十零分鐘一次，完全瞓唔到覺，但問咗好多個姑娘都話我只係假宮縮，因為佢地話真正宮縮會由個胃下面一路痛痛痛痛到子宮，但我就只有子宮痛(好似強烈嘅m痛感)
28號朝早駁埋機，見埋醫生檢查宮頸都話未變軟，冇咁快生，加上當時醫院裝修勁嘈，於是我就要求出院啦，臨走仲拎埋催生期。返到屋企，結果都係痛到冇辦法瞓到覺，我用apps記錄，其實平均六七分鐘就痛一次，但都係冇姑娘所講嘅由胃下面痛到子宮，所以一路我都覺得自己仲係假宮縮。
痛到29號朝早，已經十幾個鐘冇瞓過啦，心情好灰，心諗唔通要咁樣捱到催生期先生得!? 於是忍唔住上BK呻，結果好多人都叫我入返醫院，如果唔係到生得果陣行都行唔到，好危險….於是到下午3點幾我同老公就入院啦，心諗做多次檢查，如果真係話我未生得先算啦，第二次入院已經要推輪椅上房
上到房，登記同駁機嘅姑娘都認得我，循例問吓我咩情況咁，我就如夢初醒咁同佢講，「我覺得今日去廁所好似有少少滲尿呀…」於是就駁機前先搵醫生黎幫我用鴨嘴檢查
當時我瞓係床，一個醫生同三個姑娘幫我檢查，我Feel到鴨嘴入咗去，然後佢地幾個呆一呆，好細聲咁講(但又唔係講比我聽)︰「喂一打開見到頭髮啦喎」
我即時好緊張咁問︰「我係咪生得啦!?」 
醫生話︰「你開咗兩度啦! 同埋穿咗水，要即刻入產房」
原來我穿咗外層較薄嘅羊水，所以感覺就好似滲尿，真係好彩多口提一提先知咋，如是者就好緊張地入產房換衫準備生
然後醫生喺產房人手幫我穿水，穿咗水之後開始覺得痛感加劇，就要求聞笑氣，不過真心覺得笑氣一啲用都冇，仲衰多兩錢。一黎個罩會更加難呼吸，二黎聞完之後個頭勁暈，但就繼續痛，真係勁燥!!! 呢個時候我就同姑娘講我想打無痛，因為之前好多朋友都同我分享過唔一定打到，所以我果刻都開始處於崩潰邊緣，心諗咁痛法點捱到生果刻!?
好好彩地大概一個鐘之後真係有麻醉師黎咗幫我打，真係好感動!! 我打完之後真係頂到八成痛，由失控鬧緊老公變得high翻天(當然效果因人而異啦哈哈) 後來姑娘話咁多間公院入面得東區係唔會限制孕婦打無痛，佢話廣華定QE就一日得一個無痛Quota，叫我可以介紹想打無痛嘅朋友去東區生喎~ 我真係輕鬆到可以同老公吹下水瞓下覺休息，所以我真心建議各位準媽媽有得打最好就打
打完針，據說產程會變長，不過既然唔痛就話之佢變長幾多啦~
我係6點打完針，到12點就開始生啦，姑娘本身建議停藥後一個鐘再生，因為驚麻醉藥影響到我用唔到力，不過我要求姑娘比我試下，試咗一兩次佢覺得我夠力就開始生了，然後唔洗20分鐘就痾咗阿b出黎啦! 生之前我好驚剪會陰，但原來真係完全唔會覺得痛，反而事後清胎盤覺得仲唔舒服，同埋準媽媽記得，生果陣唔好望助產生/醫生塊燒焊頭罩，因為佢會超。清。晰。反。映。你。下。面。嘅。情。況! 怕血嘅千其千其唔好睇呀~
去私家用左好多錢
但姑娘又話唔拎開得