做後母，真係好痛苦。
我同未婚夫同居3年，準備結婚，佢本身有個女，大家相處得唔錯，由同居開始個女已經叫我做媽媽，我對佢亦都一直視如己出，由以前唔乖都開始乖乖地。
但係個女越大，佢思想出現錯誤的價值觀，常常講大話之餘，仲一味扮可憐，原因係爺嫲太寵！
早幾日，我比模擬試卷個女做，結果佢為左得到自己想要的獎勵，選擇出貓，而且係比我發現的第三次了。我同老公教訓佢，佢仲發脾氣話我唔係佢媽媽，我好傷心係咁喊，結果老公比我更生氣，要爺嫲接佢走住幾日，等我無咁傷心冷靜左先。
爺嫲一到問咩事，老公話佢出貓，唔知錯，仲講埋啲咁既說話。爺嫲聽到後表示，出貓好小事啫，佢聰明呀嘛…細路仔曳係正常架…佢夠成日發脾氣話我地唔係佢爺爺嫲嫲啦⋯⋯講下咋嘛⋯⋯
好啦，原本冷靜幾日，個女前日話番，用藉口留多一晚，尋晚又用藉口留多一晚，藉口話出街晏左好攰眼瞓。但係我地2間屋住隔離座。
我覺得比人破壞緊我屋企呀，而我唔知可以點樣救番個屋企，有無人可以教下我呀？
個女幾多歲？
就8歲
小朋友出貓好平常，最緊要教返好佢正確嘅價值觀。發脾氣亂講嘢唔好放喺心，細佬仔唔識嘢。
已經係第三次出貓了，我無佢辦法，但都唔應該係佢面前講好小事，仲讚佢聰明吧
有無得教下我
小朋友為心愛禮物出貓其實係好正常，佢個心只係為份禮物，何況係屋企做，你要先了解個份咩禮物，點解佢咁鐘意，責罵只會帶嚟反效果，始終佢唔係你親生，呢個係事實，佢一有咩不滿，隨時又再講出口，另外爺嫲照顧方式係咪同你地有好大出入？ 講衰D，兩老會唔會係女面前講你壞話？ 我細女小一試過冒老師簽名，我地發現咗，無罵佢，了解咗原來怕拎手冊俾老師（膽小），解釋俾佢知，佢都有喊，但再無咁做啦，記住，小朋友思想簡單，佢地唔諗後果做事，要俾佢知點解唔可以再做，千奇唔好將自己一套套落小朋友度
1個讚
要俾佢知道出貓係唔會得到禮物
頭兩次都有解釋比佢聽，唔識唔緊要，但唔可以出貓，唔可以無努力去得到獎勵。
我知係事實，都明佢爆喊下講出口係發脾氣，但當時我真係好難受，不過都過左去啦。
嫲嫲係有係個女面前講我嘅，個女同番我講嫲嫲話爸爸媽媽好嚴，搬番去同佢住啦，多啲時間玩，唔使做作業，嫲嫲教你功課咪得囉。wtf，學校功課黎架，停課不停學wor⋯⋯而且佢所謂佢教，就係唔識當佢啱。
當然啦，我覺得個女有吹大左既成份。
然後佢就話我唔係佢媽媽囉T.T
你好好，真心為小朋友好，想教好她
如果唔用禮物做獎勵，而係例如「同爸爸媽媽一齊整嘢食」之類，總之係你地一家人自己圍內嘅活動做獎勵呢？會唔會好啲？
咁你試下下次同佢一齊做份卷，我諗要時間教佢，屋企錯唔緊要，最重要係出面唔好錯
我覺得唔好俾個女知道呢句“你唔係我媽媽”係你既死穴，第日青春期再反叛d會用呢句說話黎控制你
下次你聽到呢句說話反而要更加堅定，若無其事繼續教，俾個信息佢“我唔系你親生亞媽，但我都有責任教好你”，等佢呢次可以去避難咁爽呀拿！
我好欣賞你咁上心教佢，我兩個小朋友係親生，有時我激氣到想一走了知
6個讚
生娘不及養娘大，jm妳好偉大
1個讚
我之前教小朋友都係咁做
一起做，知道那裏有伏位
及小朋友見你做，他唔敢唔做
不過樓主真係好偉大，做人阿媽已經難
做人後母難上加難…對小朋友太惡
又會俾人話後底乸
唔教好，又會俾人話唔理小朋友
1個讚
雖然我唔係人後母，不過都為人母，嘗試俾d意見。
1.所有長輩都或多或少會寵孫，可能覺得時日無多，何況真是缺乏親生媽媽的孫女？教的責任落在父母，所以盡量不要在長輩面前講孫女任何缺點，只會衍生更多問題。
2.不要樣樣拉上都拉上後母身份，反正就是借長輩保護的叛逆少女（年紀未到，心態很像），叫得你媽媽，為何又說傷人心話？很多子女都會說話傷害父母，就算我咁大個人也會。不是因為你是後母而這樣做，因為我們總習慣把情緒發洩在最親密的人身上。即使親生也不會很聽話很乖，現在的小朋友都有很強烈個人意志。
3點解呀囡唔返黎？唔一定是嬲你地，嬲自己都得，無面見你地都得，很多小朋友是很愛面子。有時怕你們唔接受佢。要俾佢知道無論做錯咩事都會包容佢。要親自接佢，抱佢攬佢。做錯事仲要抱？人總會做錯事，家庭應該是無條件包容及接納，有愛有得教，無愛無得教。
3個讚
其實小朋友真係聰明才比較古惑, 當然要慢慢教，例如話俾佢知出貓係會失去誠信，以後冇人信佢講嘅嘢,如果喺學校做會好嚴重，因為破壞咗公平, 問吓佢如果同學出貓佢會點. 另外發脾氣乜都噏得出，可能因為真係唔係親生，所以你好介意. 你可以話佢雖然唔係你生,但你錫佢唔會比佢親生媽媽少. 而你自己心底最深處都要放開呢個永遠不會變嘅事實. 父母同小朋友也可以朋友方式相處. 至於今次件事，你同你老公最好一齊去同佢傾吓偈,至於番唔番屋企,由佢自己決定
1個讚
我覺得未必關後母嘅事，係爺麻嘅價值觀
8歲…咁大個，我相信佢明自己唔岩，但又唔想冇左禮物，仲受唔到爺爺嫲嫲既誘惑。
試下先同個女坐低傾下，問返佢出貓岩唔岩，要soft d, 傾閒計咁，8歲有佢價值觀，由佢把口講好過你講。講完問題，一齊諗解決方法。記住每次發現問題，或佢對你坦白唔識，唔好嬲，要正面鼓勵佢，表示認同佢同你分享睇法同心事既行為，等佢放心將自己諗法講出嚟。然後要一齊傾同諗解決方法。因為發現問題只係開始，目標係解決佢，過程要鼓勵個女諗方法，你只係提供方向同幫手。如果解決到，佢唔止有自信，仲會更信任你。例如出貓，點解出貓？唔識？唔願做？唔想花時間想快d完成睇電視？唔同方向既解決方法都唔同。唔識，係咪太深？咁做返淺d先？媽咪同你做幾條先？想睇電視？咁安排另一時間做？
平時多d傾計，最好係無聊嘢功課以外，例如依家流行既卡通？有冇同學唔食菜？覺得短頭髮好定長頭髮？等佢習慣同你乜都講，無聊野都講一餐，甚至建立你兩個既小秘密，增進平時關係。呢d關係係用黎鬧交時扣hp架。最重要係，希望佢同你多話題過兩老。
本來屋企唔完整，小朋友心中或多或少有不安，如果背後有好錫自己既長老，係有助舒緩佢哋不安情緒，因為佢知道屋企點變都仲有爺爺嫲嫲依靠。但你果兩個老人家唔止係豬，仲係邪惡隊友。你係後母，教女既事好難由你開口，叫你老公同佢父母講清楚，叫兩個老人家唔好阻人教女，反問返佢地點解要教壞品德。
做人阿媽好難，後母更甚，明明想個女好，但一惡就好易比人話後底毑唔錫女，真係好難做。遇著豬隊友更加雪上加霜。但你平時付出既愛，我相信你個女知既。佩服你選擇做後母既勇氣，加油
1個讚
起碼你先生支持你，加油