阿仔今年13歲，今年中一，去到中學開始識到新朋友，不過佢嘅新朋友極爛口、爛玩、少少霸道。
問心我真係唔想阿仔痴佢咁多，但係我明白要尊重佢交朋友嘅權利，我都做過13歲，知道差唔多時候係覺得老友兄弟好緊要，我無可能當佢小朋友咁，直接叫阿仔唔好同佢玩…
我唔知點處理好……大家有建議比我嗎？
講多少少，阿仔而家都好有分寸，知道乜野應該做乜野唔應該做，我明白要信任佢，但係我真係好擔心如果阿仔繼續同呢個同學做朋友會點呢？而家停課有時佢地瘋狂打機，如果我仔話唔打住，佢地會勁炸我仔whatsapp，好反感……完全唔知點好
有無辦法安排佢多D 活動, 提供一個新環境佢認識GE新朋友, 分散佢GE注意力, 同樣佢可能更忙. 一係九月開學會唔會轉新班.
我期望緊佢會轉新班，慢慢疏遠，但係阿仔人緣唔錯，好多同學即使已經唔同班、唔同校都仲會keep contact，所以我諗緊點樣提醒佢遠離呢個同學，亦諗緊好唔好咁做
我對呢個細路咁反感，係因為我仔已經解釋比佢聽點解要留家，點解要停課，但佢仲不停要我仔出去踩單車，我仔話唔出，佢仲要問候我呀！一睇到勁想打去問候返佢阿媽轉頭！
試下扮下野問佢
覺得升左d同學點呀,
邊個最乖,邊個最曳,邊個成績最好,邊個最差,等等
講粗口?唔掂喎,下次話俾老師聽…(講笑咁
然後問下佢同邊個最fd呀
或者叫佢叫d 同學上黎玩
我囡14歲f2.基本上佢全班最乖最曳最活躍係邊幾個我都熟哂
佢都唔係乖架,一樣中意打機唔訓,但冇咩其他壞習慣我都由佢喇
不過如果佢升班有機會轉班既
就盡量潛移默化佢唔好接觸呢類同學
就咁睇你個仔都好有自制能力，就算個fd叫佢打機佢都唔打。
whatsapp炸你個仔姐，你仔嫌煩會同佢講啦，呢方面你唔洗咁緊張。同埋而家啲初中中學雞溝通方式就係講下粗口咁，想當年你都係咁啦，無咩大不了，返到屋企唔講咪得囉。比啲空間佢，咁大個人知咩係應該唔應該。
可能係我諗多左啦，因為見到佢呢個同學我就諗返起我當年，當年學壞之路第一個開始就係講粗口，因為細個無屋企人理，所以越黎越衰，好怕阿仔會行左我條路
呢個年紀好尷尬，聽朋友講多過父母，話多兩句反面都似
如果佢d同學都講粗口，叫佢自己完全唔講係冇可能，唔係點埋堆。佢話唔講你都唔信。試下表示明白佢好奇想講，但粗口係唔禮貌，佢「咁大個仔」自己要知分寸邊d場合唔講得，唔係就要承擔後果（例如學校講實記名）。
我女中二，中一開始竟然講粗口，知道有一個女同學勁爛口，我都好唔鍾意佢。
唯有同佢解釋點解唔好講，叫佢講其他字代替，好在佢都算聽話。不過有時講得多佢都會嫌我煩。
有試過叫佢帶同學返黎玩，見到個女仔係好斯文款，完全唔係壞學生樣，咁先放心d。
我唔係呢個年齡層亦無子女。
但我13歲初戀，仲唔聽阿媽講去左男朋友到過左晚夜，不過無失身嘅。
當時已經覺得第一次好重要，唔覺得值得俾佢。
我當時都講粗口，大左幾年個個禮拜星期六曰夜晚同同學去公園飲酒同玩。
表面上可能d同學係曳嘅，但佢地食煙，係唔會俾我食，我想試一啖都叫我唔好。佢地亦好照顧朋友，講粗口唔等於壞嘅，我都係覺得佢地唔壞先同佢地玩。
當然大個諗返先醒覺當時媽咪一定一定好擔心啦…
一路到出黎社會，我都無學壞到。
其實壞唔壞，好睇本性嘅，你有教/佢識得判斷，有獨立思想，會分是非黑白，其實就帶唔壞嘅。
因為我父母都無教過我任何野，所以真係幾睇天性。
我仔用個do字黎代替，有時見佢勁do
多謝你分享呀，我都認同好睇本性，我都做過13歲，都明佢諗乜，但係有時好驚我白己脫左節，估唔到而家13歲會做乜野，又唔想做麻煩長氣阿媽，所以又擔心又唔敢哦咁多…
不過距離開呢個po都一段時間，都諗通左d
最緊要佢要做一個有良知嘅人，粗口只係好小事
其實就算 Band 1 女校有時候 WhatsApp 都會有粗口 (唔係話好，但宜家年代變，粗口唔再係 “十八大禁”)
你仔仔都有自制能力，如果佢真係覺得煩，會自己出聲叫停，而朋友尊重佢嘅話亦會收斂。如果唔識尊重佢/唔啱 key，你個仔都唔會同佢地 friend。靜觀其變，13 歲好多野都可以自己處理，俾佢試下自己處理呢段朋友關係。
同我仔一樣.
我會同佢講我好唔鐘意.
我接受唔到.
同佢講道理, 見一次講一次.
SO FAR我仔會接受.
安排活動比佢, 即使係打機.
霸晒佢D 時間. HAHAHA
講粗口已經係十幾歲既文化，佢哋既共同語言，我諗最緊要係佢哋識尊重同識分識分場合，係長軰面前一定唔可以粗口，公眾場合都唔可以
同你囝囝差唔多年紀，其實學校都有唔少人講粗口，不過梗係唔喺老師面前啦。
同frd一句起兩句止就由得佢，太多就同佢反映，中一應該仲聽話嘅，好過完全唔同佢講（間唔中提吓，會有少少潛移默化）
真係唔聽你講，唯有俾佢撞板一次當教訓