限聚令實施以嚟，警方執行呢條條例嘅尺度，曾經多次引發爭議。近日有消息人士向我哋透露，灣仔柯布連道天橋近入境處大樓，日前曾經有警員企圖向在場排緊隊準備去入境處嘅市民進行票控。好彩當時有入境處職員即場向相關警員交涉，當日排隊嘅市民先至可以倖免於難。
據消息人士指，事發當日，入境處為咗避免有太多市民喺櫃位大堂聚集，於是安排部份市民喺柯布連道天橋輪候，並且派出幾名職員協助維持秩序。期間一隊警員突然到場，聲稱由於現場有人群聚集，因此要向在場人士作出票控。入境處職員隨即上前交涉，並且向警員多番強調，當時在場排隊嘅市民，其實係等候緊入境處嘅服務。警員其後抄低咗入境處職員嘅委任證資料之後，並無對當時在場嘅人士進行票控。
值得一提嘅係，據報入境處職員想查詢到場警員嘅資料嗰陣，有警員一度建議入境處職員，直接抄佢哋膊頭上面嘅編號。最終喺入境處職員報以一句「我哋唔慣用冧把稱呼人」嘅情況下，警員先至留低佢哋所屬巡邏小隊嘅相關資料。
事後我哋曾經去柯布連道天橋視察過，入境處的確有派出幾位著咗部門背心嘅職員駐守。相信經此一役之後，有需要排隊輪候入境處服務嘅市民，應該可以稍為安心一啲。