辛苦你啦
同時湊兩個咁細真係唔容易（食嘢同瞓覺絕對係兩個大boss）
我都係有兩個小朋友，但隔得耐，細的出世時大的已可自理，所以好D
不過湊細B時我都成日發癲，佢係高需求寶寶，又成日夜晚狂喊唔願瞓，我仲要返工真係搞到崩潰
不過而家總算捱過左，加油，唔好放棄
其實我覺得有時d壓力係來自人地把口，或者同其他小朋友的比較，呢d避唔到，唯有改變自己心態先幫到自己
1個讚
我小朋友長期都係3%生長線，出街見到高過佢嘅都係細過佢。
成日練仙，以前有返學就好嚟啲，放學餓鬼咁。依家由佢算，最多餵密啲，或者好太陽嗰陣帶佢放下電。
上Zoom唔肯起身，無興趣嘅會走開或者瞓返，後期睇化左，佢唔上就算，反正咁細個對住個mon都唔係咁好，功課到佢有心情先做。
1個讚
我長期由細到大都係 3% 呢個位，仲要小學開始掂唔到線，鍾意食嘢都吸收唔到，日日都畀人搞錯歲數，聽到原來歲數嚇親添…聽啊嗎講以前 1 歲前想捏死我，飲奶超過一個鐘，有時又唔肯飲，喊得仲耐過訓嘅時間，好在依家都健康開心。所以幾多 % 小朋友同你都控制唔到，只要健康冇病咁就隨其自然。
一次過湊兩個咁細嘅小朋友係辛苦，3 歲 zoom 係更加冇可能，既然係冇可能嘅事，咁就唔需要強求同為呢樣而生氣在意。搵下啲親子活動大家開心下，睇下電視又好，玩下遊戲都好。同阿大傾計都得，小朋友啲答案有時候幾可愛又有時候好發人深省。
2個讚
無刨晒文, 只想講唔食野呢樣.
話說我外甥又係唔食野, 瘦個火柴人, 對眼直情突出來咁瘦. 我個妹忍唔住帶佢去睇醫生, 醫生話無得迫, 比包奶佢飲, 佢遲啲會追返. 而家佢讀大學, 高度OK, 仲係瘦但算健康, 不過佢成長過程中有迫佢游水. 所以唔洗擔心啦, 佢仲咁細.
1個讚
我細個都好瘦，又食得少，成日俾啲大人話練仙
大個都係偏瘦
依家我好肥呀，過重呀 
我生嗰個都係細位，大概10%
咁你要明白總有人係最細粒，排頭位
3%都係正常
1個讚
我生左2個，大女好乖好定，又易湊，我一直以為係自己教得好，但生左第2個後，徹底癲覆我價值觀，教極都好百厭，訓又訓唔好，食又勁揀飲擇食，用左好多方法，而家變佛系，完全明白到小朋友每個都唔一樣，真係未必關媽媽事，所以你唔洗自責，你已做得好好
5個讚
大家條起跑線都唔同。
好似智商其實好大部分生出嚟咁，點栽培都只可以改善到些少，但唔會由100變140。食多食少生長成點都一樣係「因材施教」。
又或好似嗰啲天生多人奶嘅女人，覺得人哋做唔足先唔夠奶，但佢哋唔會明有啲人事實就係真係點整都唔係好夠奶，咁咪補奶粉囉。
2個讚
我細果個又系由出世到現在8歲，都系尾二果條生長線。8歲仲著緊6歲衫，三年級著緊一年級校服。比99話足錦多年，話我吾比野他食。但他好活躍又精靈，健康院姑娘和睇開的醫生都話無問題，慢慢大家都接受左，每個小朋友size都不同，最緊要健康。
2個讚
樓主，唔係你玻璃心，係你朋友唔識尊重你啫
每個人的背景唔同諗法唔同，育兒手法當然會唔同
加上每個小朋友都係獨立個體，點可以比較呢？
我2個小朋友都係我一手湊大，但佢地瞓覺/食飯/玩樂模式都好唔同，我都要用不同方法去照顧佢地
加油樓主
在育兒路上你絕不孤單
多啲上嚟一齊傾下笑下放鬆下
1個讚
我諗起我哥，佢小一到小六都係著同一個size嘅校服，年年排第一，因為冇高過同埋係瘦仔，佢食量一般
而我同我哥差兩年，我細個好食得，只要有汁撈飯，可以食到4-6碗飯，小學時，我爸直情開口話我肥到成個波咁，好唔鍾意我食咁多，醫生都開口要我減肥
我讀幼稚園時已經同讀小一嘅呀哥差唔多高，d街外人成日以為我係大嗰個，一直被人誤會到我小六，我哥中三個年突然標高好多，而我去到小六就冇再高過
其實食得多都唔代表生長線一定好，可能只係體重喺頭10%，但高度係最後3%，即係過重要減肥，所以只要高度同體重符合比例健康就ok喇
媽媽放鬆d，雖然我知唔容易，但好似上面咁講小朋友有需要時就會食，冇需要你點都迫唔到，倒不如讓自己偷吓懶，煮少一餐半餐或者煮自己想食嘅嘢
我係新手媽媽，我都學習緊由小朋友需要出發，大家共勉之
2個讚
呢樣真，有時我個BB唔肯食嘢，我哋就個個買枱食飯，佢見到人人都食飯，佢就自己走埋嚟跟住扮大人一齊食飯㗎喇
2個讚
其實我係第一次黎呢度留言同借個樹窿想講自己屈左係心入面好耐但又唔想同家人講既問題
好意外亦好多謝咁多位真心既鼓勵同正面支持！
我尋日第一日嘗試放手
大女放喺奶奶一日
細仔 我由佢食幾多就幾多，唔食就收
發現 呀仔好似無再咁大吵大鬧
應該就係各位所講嘅，唔好太在意同執著
我會繼續加油努力
儲番正能量去做番自己！
12個讚
呢到好多人俾咗好多經驗同分享，我唔講啦……只想俾個抱抱樓主
1個讚
樓主，真心唔駛太理其他人點講，我都係生左二個，第一個天使黎，完全唔駛操心，嗰時都覺得因為自己湊得好，到第二個相比起難湊好多，就會發現以前真係太天真，有時有啲位放鬆啲，自己同小朋友都開心啲，加油，小朋友捱捱下就大
1個讚
我細個都練仙，大個都瘦，疫症後變肥師奶
1個讚