答案係B 唐朝。
我地講下唐朝皇家是非先。
點解唐朝公主王子唔受歡迎？我地要由魏晉時期講起。
打三國誌個個都識果個陳群，佢提出左九品中正制，即係將人分九品(上上、上中、上下、中上…一直分到下下)，造就左一班士族。呢班士族即係好似民間貴族咁，因為多人做官，響地方又有威望，所以通常都高傲自信又自大，睇唔起D蠻夷既。
偏偏姓李做皇帝果班又有外族血統，又同番邦好close, 身為士族藍血，血統咁膠貴…做官做同事ok呀，但做親家…梗係唔好講呢d啦。
唐文宗果時想幫佢個太子仔搵皇妃，咁當然最好響朝臣之間揀人啦。一心諗住自己肥水不流別人田，益下d下屬，點知朝臣間竟然覺得不安。果時文宗一心target住宰相鄭覃(士族，牛李黨爭其中一個首領)，想要佢個孫女入宮，點知姓鄭呢個唔止拒絕，仲寧願將個孫嫁比個九品芝麻官。點解？因為姓崔果個九品芝麻官都係士族…最搞笑係，皇帝好似怨婦咁出到聲問點解鄭覃咁對佢，鄭覃唔show佢都可以安然無恙。
至於公主，唐朝出名難搞又任性既公主真係好多，好多士族、官員，甚至武將都唔多想要佢地做新抱。有研究話唐朝計埋得一半公主嫁得出。除左有阿媽做靠山果個太平公主搞到天下不太平，仲有好多年前tvb套醉打金枝係用真實歷史改篇。
仲有一件搞笑事，唐宣宗有個女叫永福公主，本來想將佢嫁比于家(唔係士族，但係唐太宗d親信後人)，做老豆難得幫個女搵到住好人家，就響出嫁前同佢食餐飯啦，咁個女出嫁做老豆當然會交代兩句，叫佢做人老婆要生性，慳下家咁，點知公主聽完發爛渣。老豆見到都好驚，係好驚無面呀，即係改左叫阿妹廣德公主代姐出嫁(嗱，我真係覺得呢個係小說題材黎)。永福本來個老公變妹夫，真係天意弄人，一地花生。