如何盡孝道得來不令自己崩潰...

家事討論
21

其實我而家都係咁諗，但佢哋嗰一代嘅人，係唔會咁諗，養兒防老始終係佢哋生仔嘅其中一大原因/目的，佢哋亦唔會有｢情緒勒索｣之類嘅自覺，佢哋根本唔知係咩嚟亦唔知自己做緊，所以唔會覺得自己有問題，唔會察覺自己付出愛一直係期望有回報，只會覺得天經地義係你唔夠孝順。

問心呢，我自問我係做得唔夠多嘅，可能我家姐細佬係比較識得點關心佢氹佢，都係性格問題喇，我個人係真係比較冷淡嘅… 好似我媽打嚟同我哋講老竇唔舒服，我家姐細佬可能會即刻打去問候，但我係會冇反應，但我係會去諗可以做d咩幫到佢/改善到個情況，但以前已經試過我媽覺得我愛理不理，因為我嘅即時反應同佢心想要的係有落差，責怪我話我做仔女嘅係有責任…

但老實講呢，我嗰刻都心裡面諗，點解我有必然責任呢？我係覺得，而家佢唔對自己身體/人生負責，成日覺得唔嘥錢睇醫生、情況已經好差都選擇拖同排睇政府去慳錢，就係好父母，就係為我哋好，但唔會諗令我哋擔心而又咩都做唔到嘅時候，我哋先係最痛苦。例如佢對眼有事咗好多年，應該要做手術，佢又係死都唔肯喺私家度做，等政府排真係排到下世都未有得做，個手術兩萬蚊，其實我哋畀得起，而家唔同以前我哋細個時咁窮，點解仲要用嗰種窮人心態？講真用錢解決到嘅問題點解唔快快解決咗佢？但每次同佢講佢仲覺得佢慳錢係最偉大咁… 有時一諗到我去個旅行都使兩萬，佢就為咗慳嗰兩萬對眼就快盲都唔肯去醫，我會覺得好自責。

1個讚
22

樓主, 照顧左自己既心情同身體先, 宜家唔係你無盡力, 只係對方唔領情。

我都覺得呢個比較好

正如你所講, 你老豆響你由細到大時一樣唔係咁樣對你, 你都自然唔會咁樣關心佢。

其實你宜家一樣係最需要人關心同照顧

感覺你父母都唔理解你, 既然係咁, 可能真係保持距離比較好。你已經大個女, 唔需要再做父母心目中既乖孩子, 你都已經盡左力, 只需要對得住自己良心就OK

養好自己身體先, 現階段同你老公組織家庭都好重要架

抱抱, 呢d 人永遠唔會反省自己, 支持你心情唔好時冷處理

最正係, 宜家慳少少就覺得自己偉大, 但無諗過佢為左慳呢少少, 第時搞出更大既問題令大家suffer

23

我近年先知自己係… 呢幾年花好多時間去諗呢d問題，因為開始察覺自己做人做得好痛苦好唔開心，原來係因為由細到大、由家人、朋友到工作上，我係不斷喺同一個pattern度無限輪迴，無論去到邊、對住咩人，都會重覆遇到同樣問題，受同樣嘅傷害… 好大原因原來係我有討好型人格… 同埋係，我好多嘢鬱鬱埋埋，一鬱可能係十幾廿年，鬱到崩潰先爆…

所以近年我都開始人際斷捨離，人哋唔領我情，或者對我唔尊重得寸進尺踩到上心口，我就斷絕來往算了，喺呢d關係(友情/工作)度折磨咗自己十幾廿年，我終於學習緊唔再為咗維繫段關係而不斷幫人搵藉口、不斷畀人踐踏，但過程中我係會不斷陷入自責同自我質疑，會諗係唔係有問題嗰個係我自己… 而家人呢關，好難，始終我知父母好愛我，付出好多，係真嘅，但同時，我都好唔希望亦冇能力承受某d情緒甚至責任，尤其是當有d情緒同責任，明明本身係可以避免產生嘅…

5個讚
24

我真係希望佢可以明白呢點… 好似我哋做仔女嘅都會覺得/又或者好多父母都會咁講(雖然可能都係得把口講): 仔女顧掂自己，唔令父母粗心，就已經足夠。其實角色換轉都一樣。所以點解有時我自己身體有事(包括今次流產)，我唔會同佢哋講令佢哋擔心，因為除咗擔心之外佢哋都做唔到d咩，嗰種感覺先係最難受…

有事咪去睇醫生，呢d錢我唔會慳，我勸佢時都同佢講，花喺自己身上(尤其是關乎身體健康)嘅錢，係從來唔會｢嘥｣嘅，點解對自己好對自己負責會覺得係｢嘥錢｣呢？咁嗰次就係成功勸到佢去私家嗰次(但可能好大原因都係因為我吹水話我老公會埋單)，但到下一次，你係要從頭勸過佢，而佢之前聽過嘅佢就唔會再受，你要諗新嘅台詞同劇本去勸佢，真係心好累。

25

呢樣真，我老竇都係，中西醫都唔信，淨係信自己。叫過佢睇中醫調理，佢睇過一次就話無用，同佢講睇中醫唔係睇一兩次，起碼都睇兩三個月，佢咪覺得嘥錢同嘥氣。

呢次佢心口痛呼吸困難，唔知係心有事定呼吸系統有事，我好驚佢心血管塞(曾經通過波仔) 所以先極力勸佢快快去睇私家心臟科，但到之後佢睇開個政府醫生叫佢照超聲波時，佢就係同我哋拗，話而家9成9排除心臟有事，應該係呼吸道問題，所以唔需要再照個心… 但係邊個話9成9排除呢？係佢自己lol… 我真係無好氣，咪話：你個醫生都未排除你個心冇事，你係點排除？咁如果係咁，你係咪會去睇呼吸科？但佢又唔係打算去睇架… 又要同你講，要你擔心，但又唔聽人講，唔睇醫生，自己幫自己斷症，然後又咩都唔肯做… 我真係把幾火架…

26

係，我媽永遠係首當其衝，咩都佢受晒，相信佢都幫我哋擋咗好多，我都好心痛佢，但有時又係愛莫能助… 只可以再關心佢多d，好彩佢都算係性格比較樂天…

3個讚
27

（抱抱）

聽你地咁講，原來我自己都係「討好型」人格。真係好辛苦，我好明白你。尤其係對住d所謂親人，你對佢地好，盡力幫佢地，點知原來背後不斷講你壞話。講到佢地自己好清高，話自己有工返就係自強，就睇唔起全職媽媽嘅我。但佢地有咩事要人照顧小朋友，就識個搵老人家同我去照顧。講真，邊有我幫佢地執屎，邊黎得佢地過得咁自強，優質嘅生活。

所以樓主，我真係好明白你。

2個讚
28

原來我都係討好型人格，真係辛苦自己，吃力不討好，D人習慣左你既付出，總找你幫忙或安慰，然後佢地會變得理所當然。
近幾年我開始學習對朋友/親戚隨緣，佢地搵到我都會安慰開解佢地，但唔會再咁上心，主動聯繫。暫時只係工作上面仲未好做到。
樓主，自己盡孝了就隨緣，你都有家庭，放多點心思在自己家吧！好好養好身體！

3個讚
29

係喎，冇諗過，會叫佢以後要咁做 (希望佢肯)
Call白車佢係點都唔肯，佢連抖唔到氣好多次都係唔肯call白車，呢下先令人頭痛… 知佢好唔想住院，之前試過因為去睇急症醫生要佢留院觀察，佢就日日發脾氣話要出院…

最｢搞笑｣係佢唔肯去睇私家嘅原因，係佢覺得佢有事入院時，醫院咩檢查都要幫佢做，又唔使咁貴… 但問題係佢就算好大件事都唔會肯去醫院… 你同佢討論係唔會有結果…

30

其實上次睇咗成8千蚊嗰次，係幫佢做咗個檢查睇心血管有冇塞，結果係冇塞，但後來政府叫佢照超聲波，係因為驚係心臟衰竭，我諗係兩樣嘢嚟，血管冇塞都可以係心臟衰竭… 始終佢都80幾…

佢自己就覺得係呼吸道、氣管問題，但佢喺政府診所覆咁多次診，又唔見醫生話佢係有呢d問題，或者安排相關檢查… 知佢係想買部家用氧氣機，我都諗住幾姊弟夾錢買部，但我家姐(做醫療相關工作比較熟)就話對佢情況冇幫助…

至於會唔會係有情緒病，都係不得而知…

31

係，生bb係為自己，係我哋兩公婆考慮咗好耐嘅決定 (考慮得太耐，搞到高齡…)

其實幾年前，我就快高齡嗰時，我父母有直接開口話想我生b… 可能佢哋都忍口忍咗好多年，見我就快35先講，因為應該都知我脾性，係唔迫得嘅… 但嗰一兩年佢哋就時不時問我喇，講到明好想我生，我就同佢哋理論喇，點解要生呀？佢哋就話有小朋友會開心d。我話我冇錢養喎，搞掂自己先，佢哋就話｢窮有窮養｣，話我哋嗰時都係咁樣養大 (佢哋真係覺得窮養冇問題)。我問到佢哋答唔到時，我阿媽有次就私底下同我講，話｢你老竇真係好想你生｣，嗰下我就起"剛"喇，因為｢你想｣並唔會構成我生b嘅原因，當時佢哋將自己嘅期望強加喺我身上，係令我覺得咁樣生仔成件事係錯晒嘅，我唔想我生咗個小朋友出嚟，然後又延續呢個cycle…

不過我過咗35佢哋就放棄咗冇再問喇，但反而到我心態有變，但生唔生，從來係唔關佢哋想唔想事，呢樣嘢我係好清晰嘅，我嗰句「想佢有孫抱」，都係回應返嗰位jm嘅留言。我覺得自己而家心態上係比較ready做呢件事，係因為我有一種自覺，就係要避免對下一代｢情緒勒索｣，生b純為自己開心(所以仔女有責任令你開心)，避免將上一代嘅問題同不良嘅cycle延續落去… 當然我唔知自己做唔做到(而家連生唔生到都成問題)，但我覺得做人有自覺係好重要，亦希望呢樣係我哋比上一代進步嘅地方，繼而令下一代唔需要喺情勒下成長，之後佢哋嘅下一代又會更好… etc.etc… 不過我而家講多都無謂，生得出先算…

4個讚
32

因為近期我老竇有時係唔舒服到全日瞓喺度，嘢又唔食，都唔算係｢自主正常｣，所以我先覺得好難由得佢，但佢唔肯睇醫生我又做唔到d咩… anyway，希望你媽身體ok，行得走得食得，因為最慘係見住佢哋有病痛好辛苦，但你幫唔到…

Hug… 點解會咁… 佢唔知你小產？同埋無論如何，佢咁都係唔合理，點解一定要你陪，仲發脾氣… 呢d蠻不講理先係最難頂。

33

多謝你… 可能我呢排情緒真係比較唔穩定… 我會好好take care自己…

34

我屋企都有個勁多慢性病嘅呀爸，真係勁小心翼翼照顧，一唔小心就要緊急入院，身邊人尤其是呀媽勁辛苦，但成日都係皇帝唔急太監急，皇帝唔明病左辛苦嘅唔係佢一個，照顧者壓力更大。所以完全體會到你嘅攰，但唔理又唔得果種內心掙扎。而家到左壓力臨界點，先自己好好休息吧，你嘅身心都需要被關心啊

35

希望世伯也可身體安好，好明白不能眼白白咁咩都唔做咁由得佢，不過你也不要迫到好似只是自己一個的責任，因為還有其他兄弟姊妹一同分擔感受。

我根本從來都不想讓她知道我小產，一來不想讓她擔心，二來她不會幫忙照顧我的（莫講話安慰，就算叫她煲吓紅棗水都話唔識）。那時我爸有事入了院，她二話不說就話不會煮野給我爸，叫他食醫院餐。遇著我爸睇中醫如要煲中葯，她又係二話不說就話唔識。其實我們從來都冇諗住要佢幫，但佢就會極速落閘，慌死我們要煩到佢咁。

但佢覺得佢自己既野，就一定要係我去做，我唔可以唔得閒，唔識做或者搵其他人做。但我哥就可以唔得閒或唔識。有次睇醫生（公立醫院），約了下次覆診，我話我要check吓得唔得先，唔得既就我哥陪她去就得，佢好快就話唔好搵我哥，話我哥唔識，我好嬲話你洗唔洗咁，我哥都係一般大學畢業，從事專業工作，不是一個什麼也不懂的人，點解佢可以工作忙碌，冇跟開等第原因就可以，我的工作就不是工作嗎？怕他多請假不好，我就不怕嗎？我媽只得兩個仔女，兩個一齊分擔一吓，唔過份吧。為何要咁不公平呢。

所以我其實都心淡了很多，對她的照顧都只係責任而已（我有時都會覺得咁諗好衰）。平時我都好不想找她，因為她會不斷放負講我哥一家的不是，但我表明不想聽，她死都要重重覆覆地講，但在他們一家面前，就係好媽媽，好奶奶和好嫲嫲，人前人後兩個樣。我怕自己忍不住鬧返佢，怕連心底剩下謹餘既愛都冇埋，我情願不太找她。這就是我會提議你，如果真的有崩潰感覺，就要抽離，因為怕自己會忍不住在勸說既過程中，不自覺說了難聽說話，那會很破壞關係的。

2個讚
36

純分享…對你無乜幫助，但you are not alone

https://www.andthen.hk/column/形影神-卓韻芝/46669_老人家不肯看醫生/

37

Exactly… 就好似上次，佢有事時肯去睇急症，就唔使之後睇咗成8千蚊私家仲要搵唔到唔舒服原因(已經唔止一個醫生同佢講過，有事時唔即刻睇，過晒氣先睇時醫生根本好難斷症，但佢都係唔聽，仲反過來話醫生唔識嘢/態度差…)

有時係呢d不可理喻令人最辛苦，又唔同得佢講道理，更唔同得佢嘈 (佢發起脾氣上嚟係好癲…)

冇晒辦法… 同埋我都知我而家好需要照顧咗自己先…

1個讚
38

討好型人格好大原因係成長環境導致，當然自己性格都係問題… 而家我會去探究係咩導致自己咁樣，同埋點樣可以改變… break the cycle or pattern… 係人生課堂嚟，你已經為人母，如果可以處理到呢d根深柢固嘅問題，相信同自己子女嘅相處以至佢哋嘅成長都會好d，你都唔會想自己子女又係people-pleasing到冇咗自我…

我唔知係邊個咁樣話你同睇唔起你，希望唔係你老公喇… 但其他人點諗點講，我哋真係控制唔到，我知要唔因此受影響係好難，尤其是討好型人格嘅人係極度介意人哋點睇自己/害怕被討厭/需要別人嘅肯定先覺得自己有價值… 但其實呢d想法係錯晒，幾難都好，要學習唔好再咁樣，自己要知道自己嘅價值，唔好因為人哋三言兩語就完全否定自己。全職媽媽責任重大，工作量又大，點會係冇貢獻？

2個讚
39

Exactly, 因為佢哋知你係可以被㩒住嚟砌，你係會不斷妥協，你係完全冇底線… 遇著d冇乜良知尤其是自戀性人格嘅人，佢哋就更加唔會同你客氣，得寸進尺… 斷絕某d關係，係保護同尊重自己，尤其是當呢d人根本就唔會尊重你…

1個讚
40

係呀，佢哋唔會諗下人哋… 覺得唔求醫/唔嘥錢睇醫生，好似係一種自我犧牲咁情操高尚，又或者純粹係畏疾忌醫都好，然後病同辛苦到無法自理，要人照顧同擔心，其實人哋真係好大壓力… 有d嘢真係要交畀專業人士先處理到架… 但我明佢老人家點解咁驚入醫院，佢call白車去急症嘅話，9成9係要留院架喇，佢係好抗拒呢樣，所以先唔肯睇急症… 我明嘅，我都入過幾次廠，我點會唔明瞓醫院的慘… 但有事唔入醫院，自己瞓喺屋企真係唔會好嘛…

1個讚