經過上年既社會運動，對香港未來無信心，自己就唔想生，同c6傾過之後，c6都明白同表示佢自己都對香港未來無信心！
99好想抱孫，每次見99都有意無意話如果我地有仔女就好，其實99都知我地點解唔想生，但佢既諗法係個個香港父母都係面對同樣問題，點解人地就生得，你地又唔生！p.s. 就算我生，主要都係自己湊，99唔駛幫手湊！
最近c6開始轉軚，話都係生小朋友好，第時老左有人照顧，我覺得生小朋友唔係為左自己老左有人照顧，我只要我小朋友將來自己照顧到自己生活得開心就夠，我唔會為左養兒防老而生囉！
自己其實幾鐘意小朋友，但一諗到平時玩人地既小朋友就開心，因為自己幫手湊過一兩年，知道玩同湊係完完全全兩回事，自己有時都會諗係咪自己諗得太負面，但諗深一層，生小朋友係真係咁唔簡單，唔係諗，係真係要面對好多問題！諗到呢到真係放棄生既念頭！同埋雖然c6把口話如果生會幫手湊，但覺得佢又係玩就掂，湊真係搞唔掂，到時想生又唔係我，生又係我生，湊又係我湊，咁咪好搵笨！
大家有冇因為夫妻對於生b既諗法有差異而成日嗌交？又有冇因為香港前景而對生小朋友而卻步？歡迎大家討論討論
首先你個標題錯：c6 成家人關你生 bb 咩事？只有父母有權出聲，其他人係外人，有邊個奶奶唔想抱孫？但最後面對問題嘅都唔係佢
你同你老公意見最重要
我睇法：你愛小朋友要預埋兩公婆感情差、錢(要移民)、政治(例如行一國一制，廿三條一定通過)、仲有佢有病有痛有 SEN都接受到
點解要理人地點諗？小朋友係你嘅 生左出黎你湊你養 要對小朋友負責嘅係你 最重要嘅係你想唔想要
你都已經係個成年人 唔通人地話點你就要點做咩
我覺得冇可能因為"人地" 想抱孫，而迫我做父母囉，由day1唔生到而家day n 都唔生…唔係因為自私，係因為我真係負責任…
我覺得因為想有人照顧而生係最唔負責任…
同c6講，移民咪生，唔移唔生
有錢就生，無錢唔生（夠買樓俾仔女，夠去外國讀書）
現在地政署署長查黑警都俾人燉冬菇，普通人點生活。除非老公轉做黑警，做既得利益者，咁就無嘢擔心
都明白樓主想法, 而家香港咁嘅環境真係唔想生BB
生BB責任好大, (當然帶來嘅快樂都好大), 考慮清楚自己嘅能力, 同先生也要有共識, 否則係好辛苦
唔好理其他人點諗
條路自己揀
__唔好喊
責任係父母嘅
同埋
養兒防老好outdated㗎喇
而且呢個都唔係一個好嘅態度
無人包生仔
我同老公共識係生3個
但依家我講咗
留喺香港嘅話就唔再生
留喺度，生1個都都覺得害咗佢呀
兩公婆共識，不要理會別人
為左老左有人照顧就真係唔好諗，留啲錢入私家老人院好過。
不過你老公可能年紀開始大，見到身邊人有小朋友，所以又心思思，我好多朋友本身話唔生，過左幾年都決定生
養育下一代係一個好大嘅責任，尤其喺香港更大壓力。
好多人覺得有小朋友家庭先圓滿，亦好多人話小朋友帶來嘅快樂係無價嘅，我都認同，但亦有唔少夫妻因為小朋友而面臨婚姻問題，所以必須慎重考慮。
而且呢個年代都唔好抱住有仔女第時老咗就會有人照顧呢個想法，有時想法同現實會有落差的。
頭幾年最辛苦，不過管教得好會多好多喜與樂同埋吸收多在年青人既知識，而家我屋企就好似多在兩個朋友仔，得閒會一齊打機打下麻雀講下笑
一定要以自己同老公做前題，生左就係一世。我就無信心佢喺香港會開心，所以暫時唔想生。。。
其實生小朋友是但一邊覺得唔ok都唔好生住，廢事生咗出嚟係度怪對方話點解個時要生，香港幾差都唔慘得過屋企日嘈夜嘈。生一個小朋友責任好大，好多嘢要諗，當然香港而家呢個時勢同埋疫症都會係考慮因素。
咁想要bb，叫6299自己生飽佢
多謝各位既回覆，我會繼續堅持自己，唔生，要生自己生飽佢
呢個時間真係好矛盾，以前未結婚好想生，宜家就麻麻，但好驚C6過幾年先想生，到時年紀大又生唔出 
早幾年未結婚已經講唔想做高齡產婦，C6成日話好多人40歲都生到⋯⋯好似講到想有就一定中
明星果d好多都係
仔女老左唔一定會照顧你
根本就係自己要好好評估過而家咁黑暗既環境+有資源養仔女+夠錢養老先好生, 缺一不可!
利申: 唔生, 諗住老左環遊世界完就去瑞士安樂死算
如果你本身唔想就唔好諗，因為最後生咗出嚟又要湊又激氣又擔心個時你實會拎返出嚟講個時都話咗唔生㗎啦，生一個小朋友責任好大的，到你頂唔順個時叫你生個d人只係會講低一句做呀媽係咁㗎啦，不過有時好得意，可能有一日你會突然想生，緣份嚟嘅
你幾多歲？你唔想唔好迫自己住，拖下佢地先。。。