我同老公結左婚六年，婚後第一年分開異地工作所以保持到激情，生第一個之後發現同老公好多野都唔同意見，鬧過離婚但不忍個小朋友單親成長，同時又認為問題未差到咁，溝通過後大家互相遷就所以還好，其實大家只不過變得更加忍耐，佢工作忙，成日好夜返屋企，我又每日早起返工，我同佢差唔多無咩交流，交流內容離不開個小朋友，我仲發現佢之前喜歡同朋友出去食飯多少過留係屋企，我明白無可能長期熱戀期咁，但係都唔係咁下⋯⋯最近交流多啲因為大家同顏色，但係大家都對對方嘅容忍度減低左，好易爆，可能現在社會充滿壓力⋯⋯我既心情真係唔係太好，有時會問自己點解要結婚⋯⋯有冇同路人可以分享下
會唔會weekend 交低小朋友比屋企湊
兩公婆去拍下拖呀？
睇下會唔會有返d sweet 既感覺
我同老公星期一至五，有時星期六都返工，個小朋友想見下我地，想我哋同佢玩，所以放假都係三人行
結婚前拍拖耐嗎？
我都好怕自己第時會咁⋯⋯不過如果冇左熱情 可以成為交心同互相扶持嘅親人都好嘅。
好彩你哋同顏色咋！如果唔係會更慘，因為顏色唔係政見，係有冇良知同邏輯嘅問題。
1個讚
拍左三年，一路都知佢比較固執，一向由佢，去到湊小朋友嘅事都唔得，所以身心疲累，成日吵
三人行都可以浪漫，從後攬攬，0錫女嘅時候0錫埋佢，佢餵個女時，你話我又要，要佢餵你。
其實大家好多時忘記自己以前戀人身份，以為有咗仔女，就要係小朋友面前正正經經，我老公有時都照樣係D仔面前抱起我，由得D細路笑下，呢D都係開心回憶。
2個讚
咁一齊都差不多10年
嘈得多係因爲你可能仲expect佢會做好d
如果你對佢無任何要求，應該唔會再嘈
大家可以分工下嗎？例如你多d理屋企，佢就負責多d家庭開支
咁諗，你估徐子淇會唔會嘈佢老公唔識得照顧小朋友呢？
大家研究下點係呢個家庭搵返自己嘅角色可能有用過expect你老公會改善
2個讚
我都會成日鍚C6，因為我識佢嘅時候已經知佢好木納個種。所以成日要保持一種戀愛的感覺，所以我都會主動鍚佢，同佢講我愛你，我地結左婚就黎20年，瞓覺都會拖佢隻手卜著佢手臂瞓。因為一世流流長，一耐左就冇曬激情就好難維持落去。或者你試下主動D。
3個讚
同意!
有時候，自己可以主動D，有時又要係老公面前故意做D論盡野，等大家可以笑下
喜歡同朋友出去食飯只係因為佢講野D朋友會笑，並唔係佢鐘意D朋友多過你。
你留意下自己同佢飯時佢有幾多次講野可以引到你哈哈大笑? 放鬆D，笑多D
既然大家都唔想離婚，你可以先改變自己，笑多D、欣賞佢多D，佢會感覺到，好快大家關係都會有改善 
2個讚
男人就係咁㗎，冇咩情趣，大家耐左就失去戀愛感覺。但當你一諗到要離開佢，個心又好痛，咁即係仲有得補救，主動D。溶化下佢，一定得㗎。唔好成日向離婚個面諗。加油呀樓主。
1個讚
試下一個月抽一日/一晚2個人出去拍下拖
而家酒店咁平 book一晚游下水 食餐好
我地夜晚通常一齊睇下劇、整下消夜食，會多d話題
1個讚
我生小朋友後，都覺得同老公關係勁差，大家忙湊小朋友，又倦，都冇精神理對方，又容易緊張小朋友，對老公有更多不滿。
後來睇多點相關書藉，節目，才知這是普遍生小孩後的婚姻危機
跟住自己先冇咁負面，覺得我只是「正常新手父母」的其中一對。
我哋搵過輔導傾，搵成熟既朋友呻，再決定每星期抽一個時間（可能3個鐘）拍拖傾計，做d大家開心既事，學習對佢包容欣賞尊重…現在小朋友4歲，關係進步過頭2年，仍在努力中
3個讚
生小朋友都之後都要保持戀愛嘅心態。我同老公成日攬攬錫錫，呀女聽到我問：有冇人可以過來攬下我呀?就會同爸爸鬥快過來，仲笑得好大聲。
夫婦夜晚二人世界都好緊要，長期冇嘅話可能好快變成親情，大家為左小朋友，忍對方下半世，將將就就過埋佢就算。
1個讚
之前睇八字，懷恩師父講過夫妻會有合唔合既時候
我同樓主情況差唔多，但更大鑊係我同我老公溝通唔到，但佢覺得佢冇問題
佢個人性格好急，乜都要快，連講嘢都好快。一諗到嘢就講，一輪咀咁講哂佢要講嘅嘢，例如一次過講晒話題A,B,A,C…係呀，係跳嚟跳去9唔搭8的。到我想回應佢嘅時候佢就彈走咗啦
而我有嘢同佢講嘅時候，佢聽完嘅反應係⋯⋯哦；唔；又或者冇反應。我問佢聽唔聽到我講嘢，佢話聽咗囉，跟住重複我講嘅嘢，完
係呀，佢係有聽我講嘢，但只係 ‘listen’ but not ‘understand’囉
小朋友出世之前我已經發現呢個問題，但當時都仲有時間二人世界下。到依家第二個小朋友出世之後我哋忙到直頭連同枱食飯時間都差唔多冇。我已經灰到一個地步係覺得做咗媽媽之後係唔可以有拍拖嘅感覺，要訓練自己對感情冇要求，所有情緒要自已處理，全部心機同時間只可以用嚟照顧屋企同小朋友。我的人生已完 
我老公都會成日出街陪朋友, 超多飯局, 但可能咁多年黎都係咁, 我都由得佢喇, 自己有自己嘅時間, 搞掂啲小朋友就會上網, 煲劇, 我都好享受, 反正我睇嘅佢未必睇, 佢睇嘅又未必啱我口味。反而係最近停課, 小朋友課業無咁緊張, 佢地反而有怨言, 話爸爸成日都出街, 連放假都連續幾晚出街唔陪佢地玩。
我覺得最重要係自己心態點樣睇, 相處得舒服就可以。早兩年都有段時間內心好掙扎, 例如知道佢會去啲夜店, 又成日飲到成身酒味返屋企, 已經睇化咗喇, 佢有俾心機照顧同關心小朋友, 盡咗爸爸嘅責任, 已經唔再諗其他要求。
2個讚
建議試下family counselling , 兩個人多磨擦好多時喺各有誤會同唔明點解對方咁做，如果仲有感情唔想失去對方值得一試~