有無巴絲會係澳洲生b 或者已經係澳洲生b？ 比較兩個地方嘅醫療系統，好似香港好啲，但係去澳洲生就唔使錢（因為係citizen)
有冇巴絲可以分享吓經驗？
我第一胎香港東區醫院, 俾錢住私家病房(2個人share一間房), 每晚$3000, 住左兩晚
第二胎Royal North Shore Hospital, public, 一個人一間房, 住左兩晚, 唔洗錢
首先講下産檢, 香港平均等三個鐘好等閒, 見就10-15分鐘, 我有妊娠糖尿又有啲産前抑郁, 每次見midwife都俾佢閙到喊, 見完佢地次次都更抑郁, 血糖勁高
澳洲平均等半小時, 見就半小時至一小時, 姑娘好有耐性同你傾心事, 關心埋香港大事, 見完次次覺得好窩心, 笑住走
事前準備, 因我有貧血, 懷孕期更嚴重, 香港俾鐵丸, 去到生時仍然貧血, 生完我大出血成個人虛脱；澳洲醫生話鐵丸對我效果唔夠, 直接輸鐵入我血液, 唔洗錢, 如出去買要港幣幾千蚊, 生完我出血量比第一胎多, 但面色依然好好
催産前檢查, 香港護士全部都好專業, 同埋都係女護士, 手勢好冇hard feelings, 種豆果啲一次搞掂; 澳洲安排啲似乎係見習醫生俾我, 我血管幾好, 但篤你三次唔成功, 第四次先搞掂, 仲要四個位都魚左, 生完兩隻手都痛, 催産前一日去檢查宮頸, 原本講明果日入院, 帶曬所有野, 結果個男醫生(纹身+粗魯)檢查完話我唔洗落药催生, 唔洗入住第二日先來, 佢檢查完我果晚超唔舒服, 流紅, 第二日去産房穿羊水時(三個護士都無辦法穿我羊水, call醫生), 個醫生穿完同我講, 羊水一早已經穿左, 唔係佢整穿, 懷疑前一日已經穿左, 我仲沖涼果啲, 好危險
産房, 香港係先住病房, 老公到時候要離開, 開左兩至四指先可以入産房, 入左産房就有接生護士睇住你, 不時有醫生檢查, 地方細, 我不斷聽到有人話生左喇, 生唔到要開刀果啲聲音, 出出入入好多人
而我生左廿八個鐘, 好大壓力
澳洲一入去就去一間有三百尺嘅私人産房, 入面有獨立廁所, 有分娩bath, 以為自己去左五星級酒店, 老公可以長stay.
生時, 香港有四個護士即時候命, 有個年輕男醫生, 但佢唔識處理大出血case, 好快叫左個高級醫生過來；澳洲有一個護士由一開始跟你, 穿完羊水又係得一個, 我話就來生都要我等, 等左15-20分鐘先有幾個醫生護士入來幫我, 我差啲以為自己就咁生出來(陣痛到生只用了40分鐘), 可能果晚特別忙啦, 個個case都唔同啦, 但聽講有人陣痛但被醫院彈番屋企等開四指, 最后喺屋企自己生左
生後, 香港我入住二人半私家病房, 但依然好嘈, 老公唔留得夜, 我生手加貧血搞唔掂個B叫護士湊, 佢地都好樂意, 醫院會幫沖凉, 換片, 餵奶, 即call即到, 唔知關唔關私家病房事, 我餵唔到人奶喊, 有護士好好開解我
澳洲大部份都係一人病房包獨立廁所, RNSH可能新裝修所以咁正, 聽講其他醫院冇咁爽, 有啲病房大啲有couch可以俾老公留夜, 我果間係intensive care, 冇couch, 老公唔留得低, 但就好寧静, 個B全程自己湊, 一開始抽住尿袋仲要幫個B一晚換幾次屎片真係人都顛, 你叫護士幫, 佢黑我面, 話要我自己來, 當時我個B係細B, 第一胎係大B兼頭十日我都冇自己換過片, 所以真係好生手；餵人奶方面, 澳洲啲護士比香港更堅持, 而且好肯花時間幫我, 香港問我係咪餵奶粉, 我話係佢地就餵奶粉, 澳洲呢邊護士教我express milk出來, 幫我擠左半小時储左20ml, 好L痛, 但好彩果半小時擠通左我一邊奶, 另一邊之後勁塞, 通到我半死先通到；澳洲護士一晚入來三四次幫我餵人奶, 後來發現個B吸得唔好係因為舌根痴住, 安排醫生幫阿B剪, 剪完阿B就吸得好好, 又有醫生入來檢查個B, 發現隻腳需要轉介物理治療, 即時安排物理治療入房同我講解, 短短兩日兩夜, 解決左好多問題先安排出院
出院後, 香港醫院已經交俾健康院處理, 五日內去打疫苗, 等好耐不在話下, 生完五日就出去個人真係企都企唔穩； 澳洲出院前先打幾針疫苗, 自己帶B去GP打針已經係一個月後嘅事, 澳洲頭兩個星期有醫院護士上門來探我, 幫BB check發展, 來左兩三次(唔記得左), 之後有健康院護士首次家訪, 第20朝帶個B去健康院check發展, 兩個月再去健康院, 護士評估我産後有抑郁問題, 同我單獨傾左成個鐘, 又揾左同行屋企人一齊傾左成半個鐘, 想幫我解開心結, 再幫我個B安排物理治療, 同安排我同老公去見心理醫生, 呢啲全部免費, 幫左我好多好多
喺香港, 我都有産後抑郁, 都有餵奶嘅問題, 但全部自己搞掂, 冇人可以幫到我, 呢邊護士聽完香港嘅産後安排都o左咀…澳洲産後真係超級到位！
宜家我個B就六個月, 全人奶, 隻腳見完四次物理治療師已經好番, 健健康康就最感恩, 而且無花過我一分錢, 仲有洲政府送嘅新生袋, 價值好似成$180, 唔嫌麻煩仲可以申請牛奶金
希望呢啲經驗可以幫到大家作為一個參考, 兩胎情况都唔同, 所以都好難講
6個讚
嘩絲打覆得好details, 而家其實我老婆都未定係去澳洲生定點, 不過你既經驗真係好值得參考呀thanks x 30000 
1個讚
除咗生嘅過程，記得都要考慮坐月嘅情況
喺澳洲唔知d藥材齊唔齊，靚唔靚 十月懷胎噤辛苦，加上坐月對身體重要記得要考慮埋
1個讚
好多都香港帶過去, 不過呢邊其實都有
紅棗杞子黨參花膠果啲都帶得(我C6帶紅棗話有核被沒收, 但我帶連箱都冇開就pass)
滴鸡精我online 喺台灣直接送貨過來
鹿角海參燕窩肯定唔帶得