我個仔而家3個月大，之前兩個月大嗰陣發覺佢半夜4,5點嗰餐愈食愈少 啜兩啖就瞓左(人奶b 全埋身)，就試下半夜佢醒就比奶咀佢，頭一個禮拜都幾成功，4,5點比奶咀佢就瞓到7點 我先餵…但唔知點解近呢個禮拜又愈嚟愈衰，晚晚3,4點醒，5點幾又醒，6點幾又醒，我次次都比奶咀佢，拍一陣就瞓返…但咁落去都唔係辦法，我都差唔多放完產假，晚晚醒咁多次真係點返工…唔知點解會愈嚟愈差…唔知係咪太依賴奶咀，半夜札醒 冇奶咀就唔識自己瞓返…有時都諗 不如4,5點又餵返佢食奶 可能仲可以連續瞓多兩三粒鐘…唔知大家有咩意見呢
1個讚
我以前就係咁
男仔無女仔咁快可以一覺訓天光，我好多朋友都有相同經歷，試過好多方法都唔得…所以都係順其自然吧，我仔3歲先無再飲夜奶。
琴晚我BB都有相似嘅情況…
佢都係幾乎全埋身 一日只補一次奶粉等佢適應奶粉
明明前幾日已經成功戒左夜奶
但琴晚點拍佢佢都唔肯訓返
俾佢啜又啜兩三分鐘後 點整都唔食
到今朝早我終於發現佢應該係唔夠暖
俾多左條毛巾包住佢 佢終於肯訓 冇再一兩個鐘醒一次
所以有時可能唔係奶嘅問題唔係習慣嘅問題
可能係周邊環境或者其他野影響
可以試下唔同方法 睇下佢仲有咩需要
我無幫小朋友戒。。。
佢搵奶食，攪你1個2個鐘既，咁不如渣渣淋比支奶佢飲完訓返，大家都可以訓得好。
我仔飲夜奶到9個月，直到有日佢一覺訓到天光
反而咁，我仔無咩點用奶咀
試下留起啲人奶用奶樽餵，夜晚個餐餵飽少少
其實你照餵大家都可以瞓得好d，我個8個月全埋身b都未介夜奶呀，我都係瞓住餵咋。幾時同點樣戒到夜奶真係冇一條formula因為個個小朋友都唔同，到佢developmentally ready 就唔會再半夜醒㗎喇。我大女到兩歲幾先開始完全半夜唔會喊醒要安撫(2.5個月已戒夜奶)。
其實可能bb 猛長期，會突然加大奶量，所以呢排真係唔夠飽，一般過幾日適應左又正常返
你都係咁呀？跟住就索性半夜餵返佢？其實佢咁樣醒咁多次 係咪因為餓呢…定係只係札醒左唔識自己瞓返呢…我d朋友生女多 全部都好似好易就戒到夜奶咁嘅
哦…咁我下次再研究清楚佢有冇其他需求
但因為我屋企好多人 bb一開始叫 我為左唔好嘈醒哂全家 就成日想盡快令佢收聲 都唔敢慢慢研究
唉 而家都可能餵返佢算…晚晚每個鐘醒一次 真係唔掂…你仔仔9個月時係突然間自己一覺瞓天光？之後就冇再餵過夜奶？我幾時等到呢一日呢
我試左兩晚…但都冇乜分別…同埋根本迫唔到佢食多d…佢一食夠就死都唔肯再食…
係…睇嚟都係試下餵返好d…要等佢自然戒
我都有諗過…呢幾日佢仲要有時4粒鐘先食一餐(之前係3粒鐘一餐)，搞到全日有時食得5餐，但每餐又好似冇乜食多到…我都有懷疑係咪因為日頭total奶量食少左 所以半夜就餓醒…
我大仔係唔要奶但每個鐘醒1次，到1歲先正常
要抱住訓先可以3，4個鐘醒一次。。。
細果個就好d有夜奶就攪掂，到9個月大先正常
可能我真係唔識湊
其實我都唔知佢係咪真係肚餓，但開支奶比佢一定飲得晒…飲完就即刻迷迷下咁訓返。我試過唔比佢飲，一歲前會喊到唔收聲，大個d再試就係唔可以熟睡，訓一陣又醒訓一陣又醒，又試過比水佢飲/支奶開稀d, 飲完佢都訓得唔好… 本身佢已經係要抱住攬住訓架喇～
我d親戚同朋友生女既滿月前都戒晒夜奶，係自自然然訓天光唔駛飲，生仔既起碼2歲先戒到
我大女兩歲半經常四五點要食夜奶
但细女五个月反而經常六七點天光先食
我諗真係好睇食量
三個月咁细俾佢食夜奶發育會好啲
有時猛長期都會特别肚餓
冇得勉強戒夜奶
原來咁多b都要咁大先戒到夜奶…咁我都唔應該咁心急 我係見半夜比奶咀佢 佢肯瞓 又冇喊 我就以為佢唔係餓 係想瞓…睇嚟都係未得住…
我分享下我當時幫仔仔戒夜奶既情況
滿左月後2星期先幫佢戒，戒左1個幾星期就戒左夜奶。
之前既Schedule:
7am 11am 3pm 7pm 11pm 3am
1歲前既Schedule:
8am 11am 3pm 7pm 11pm
飲飽左佢自然訓得耐d，大約3個半鐘就喊要食，咁我一開始就唱下歌，抱住佢行，同拍patpat咁拖夠4個鐘先比佢食，慢慢佢就慣左4個鐘食一次。
戒夜奶我係等佢滿月後+2星期先開始(因為佢早2星期出世)。3am個餐每日拖15mins，今日拖到3:15am，聽日拖到3:30am，有時會有d反覆，可能尋日4am先飲，今日3:15am已經喊到不得了，咁都要照比佢飲，第二日就拖到3:30am再餵。如果佢過左時間都未喊就由得佢。
我仔一開始由3am拖到4:30am之後，半夜呢餐佢就慢慢愈食愈少，由7安減到3安都夠令佢訓着，之後好多時都訓到6am先醒，有時去到7am。
我半夜個餐只拖時間無減份量的，但去到7點時我會照沖7安比佢飲
2餐相隔時間近，佢半夜個餐開始愈飲愈少，自己慢慢由7安降到5安再降到3安咁
當然個個bb情況唔同，我只分享我既做法，睇下你岩唔岩用。bb最緊要先食飽，再培養返定時食奶既習慣。
2個讚
多謝分享
而家距離我開呢個post時 已經過左廿幾日，而家我個仔又好似好左少少…11pm食完最後一餐就瞓，通常瞓到5點幾醒一醒，一抱就瞓返，再到6至7點醒 我就餵…好間唔中會多左次3點幾醒一醒 不過都好快肯瞓返嘅…
其實我一直都冇特登拉長佢食奶時間間距，總之佢醒左 喊 唔肯瞓返 我就餵…係佢自己愈食愈少 掛住瞓
我都有聽過固定早餐時間同份量 等佢慣左知道每朝嗰個時間就有得食 咁佢半夜就唔會起身嗌食…不過我埋身餵又唔知份量…時間就算固定嘅 基本上佢6-7點一定會自己醒