第一次開post, 如有不對請見諒>人<
雖然講流產好似好negative咁
但作為一個過來人, 我真係好想勉勵有同我一樣經歷既媽媽們
上年12月中我自然流產, 係知道阿B既出現到佢離開只係短短2個星期
我同我先生都好中意小朋友, 亦有諗住生, 不過阿B就唔係預計既時候黎既
由初初既驚訝, 不知所措, 到開心, 期待, 到佢離開, 甚至到依家
真係好似發左場夢咁
當日見紅, 去急症室, 叫我返屋企瞓床安胎, 第二日直頭大出血, 再去急症,
証實流產, 住左一晚醫院
就算到左依家, 嗰2日發生既事仍然歷歷在目
知道阿B離開左我嗰一排, 我真係行屍走肉咁
自問有左BB之後我都好小心飲食, 都有戒口, 唔敢俾自己太攰太勞累
不斷喊, 責備自己, 係咪自己身體差, 係咪自己唔夠好, 係咪食左咩飲左咩
甚或係係咪自己上世做錯啲咩, 或今世鬧得黑警多, 個心太黑所以呢啲事要發生係我身上
責備自己好似成為左每個流產婦女必經既過程咁
但到今日, 我真係好希望話俾大家知, 唔係大家既錯
根據不同既研究, 其實有15-20%既婦女會出現流產
即係每100個孕婦入面, 就有15-20個咁不幸既case
而且發生人係12週前既情況係最多, 80%以上的自然流產發生在懷孕12週以前
所以點解啲人話未夠3個月唔講得, 好可能都因為呢個原因
而最大既早期自然流產原因, 就係染色體異常, 而呢啲情況係父母雙方都無法控制
我明白仲係悲傷中既媽媽係好難說服自己"無法控制"呢個point
我都用左好耐時間先可以好似依家咁平復心情
(甚至情況嚴重到要去見社工)
加上我發現好多地方, focus係產後抑鬱既問題上比較多
好似好少會關注流產失去BB既媽媽既心情
但其實佢地都係需要俾關注的一群
有些媽媽怕講, 怕影響到身邊既人既心情
其實你地自己既心情都要被重視o家
所以, 想喊就喊, 想悲傷就悲傷, 呢啲都你情緒既一部份
希望各位老婆有此經歷既老公們, 好好陪伴你地既老婆
有時佢地唔講唔係唔傷心, 而係怕你地影響到你地
當然你地都會好心痛, 但真正感受到失去既感覺, 一定係老婆
我好感恩我老公嗰陣子成日陪係我身邊, 開解我, 照顧我
阿B既離開, 係好痛, 真係好痛, 由其是好似我咁咁中意小朋友既人
不過, 我地都要養好身體, 等阿B帶齊行李再返黎=]
我依家努力備孕中啦, 希望大家都身體健健康康, 祝你地都好孕 
感謝你地睇左咁長篇既文=]
總會有一日你會成功，小心身體
