除非新抱出哂聲話肯，如果唔係都唔好一相情願咁諗住後生會照顧自己。個仔又唔方便，新抱又唔係有親。
2個讚
我啲祖父母輩，啲資產留晒比個獨仔
然後獨仔一野就移民飛走左
得返啲女係香港照顧老人家
雖然佢地對女、外孫都唔錯，但點都會有少少唔舒服
我媽咪都係留層樓俾我細佬，因為我細佬一家同佢同住，又搵唔多，所以等細佬有個竇，我冇異議。
我老公同我有層樓，佢最細個妹冇份工做得長，已過40，結咗婚有仔女，住喺99名下嘅屋（不同99住）。99話佢百年歸老都會留多D俾最細個妺，因為佢冇樓，又有仔女要養。但係我老公層樓係節衣縮食供返嚟，佢細妹冇份正職又唔使交租，隨時就去外國玩兩、三個月體驗人生 （十幾年前99話俾首期，叫細妹自己供，佢話唔鍾意供樓），最後佢就變咗冇樓，99就要幫佢多D。
我老公好錫佢家人，但佢都有少少唔開心。唔係話貪，但係6299什麼事無大小都係搵老公做，細妹就唔得閒唔理。老公好努力返工供樓，細妺就自己吃喝玩樂洗晒D錢。老公都有問我：「咁係咪即係要懲罰努力工作嘅人？游手好閒嘅就因為要人擔心，所以就順理成章得多D？」
我聽到都有D唔開心，唯有安慰佢「我地自食其力不知幾好呀！D錢係99嘅，佢鍾意點就點，我地乜都唔好理，好仔不論爺田地！我老公係好仔！我地比上不足、比下有餘，6299又唔使我地養，已經好好啦！」
3個讚
心態正確, 自己有能力就負擔自己可享受嘅生活, 個人都踏實同安心
一味靠啃老果D, 除非伯爺剩好大個餅啦, 否則人地比層樓你你都要交得到管理費差餉水電煤
1個讚
兄弟姊妹感情，跟父母對仔女感情，係兩個唔同嘅層次。
對於唔自愛嘅同輩，唔想幫係正常嘅，但係錢係父母嘅，佢哋真係有權點樣用，特別係年紀大嘅父母，有生之年對住最懶嘅仔女都好少見死不救，至少唔想白頭人送黑頭人。 屋企唔係一個講理性嘅地方，最有理性嘅屋企通常都無左啲人性。
有天大嘅不滿，等父母不在先搵兄弟姊妹計數吧，如果仲有呢個必要…
2個讚
我有朋友(女)又係咁，兩公婆專業人士，又精於投資，香港有三層樓。老爺生前同佢哋一齊住。
老爺嘅遺囑寫晒D財產俾姑仔(幾拾萬現金+一層係廣州市中心嘅樓)。
我朋友都有D唔開心，覺得老爺唔欣賞佢兩公婆嘅付出。同我講就算老爺留一萬現金俾佢哋，佢都會好開心。
有時父母留(分)幾多俾每個仔女唔係重點，我哋在乎嘅係：父母有冇欣賞自己嘅付出。
2個讚
最恐怖係明明付出多啲嗰個就只因為佢係女就冇，但父母有病有痛就識搵個女，唉～
我開呢個鋪係因為太多呢啲例子
1個讚
我真係估唔到係香港，仲有咁多父母重男輕女。
1個讚
因為我屋企冇仔，所以我一直冇為意，直至近年
2個讚
朋友喺醫院返工，佢都話陪父母睇醫生嘅，90%都係女陪，極少見到仔陪。
1個讚
住院就更加, 女都可能會煲啖湯, 買個生果, 仔就真係嚟探都比面 (不過疫情之後都無得探病了)
我都陪奶奶多過我老公，我奶奶話好仔不如好新抱
2個讚
我爸爸屋企係咁
但佢好好，冇攞到，而係攞出嚟俾家族一齊享用。吃喝聚會就喺嗰度出
我老公屋企都係
佢嫲嫲d物業都係比我老公,唔比女孫
我屋企就得我同我家姐
父母買樓比我地係2姊妹聯名/一人一間,好公平
邊個生性比邊個=極正常
邊個唔生性比邊個=唔啱，但明白父母係為個唔生性嘅著想
留比個仔唔留比個女=純粹重男輕女，好pk
2個讚
你老公個case 同我老公好似呀
佢阿妹冇份工做得長，成日掛住去日本，一年5-6次都要去，去到周身卡數借錢累全家，最後仲破埋產 。
反而我老公慳錢結婚買樓冇用過父母一個崩。而家算有少少資產咁啦
佢阿妹最勁就係冧掂佢阿媽，做盡衰野都唔趕佢走。破產時，佢父母就私底下同我老公講個妹冇能力，叫佢唔好諗層樓，萬一佢地走左層樓比阿妹的。老公到時拎錢算了。
佢阿妹破產期間冇家用，餐餐痴屋企/帶飯。二老冇野做靠生果金同老公家用，所以佢阿妹當時咪又係我老公養。
係有少少唔甘心，但d 野係父母的，佢地中意比邊個咪邊個咯
長貧難顧，自己都有頭家，個妹有手有腳點可以靠阿哥養。
咁都好彩原來仲有啲重女輕男例子
一定有，可能少D。
我所識嘅朋友中，父母通常錫啲女多。
我哋呢一代，好多恨女多過恨仔。
2個讚