【劉公子爆料】劉定成揶揄「裸照Sir」吳樂俊出賣色相 永留寫真做證據
深黃的同志富商「劉公子」劉定成被爆早年跟現任港島總區高級警司吳樂俊有私交，這位有「警隊黎明」之稱的警司，曾赤膊自願到劉公子跑馬地寓所，做劉公子鏡頭下的男模。有指「裸照Sir」吳樂俊當時依劉公子指示擺甫士配合，劉公子至今手上仍珍藏那批相片。
去年逆權運動，劉公子不時高呼口號鬧爆「克警可恥，恥與為伍」，偏偏他卻跟吳樂俊有過短暫友誼，「我08、09年認識佢，當時佢係總督察，估唔到十年間搖身一變成為高級警司。我哋當年喺跑馬地街頭邂逅，你知我性取向㗎喇，佢當年係風度翩翩，成個才子，好吸引人望，而家平頭裝變成大陸仔咁，我冇興趣。我哋喺郵局撞到，一齊去飲咖啡，佢話九龍塘間屋裝修，要暫時住跑馬地，佢住豪宅，佢話所以要搵多啲錢。」劉定成表示吳樂俊有問他：「你覺得我靚咩？咁佢當年係，今日唔係，佢書生型，有學識、有樣貌、有高度但冇身材嘅一個才子，我刮目相看。佢話想拍廣告，無論高級警司或低級警員，一入學堂都教佢哋唔可以兼職，鐵飯碗嚟，但佢唔知喎，自己都去兼職，咁點教下一代警員？佢話想做model，但佢做緊督察，當然秘撈，佢朝住錢字看，出賣自己個良知。」
劉公子早年愛熱鬧，相約同性藝人大搞飯局，出手闊綽，跟他私交甚篤的吳樂俊可有花費劉公子的錢？他未有點名說：「老實講，多與少，開聲埋聲都10萬、8萬唔會少㗎，如果係綜援人士，送個口罩畀佢，佢都當寶，請佢食下午茶都多謝你，呢個係價值觀，多與少，啲人鬧我哋死基佬，我哋係為興趣，我哋人格係高尚，慘得過有人出賣自己靈魂，出賣自己肉體，出賣自己色相，為嘅係乜嘢？錢囉。」劉公子鬧的可是吳樂俊？「我指桑罵槐，揶揄吓咁啦，佢對唔對號入座，唔緊要，佢都可以開個記招澄清或者上港台《視點31》，我樂意奉陪。我哋憑良知，對得起自己良心，佢同我哋比，邊個人格高尚？邊個人格卑劣？我哋為良知，佢哋為錢囉。」劉公子承認仍有保留着吳樂俊當年寫真相，他說：「啲相唔使丟，將來有人攻擊我，我都有證據喺手，證據永遠唔好丟，永遠keep住用嚟傍身。」
劉公子講完吳樂俊，他再逐個點評早前主持警方例行記者會的警察公共關係科（PPRB）一班阿Sir，「謝振中，我叫佢冇眉Sir，佢舉家去美國入籍，我祝佢好運，佢已離開PPRB，講多無謂。Er Er Sir（江永祥）口吃嘅，呢個有語言障礙，佢思維令我捧腹大笑，佢話警察拉開許智峯眼罩噴胡椒噴霧，因為估佢唔驚，不如噴入佢口，問佢食唔食胡椒噴霧。」
逐層推進，劉公子為警務處處長「PK鄧」鄧炳強改新花名做「鄧小強」，出處是黃子華主演無綫處境劇《男親女愛》，他養了曱甴叫「小強」，「鄧小強先生係中大社工系畢業，成日話社會動盪點搞，邊個令社會動盪，成日話止暴制亂，我就覺佢係濫暴製亂，係咪都拉。鄧小強話對21警『訓斥』，21警都冇事，唔落鑊，我就話佢係『糞斥』，米田共個『糞』呀。盧偉聰年代，佢十居其九，全部都唔批准遊行，但到鄧小強，佢全部都批，想引你出嚟，然後腰斬，話（示威者）破壞遊戲規則，偏離行道，限大家30分鐘離開，示威者上天定遁地？疏散唔到，夠鐘就拉人，話你非法集結、行為不檢，拉你唔告志在下馬威，呢個毒招，係講得好漂亮。」劉公子也不屑PK鄧經常罵巿民是暴徒，「咁你哋有冇暴政？鄧小強敢唔敢對香港巿民講，冇搵孔武有力便衣喬裝混入示威人士中插贓嫁禍、冇去放火、冇去掟燃燒彈、冇去灌水、冇去港鐵站搗亂？點可以一口咬定黃絲做？你攞證據出嚟。」
劉公子嘲笑特首林鄭月娥的司級班底，「唔係律政司，係死屍個『屍』，全部『屍級』，搞成今日咁，始作俑者係林鄭同佢啲『屍級』。」劉公子又為林鄭月娥改諧音花名「鄭越訛」：「佢出世時，父母可能想話佢係月裏嫦娥咁漂亮，但出到嚟效果越嚟越訛騙，佢做嘅嘢唔恰當，佢要一個金剛罩保護自己，金剛罩就係香港警隊，佢舊年9月落區同巿民對話，9點散場，但林鄭凌晨1點先出嚟，嗰幾個鐘，佢換便服定大吃大喝？出嚟又G4、又防暴警、又速龍小隊護駕，但佢都龜縮，呢個人點做香港特首，乏善足陳。呢場肺炎佢做到啲乜？唔封關，巿民搶口罩，佢向十八區打算盤去搞防疫中心，搞到巿民黃與藍都憎佢，民不聊生；佢又喺鏡頭用眼淚搭夠，又唔戴口罩，又話擔心醫護安危，全部貓哭老鼠假慈悲，正一慈禧太后。」
撰文：陳杰
攝影：郭賢興、陳慧安
攝錄：廖達燊、馮嘉銘
場地：火鍋頭
